Vise-Ministru Justisa (MJ), José Edmundo Caetano hamutuk ho Sekretáriu Estadu Terras Propriedades (SETP) Mario Ximenes, iha loron 22 fulan-Dezembru 2020 foin lalais ne’e hala’o enkontru avaliasaun ba funsionáriu sira ámbitu Terras Propriedades nian iha salaun enkontru Diresaun Jerál Terras Propriedades (DGTP) Bebora Dili.

Iha enkontru avaliasaun ne’e, Vise Ministru husu ba Diretór Munisipál inklui diretór nasionál no funsionáriu sira tenki disiplina iha oras servisu.

Vise ministru ne’e husu ba funsionáriu sira tenki fó atendimentu públiku ne’ebé di’ak ba sidadaun sira, tanba ne’e tenki tau intrese komum ás liu interese pessoál.

Nia mós husu ba funsionáriu sira bainhira iha problema ka dezentendimentu ruma tenki buka ninia solusaun, nune’e mós buka meius oinsá hodi bele halo avaliasaun ba funsionáriu idaidak.

Nia husu ba dirijente sira iha futuru tenki justifika, funsionáriu hira mak atu tama reforma, iha biban ne’e nia mós husu hodi bele iha valansu ba funsionáriu ho servisu ne’ebé mak iha.

Vise Ministru hateten, tinan 2021 sei estabelese komisaun kadastrál hodi bele fó slusaun no rezolve problema disputa rai ne’ebé durante akontese entre komunidade ho komunidade nune’e mós entre komunidade ho estadu.

Iha fatin hanesan Sekretáriu Estadu Terras Propriedades SETP, Mario Ximenes hateten, apresia ho servisu ne’ebé hala’o hosi funsionáriu no dirijente sira iha Diresaun Jerál Terras Propriedades.

Tamba tuir nia, durante ne’e iha problema barak mak diresaun ho instituisaun estadu nian sira hasoru maibé DGTP bele hatama reseita ne’ebé boot ba estadu, bainhira halo komparasaun ho tinan sira liu-bá.

Mario hateten, iha tinan sira liu-bá, situasaun polílitika la’o normál maibé reseita ne’ebé diresaun hatama ba iha kofre estadu la to’o Dollar Amerikanu millaun 4 miabé iha tinan 2020 maske situasaun pólitika no ekonomia iha rai laran ladun la’o ho di’ak maibé bele hatama reseita ba estadu liu Dollar Amrerikanu milaun haat resin.

Iha fatin hanesan Diretór Jerál Terras Propriedades (DGTP-sigla Portugés) Rodrigo de Mendonça informa mós durante ne’e diresaun hasoru dezafiu barak mak hanesan menus transporte no menus rekursu maibé hanesan funsionáriu sempre fó atendimentu ne’ebé adekuadu no di’ak liu ba iha sidadaun sira.

Iha avaliasaun ikus ba tinan 2020 nian ne’ebé hetan partisipasaun másimu hosi diretores Terras Propriedades Munisípais no diretóres Nasionais ámbitu DGTP nian inklui mós Vise Ministru Justisa, Sekretáriu Estadu Terras Propriedades no fúnsionáriu sira nee Diretór Jerál ne’e mós husu ba Ministériu hodi bele tau atensaun ba funsionáriu sira liu-liu husu atu fó formasaun ne’ebé di’ak ba jerasaun foun sira.

Tanba tuir nia, funturu diresaun jerár Terras Propriedade nian iha jerasaun foun sira, tanba ne’e tenki fo formasaun ne’ebé di’ak ba funsionariu sira hodi bele jere diresaun ne’e ho di’ak iha futuru.

Hafoin hala’o enkontru avaliasaun Diresaun Jerál Terras Propriedades Konvida mós padre hodi fó retiru ba dirijentes nasionais, munisipais no funsionáriu sira ámbitu DGTP nian.*