SETP Aprezenta Diretór DTP Bobonaro ba Prezidente Autoridade

SEKRETÁRIU Estadu Terras Propriedades (SETP) Mario Ximenes, iha loron 14 fulan-Jullu foin lalais ne’e hala’o vizita servisu ba Diresaun Terras Propriedades Munisípiu Bobonaro hodi aprezenta Diretór foun DTP nian ba Prezidente Autoridade Munisípiu Bobonaro.
Iha aprezentasaun diretór Foun Diresaun Terras Propriedades Munisípiu Bobonaro ba Prezidenti Autoridade Bobonaro ne’e SETP husu ba prezidenti autoridade hodi bele taumatan ba iha Diresaun Terras Propriedade Munisípiu Bobonaru, hodi bele iha liña kordenasaun ne’ebé di’ak iha futuru.

Hafoin aprezenta diretór Terras Propriedade Munisípiu Bobonaro ba Prezidenti Autorudade Munisípiu Bobonaro, SETP husu ba diretór foun hodi bele hala’o servisu ho responsabilidade hodi bele hetan fiar hosi komunidade sira.
Nune’e Membru Governu ne’e orienta mós ba iha diretor DTP bobonaro hodi bele fó notifikasaun ba abitante sira ne’ebé okupa uma ho rai estadu tenki hakbesik-an ba iha eskritóriu DTP nian hodi bele halo kontratu arrendamentu.
Ba hirak ne’ebé iha ona kontratu arrendamentu ho Estadu maibé la selu renda ba estadu, tenki fó mós notifikasaun, karik la kumpri husu apoiu autoridade munisípiu nian hodi bele halo despezu administrativu.

Membru governu ne’e hateten, sidadaun sira ne’ebé iha ona kontratu arrendamentu ba rai no uma estadu, tempu ruma estadu iha desizaun katak ema ne’ebé hela iha fatin estadu abandonadu ho tempu naruk bele sai na’in, nune’e mós bainhria estadu preszia ba dezenvolvimentu komun nian ruma hanesan sidadaun tenki kopera.

Iha biban ne’e Diretór Terras Propriedade Munisípiu Bobonaro, Castro Laco Martins aprezenta mós katak, DTP Bobonaro iha funsionáriu nain 5, materiais eskritóriiu nian hanesan komputardór barak mak avaria, tanba ne’e nia husu ba SETP atu harua pesoál Tékniku Informátika DGTP nian hodi bele hadioa hikas sira ne’ebé mak avaria nune’e bele apoiu sira nia servisu ho efetivu liutan.
Iha fatin hanesan Reprezentante Prezidente Autoridade Munisípiu Bobonaro, Ernesto Oliveira Barreto hateten, nia parte hato’o agradesimentu ba SETP ho ekipa, tanba iha konsiderasaun ba autoridade munisípiu nian hodi aprezenta diretór foun Terras nian ba iha Autoridade Minisíu nian sira.

Sekretáriu Munisípiu ne’e hateten, iha futuru autoridade munisípiu sei iha kordenasaun servisu ne’ebé di’akliutan ho diretór Terras Munisípiu nian, tanba tuir nia iha bobonaro dadus disputa rai ás no iha barak mak seidauk rezolve.
Hafoin aprezenta Diretór DTP Bobonaro ba Prezidente Autoridade Munisípiu Bobonaro, SETP ho kometiva hala’o mós vizita ba iha Diresaun Rejistu Notariadu Munisípiu Bobonaro hodi haree besik liutan atendementu públiku diresaun ne’e nian.*

Ananias Babo Horta
Relasaun Públika SETP