REUNIAUN MINISTRU JUSTISA HO EMBAIXADORA PORTUGAL REAFIRMA PRONTIDAUN GOVERNU PORTUGAL KONTINUA APOIU SETÓR JUSTISA TIMOR-LESTE


Dili, MJ: Kuarta (02/06) semana ne’e, Ministru Justisa Dr. Tiago Amaral Sarmento, simu iha audensia Embaixadora foun Portugal nian ba Timor-Leste, Sra. Manuela Bairros, ho adidu Kooperasaun Portugal nian, Sra. Cristina Faustino, iha knar fatin Ministériu Justisa, Rua Colmera, Dili.


Nune’e Sra. Embaixadora husu atu Ministériu Justisa kontinua identifika no elabora sira nia prekupasoen no saida mak Ministériu Justisa presiza husi Portugal, nune’e Portugal bele kontinua fó apoiu ba setor Justisa Timor-Leste nian.


Ministru Justisa, Dr Tiago Amaral Sarmento, agradese ba audensia Sra. Embaixadora nian no ba reafirmasaun Governu Portugal nian hodi kontinua apoiu setor Justisa Timor-Leste.

Sesaun Foto: Embaixadora Portugal ba Timor-Leste Sr. Manuela Bairos (kazaku cokolate klaran karuk) ne’ebé akompaña husi adidu Kooperasaun Portugal iha Timor-Leste Sra. Cristina Fausto (kazaku Metan), Foto hamutuk ho Ministru Justisa, Dr. Tiago Amaral Sarmento akompaña husi Assesor Administrasaun Dr. Tomas M. Correia Dili (02/06).



No Ministru Justisa husu Governu Portugal atu kontinua apoiu Sentru Formasaun Jurídiku no Judisiáriu (SFJJ), Caicoli, ne’ebé hanesan uniku Sentru Formasaun Jurídiku ho kualidade as liu iha Timor-Leste.


Ministru Justisa mós esplika katak agora dadaun Lei Organizasaun Judisiáriu entra em vigor ona no Governu Timor-Leste sei haríi tan Tribunal Primeira Instansia iha Munisípiu tolu no Tribunal Supremu Justisa, inklui Tribunal Rekursu ida, nune’e Timor-Leste sei kontinua presiza apoiu no assistensia Governu Portugal nia liuhusi fó Juíz Konselleiru sira husi Portugal hodi bele apoiu Juíz Timoroan sira.


Aleinde ne’e Ministru Justisa husu mós ba Governu Portugal liu husi ninia embaixadora atu bele renova diskuti akordu billateral kona-ba mobilidade sidadania Tinor-Leste nian iha pais CPLP ne’ebé uluk asina ona, hodi bele addita tan artigu balun kona-ba inklui mós traballador non Skill sira iha akordu refere.


Ikusliu Sra. Embaixadora Manuela Bairos, mós husu ba Ministru Justisa atu komunika ho Ministériu Negosiu Estranjeirus no Kooperasaun (MNEC) hodi hare asuntu refere, nune’e bele elabora akordu foun ida hodi bele fó solusaun ba situasaun sira ne’ebé iha relasaun ho prekupasoen Ministru Justisa nian, liga ba sidadaun Timoroan hirak, ne’ebé agora dadaun tanba problema dokumentus sei iha hela Portugal.

Ministru Justisa Dr. Tiago Amaral Sarmento Simu Embaixadora foun Portugal ba Timor-Leste Sr. Manuela Bairos iha Knar fatin Ministeriu Justisa, Dili (02/06).



Antes ne’e, iha 2019 Ministériu Justisa Timor-Leste asina onan protokolu kooperasaun ho Universidade Coimbra atu haruka Profisionais do foro no konservadores no Notariu ba estuda iha Universidade Coimbra, Portugal, maibe tanba situasaun pandemia global covid-19, halo nune’e lakonsege implementa.


Reuniaun dahuluk entre Ministru Justisa Dr. Tiago Amaral Sarmento ho Embaixadora Portugal iha Timor-Leste, Sra. Manuela Bairos ne’e, akompana mós husi assessor administarsaun Ministru Justisa Dr. Tomas M. Correia no Sra. Cristina Fausto, adidu kooperasaun Portugal iha Timor-Leste.

02 Junu 2022
#Media_Gabinete_MJ