Díli, MJ: Kuarta-feira (08/06) ohin, Ministru Justisa Dr. Tiago Amaral Sarmento, aprezenta ona iha Konsellu Ministrus “ Proposta dekretu-Lei Informasaun Kadastral Predial ” ba Konsellu Ministrus, hodi husu aprovasaun.


Liuhusi deliberasaun Konsellu Ministrus, governu aprova ona dekretu Lei refere, nune’e bele fó biban Ministériu Justisa hodi bele hahu implementasaun lei rai (lei no.13/2017) no prosesu distribuisaun “sertidaun titlu nain ba rai”, ba sidadaun sira ne’ebé, sira nia parselas rai rejistradu ona, no laiha disputa ruma.


Dekretu lei ida ne’e atu regula kona-ba: ezekusaun, konservasaun, atualizasaun no asesu bá informasaun kadastral nian.


Informasoens husi kadastru ne’e kona-ba deskrisaun no kompozisaun fíziku kada prédiu, indikasaun naran nomós identidade titular husi propriedade refere.


Tipu ba levantamento kadastral iha 3:
1. Levantamentu kadastral sistemátiku katak prosesu levantamentu ida ne’ebé planeadu, iha área ne’ebé defini antes ona, lao tuir tempu planeadu no gratuitu.
2. Levantamentu kadastral Esporádiku katak levantamentu ida ne’ebé estadu halo, bazeia bá pedidu husi interessante sira. Bá levantamentu esporádiku sei kobra ou selu emolumentus.
3. Levantamento kadastral Diferidu, katak levantamentu ida halo tamba dadus husi levantamentu ida uluk hatudu katak sei iha problema ou disputa ruma.

Ho aprovasaun Dekretu Lei ida ne’e, hanesan pasu importante ida bá implementa lei rai (lei no.13/2017). Tamba ho diploma kadastru nian, maka sei iha informasoens kona-ba imóvel ida, ho nune’e bele atribui direitu ba ema ida nu’udar nain ba imóvel refere, depois mak lori bá rejistu iha predial, atu nune’e iha serteza legal.


Tuir lei ida ne’e mós, fó kompetênsia bá Ministério da Justiça, liu husi Diresaun Jeral Terras e Propriedades atu halo servisu kadastral nian.


Ho aprovasaun dekretu-lei ne’e, tempu badak Governu sei submete ba Prezidensia Repúblika, hodi hetan promulgasaun husi Prezidente Repúblika, no Ministru Justisa Dr. Tiago Amaral Sarmento espera katak laiha objesaun husi Prezidente Repúblika Dr. Jose Ramos Horta.


08 Juñu 2022
#Media_Gabinete_MJ