Dili, MJ: Kinta-feira (09/06/2022) dader ne’e, Ministru Justisa Dr. Tiago Amaral Sarmento, simu no reuniaun ho koordenador Nasionál Redi ba Rai (RbR), Hortencio Pedro Vieira ho ekipa iha knar fatin Minitériu Justisa, rua Colmera, Dili.

Rede ba Rai mós hato’o kazu sira ne’ebé mak durante ne’e advoka mak hanesan, kazu Caicoli, Sidade Universitariu Aileu, Manleu, Metinaro, Gembel art no problema ka failansu sira husi implementasaun lei ba rai no lei espropriasaun.


Iha reuniaun, Koordenador Nasionál RbR husu mós ba Ministru Justisa atu tau prioridade ba sosializasaun lei ba rai, tamba komunidade maioria mak seidauk komprende Lei ba Rai (Lei Nu. 13/2017). No sira mós prontu atu koopera ho Governu karik iha konfiansa hodi habelar ka desimina lei kona-ba rai nian, ba sidadaun sira.


Inisiativa atu konvoka audensia ida ne’e mosu tamba iha observasaun lubuk ida ne’ebé durante ne’e RbR halo ona relasiona ho politika Rai nian iha periodu tinan hirak ikus ne’e. No mosu diskusaun no atualiza informasaun ba malu entre Rede ba Rai ho Ministru Justisa relasiona ho implementasaun politika Rai sira ne’ebé durante ne’e lao.

Ministru Justisa Dr. Tiago Amaral Sarmento (kazaku), foto hamutuk koordenador Nasionál Rede ba Rai, Hortencio Pedro Vieira ho ekipa, iha knar fatin Ministériu Justisa, Rua Colmera, Dili (09/06).


Ministru Justisa Dr. Tiago Amaral Sarmento apresia no agradese ba RbR no husu atu sira mantein nafatin hanesan Organizasaun non Govermental ne’ebé tau matan ba kestaun rai sidadaun nian.


“Primeiru, hau apresia tebes ba ita boot sira nia servisu, knar no papel importante, Rede ba Rai tenke esforsu an nafatin, mantein nafatin hanesan Organizaasaun non Govermental ne’ebe tau matan ba rai, tanba kestaun rai sidadaun sira nian, presiza ema balun tau matan, sei tilun, rona no hatutan sira nian lian, presiza Sosiedade sivil tenke iha, ita nia papel mak tau matan ba ida ne’e ” . Ministru Justisa husu ba RbR iha reuniaun refere.


“ Durante hau nia mandatu hau apoiu tebe-tebes se ita boot sira mantein nafatin organizasaun ida ne’e, iha Rede ba Rai, hau apoiu Nu’udar Ministru Justisa, Ministru ida ne’ebé tau matan ba asuntu Rai no Propriedades, apoui sosiedade sivil ninia ezistensia, sosiedade sivil ninia papel iha Organizasaun Rede ba Rai ne’e”, akresenta Ministru Justisa.

Ministru Justisa husu mós ba RbR atu halo Komunikasaun, koordenasaun no Kooperasaun ne’ebé diak ho Ministériu Justisa ou bele mós diriji direta ba Ministru Justisa.


“ Nu’udar Ministru Justisa hau husu RbR atu : Primeiru, bele komunika ba malun lais, komunika ba malun para ita buka solusaun, tanba sidadaun sira infrenta problemas rai barak tebes, Ministru Justisa husu ba RbR atu bainhira iha problemas ruma haruka kedas karta mai iha Ministru Justisa para ita bele hatene lolos kona-ba kazu sira ne’e, e tanba rekursu humanu iha servisu Terras e Propriedades e Servisu kadastrus Menus tebes
”, esplika Ministru Justisa.

Ministru Justisa Dr. Tiago Amaral Sramento simu no reuniaun ho koordenador Nasionál Rede ba Rai, Hortencio Pedro Vieira ho ekipa, iha knar fatin Ministériu Justisa, rua Colmera, Dili (09/06).


Aleinde ne’e, Ministru Justisa hato’o mós kona-ba progresu servisu ne’ebé Ministru Justisa halo ona no esforsu sira atu bele atribui titulu nain ba rai, ba Komunidade sira hotu iha tinan ida ne’e no fó prioridade ba regulariza propriedade estadu sira.

09 Juñu 2022
#Media_Gabinete_MJ