Dili, Hahú husi loron ohin, Terça-Feira 22 Abril 2014, ekipa tekniku sira husi Direcção Naçional de Assessor Jurídica e Legislação (DNAJL) Ministériu da Justisa (MJ) komesa halo dizeminasaun konaba Lei Exekusaun Pena ba Guarda Prizaun sira. Programa ida ne’e ho objetivu prinsipal rua (2) maka atu sosializa konteudu husi Lei Exekusaun Pena ne’e ba Guarda Prizaun sira hanesan entidade prinsipal ba implementasaun lei refere nomos objetivu seluk maka atu prepara didiak Guarda Prizaun sira molok atu tama ba prosesu rekualifikasaun ba vaga guarda prizaun ninian.

Direitor DNAJL, Nelinho Vital informa iha abertura katak : “prosesu ba hakerek Lei Exekusaun Pena ne’e, liu husi prosesu ida naruk tebes, durante tinan 4 nia laran no ikus mai iha fulan Abril 2014 mak foin hetan aprovasaun husi S.Exa. Presidente da Republika. Guarda prizaun sai hanesan autor prinsipal ba implementasaun lei refere. Tamba ida ne’e, persiza duni iha formasaun ida diak no sufisiente ba Guarda Prizaun sira. Ho nune’e, DNAJL sei hatun equipa jurista Timor-oan sira, atu mai halo sosializasaun ba lei ida ne’e, ne’ebe tuir planu sei remata iha semana dahuluk fulan Junhu 2014”.

Iha sorin seluk, Direitor Diresaun Nasional Servisu Prizaun no Reinsersaun Sosial (DNSPRS), Helder Cosme, ne’ebe halo abertura ofisial ba formasaun ne’e hatete katak, “formasaun ida ne’e importante tebes hodi prepara Guarda Prizaun sira molok tama ba rekualifikasaun. Hanesan ita hotu hatene, iha semana kotuk, Guarda sira remata ona formasaun fiziku nian no agora formasaun material ninian no ikus mak teste saude. Parte tolu ne’e mak sei determina, ema ne’e bele sai duni Guarda Prizaun lolos hodi submete tuir Estatuto Guarda Prizional ninian”.

Tuir planu, ba formasaun ida ne’e sei fahe ba turma hamutuk 10, ne’ebe kada turma sei iha ema/guarda prizaun 16-20. Dizeminasaun ida ne’e sei hala’o loron-loron durante fulan 2 nia laran, iha Centro Formasaun Establesimento Prizional Becora nomos Gleno-Ermera ninian. Atu fasilita dizeminasaun ne’e ho diak, liu husi DNAJL ne’ebe servisu hamutuk DNSPRS fáhe ona lei refere ba Guarda Prizaun sira semana ida antes no lei refere tradus ona ba lian Tétum husi Departamentu Tradusaun.
(Mize Correia/DNAJL)