Konsultasaun publiku ba proposta lei apoio judisiariu datolu halao iha distrito Cova Lima

Ministériu Justisa liu hosi Direcção Nacional Assessoria Legislação e Jurídica no Direcção Nacional de Direitos Humanos e de Cidadania hala’o konsultasaun públiku proposta lei apoio Judisiariu datolu iha distrito Cova Lima, 16 Juñu 2010 iha salaun administrasaun distrito.

Konsultasaun ne’e nu’udar konsultasaun datolu ho nia alvu audiensia, autoridades distritál, PNTL, administradór sub-distrito, autoridades lokais sukus no autoridade tribunais ho total partisipantes iha eventu ne’e ema besik 100.

Administradór distrito Cova Lima, Inacio Pires da Silva iha nia abertura hateten,” tuir convite ne’ebe ami simu hosi ekipa organizador minsterio Justisa 200, maibe realidade ema ne’ebé partisipa iha ne’e la to’o 50%, bain bain ami infrenta problema hodi mobiliza, tamba situasaun mak ida ne’e duni. Maibe nu’udar administrador distrito hato’o agradese ba partisipantes, tamba maske udan boot no do’ok hosi distrito maibe oferese imi nia tempu hodi partisipa iha konsulta ida ne’e.”

Iha abertura ne’e Director Direcção Nacional de Direitos Humanos e de Cidadania, Celito Cardoso iha abertura hateten,” Depois ukun rasik-an ita infrenta defisil atu asesu ba tribunal, neduni ministériu Justisa halo esbosu lei proposta apoio judisiariu ida neé ho objectivu atu suporta ba ema ne’ebé kbi’it laek sira hodi hetan asesu ba justisa. Neduni ohin halo konsultasaun ida ne’e hodi husu ita boot nia sira nia apoio atu halo lei ida ne’e .”

Konsultasaun ne’e realiza tamba servisu hamutuk entre Direcção Nacional dos direitos Humanos e de Cidadania (DNDHC) no Direcção Nacional Assessoria Legislação e Judísiario (DNAJL) no hetan apoiu orsamentu hosi organizasaun The Asia Foundation.

Nu’udar fasilitadór ba programa ne’e mai hosi ekipa direcção rua mak DNDHC, Direcçtór Dr. Celito Cardoso ho nia ekipa , Direcção DNAJL, Director Dr. Francisco Vasco Soares ho ekipa no The Asia Foundation nu’udar doador ba programa ne é durante hala’o prosesu konsultasaun iha distrito. João Mp. da Costa/DNDHC