DILI-Primeiru Ministru (PM) Kay Rala Xanana Gusmão ho nia homologo PM Portugál, Pedro Passos Coelho, Sesta (25/7) foin lalais ne’e halo lansamentu ba projetu Sistema Nasionál Cadastro (SNC).
Ministru Justisa Dionisio Babo hateten, implementasaun projetu SNC ne’e atu halo levantamentu ba rai hodi hatan data sira ba sistema moderno ho teknolójia foun.

Iha lansamentu ne’ebé hetan partisipasaun hosi PM portugál ho nia membru governu sira inklui mós PM Timór-Leste ho nia membru Governu sira ne’e Babo hateten, Timoroan sira ne’ebé tuir formasaun hodi integra iha projetu ne’e hamutuk nain 150 no tuir planu iha futuru Timoroan hirak ne’e sei hala’o servisu iha Sekretariu Estadu Terras no Propriedade nia okos hodi haree liu ba kestaun rai nian.

Lansamentu ne’ebé hala’o iha edifisiu SNC Kintál Boot ne’e Tuir Babo, durante tempu okupasaun Portugés to’o agora, TL seidauk iha Sistema Cadastro Nasional. Nune’e, Konselhu Ministru aprova projetu Sistema Nasional Cadastro (SNC) hodi implementa iha TL ho durasaun tinan 6 atu bele halo levantamentu dadus kona-ba parsela rai hira maka iha teritoriu TL.
“Sira nia servisu mak atu halo levantamentu hodi garante dezemvolvimentu ba rai iha nasaun Timór-Leste. Imi hatene durante tempu portugés to’o agora ita seidauk iha sistema cadastro hodi akumula dadus kona-ba rai iha TL,” dehan Babo.

Nia parte husu ba Timoroan tomak atu kopera no servisu hamutuk ho ekipa SNC hodi fó informasaun loloos, kona-ba rai iha teritoriu TL.

Tuir Ministru Dionisio Babo nia haree katak, implementasaun projetu SNC ne’e fo benefisiu ba povu atu bele hetan sertifikasaun ba rai.

Iha fatin hanesan Sekretáriu Estadu Terras Propriedades (SETP) Jaime Xavier Lopes husu ba funsionáriu SNC nian atu tuir regulamentu iha kompaña ne’e iha, labele atu servisu tuir idaidak nia hakarak.

Hanesan Kordenadór Projetu Sistema Nasional Cadastro (SNC), Jorge Serrano hateten, projetu ne’e realiza tanba servisu hamutuk entre kompañia Grupo Média Nasionál (GMN) ho kompania Holding Arm Apprize hosi Portugál nian hodi halo levantamentu kadastrais iha distritu sira.

“Projetu ne’e la’o ona agora ita halo deit lansamentu ofisiál hodi intrega mós kareta unidade 12 ba ekipa sira hodi bele ba hala’o servisu iha distritu 12 ne’ebé dook hosi Díli hodi bele halo levantamentu ba kadastro iha TL,” dehan Serrano.

Nia fó garantia katak, projetu ne’e sei la’o durante tinan 6, maibé esperansa makas katak tinan 4 resin prosesu levantamentu bele remata ona.*

Ananias Babo Horta
Media Officer SETP