MJ fo Formasaun ba Autoridade lokál iha Distritu Cova Lima

Ministériu Justisa (MJ) liu husi Diresaun Nasionál ba Direitus Umanus no Sidadania (DNDHC) halao programa formasaun ba autoridade lokál sira hanesan profesores, grupu feto, autoridade lokál, juventudi sira, konfisoins relijioza no membru Polísia Nasionál Timor-Leste (PNTL). Programa ne’e hala’o tuir Planu Asaun Anuál (PAA) tinan 2014. Formasaun ne’e hala’o ba ema nain 40 iha Sub-distritu Fatululic Distritu Cova Lima iha loron 12 no 13 fulan Agostu 2014.

Francisco X. Vasco Soares ne’ebe reprezenta Diretór DNDHC iha sesaun abertura hateten katak Programa ne’e halao bazeia ba PAA tinan 2014 ne’ebé planea ona, tinan ida ne’e Ministériu Justisa halao ninia programa iha Distritu Cova Lima, ho objetivu atu hasa’e konsensia sidadaun sira hodi respeita valór prinsípiu direitus umanus.

Administradór Sub-distritu Fatululic, Vitorino do Carmo iha abertura hateten,“ agradese ba Ministériu Justisa, tanba bele mai to´o ami nia sub-distritu hodi bele fó koñesementu kona-ba hasae ami nia konsiénsia ba komunidade iha área rural no ami presiza tebes atu hatene kona-ba informasaun sira ne’ ebe relasaun ho direitu umanus.”

Iha programa formasaun ba komunidade ne’ e Administradór hatutan tan dehan “ programa hansan ne’ e bele halao mós ba komunidade suku sira kada fulan tolu nia laran.”

Hafoin remata treiñamentu durante loron 2 partisipante sira simu kedan sertifikadu husi komisaun organizadora husi DNDHC ne’ebe representa Ministéiu Justisa. Tuir planu, programa hanesan tuir mai sei halao iha Sub Distrtu Iliomar, Distritu Lautem.

Carlos Gonçalves Dias
Offisiál ba Dokumentasaun