DNAJL HALO KONSULTA PUBLIKU BA PROPOSTA LEI KONABA KODIGU REJISTU SIVIL HO KOMUNIDADE IHA BAZE

Baucau, Kontinuasaun husi programa konsulta publiku ba proposta Lei Codigo Registo Civil (CRC), Governu Timor Leste liu husi Ministeriu Justisa (MJ), Direção Naçional de Assessor Jurídica e Legislação (DNAJL) hala’o iha Municipio Administrativo Lautem, Manatuto no Baucau, hahú husi loron 14-17 Outubro 2014.

Konsulta publiku ne’ebé hetan partisipasaun maioria husi Xefe Suco sira ne’e, hala’o tamba iha koordenasaun diak entre DNAJL ho DNRN liu husi Konservador Registo Notariado Munisipal 3 refere. Konsulta publiku ba faze ida ne’e, lidera direitamente husi Xefe Dep. Politika Lejislativa, DNAJL nian, Sr. Evangelino Belo.

Durante konsulta publiku ne’e, kontinua sai nafatin prekupasaun husi komunidade sira maka konaba kazamentu menoridade.

Iha pontu ida ne’e, sai polemika maka oin nusa atu fó sansaun ou iha kastigu ruma ka lae ba ema ne’ebé ho idade ki’ik (menor), maibe hola-malu ona? Aleinde ne’e, iha nafatin diskusaun nian maka konaba distansia ne’ebé nomos menus infrastrutura atu fasilita lalais prosesu registu ba bébé ne’ebé foin moris, atu nune’e la bele hetan multa, tuir proposta lei ne’e haruka.

Pontu importante seluk ba diskusaun nian maka konaba oin nusa atu rejistu labarik sira ne’ebé moris husi aman deskonhesidu nomos oan husi kauza insestu nian.

Hatan ba prekupasaun hirak ne’e, ekipa legal DNAJL nian, ne’ebé xefia husi Evangelino Belo, katak prekupasuan sira ne’e sai hanesan idea no opiniaun ida ne’ebé pertenente duni atu diskuti hamutuk iha ekipa legal nian, hodi tetu didiak, molok hasa’i versaun final ba proposta lei refere.

Tuir ajenda, konsulta publiku ba proposta lei CRC ne’e, iha semana oin mai sei hala’o ba Municipio Administrativo Aileu no Liquiça, tuir fali ba Ainaro no Manufahi molok ba termina iha Oecusse, iha fulan oin mai.




(Mize Correia/DNAJL)