Maliana- Sekretáriu Estadu Terras Propriedades (SETP) Jaime Xavier Lopes ho Vise Ministru Justisa Ivo Jorge Valente iha loron 23 fulan-Outubro 2014 foin lalais ne’e hala’o inagurasaun ba edifisiu foun DTPSC Munisipiu Bobonaro.

Iha inagurasaun ne’e SETP husu ba diretór ho nia funsionariu sira hodi bele hala’o sira nia knar halo di’ak iha edifisiu foun ne’ebé maka foin hetan inagurasaun.

Jaime hateten, edifisiu foun ne’e hanesan uma-lulik terras propriedade nain iha Munisipiu Bobonaro, ho ida ne’e hanesan funsionariu ne’ebé di’ak tenki fó atendementu ne’ebé maka di’ak ba iha komunidade sira.

Nia salienta mós edifisiu terras propriedade ne’e hamriik tanba hetan mós kontribuisaun ne’ebé boot hosi komunidade inklui mós autoridade lokál no intelektual distritu bobonaro nian, ho ida ne’e husu ba komunidade sira bainhira iha problema ruma kona-ba rai tenki habesik aan ba iha Edifisiu Terras Propriedade hodi bele rezolve.

Iha inagurasaun ne’ebé hetan mós partisipasaun hosi Xefe Gabinete SETP, Reprezentante Diretór Nasionál Terras Propreidade, Reprezentante Diretór Nasionál Administrasaun Finansas MJ nian ne’e hahu ho assina plaka hosi Vise Ministru Justisa no ko’a pita hosi SETP no fo-bensa hosi Amu Paroco Maliana.

Iha fatin hanesan Vise Ministru Justisa, Ivo Jorge Valente lori Ministru Justisa nia naran hato’o agradesementu ba iha parte hotu ne’ebé fó sira nia suporta hodi harii edifisiu foun iha Maliana, no hato’o mós agradesementu ba iha kompaña ne’ebé maka kaer obra tanba bele rama servisu ho di’ak no responsablidade.

Ivo husu ba dirijente no funsionáriu terras propriedade Bobonaro nian hodi bele hala’o sira nia knaar ho loloos, nune’e mós tenki hatudu sira nia maturidade nundár funsionariu Publiku hodi bele fó atendementu ne’ebé di’ak ba iha komunidade sira hotu.

Iha fatin hanesan Administradór distritu Bobonaro hato’o mós ninia agradesementu ba iha partisipante sira ho Kompaña Maleaka Unipessoal Lda. Ne’ebé maka hala’o konstrusaun ho duransan tempu tinan 1 fulan 4, ho nia total orsamentu US$334 mil. No obra ba konstrusaun ne’e tama iha Planu Dezenvolvimentu Distritu II.

Iha fatin hanesan Diretór Terras Propreidade Munisipiu Bobonaro hato’o ninia agradesementu ba iha parte hotu neebe maka fo nia kontribuisaun ba iha konstrusaun edifisiu DTPSC.

Hanesan utilizadór dirizente ho funsionariu sira sente kontente, tanba ho edifisiu foun bele fó mós esperitu ne’ebé foun no resonsablidade ne’ebé boot. Ho edifisu foun komunidade sira hein hela atendementu hosi funsionariu sira ho di’ak, tenki hatudu maturidade servisu ba iha komunidade sira nune’e labele hafo’er naran instituisaun nian.

Diretór ne’e husu ba Vise Ministru no SETP atu bele tau-matan nafatin ba iha edifisiu foun ne’e tanba edifisiu ne’e presiza kompleta materiál edifisiu nian sira ne’ebé maka sei falta, nune’e mós rekursu umanu, tanba edifisiu foun maibé sei falta rekursu umanu, no husu hodi bele hasa’e kualidade no kuantidade funsionariu sira nian liuhosi formasaun.*