Municipio Liquisa / Maumeta, Vise Ministro Justisa Ivo Valente hamutuk Ministru Justisa Dionisio Babo, SETP Jaime Xavier Lopes, ho diretores nasionais, chefe departemento no funsionarius iha ambito Ministériu Justisa tomak, loron 22 – 12 – 2014, loron ida tomak, halao Retiru iha salaun Tokodede Center, Municipio Liquisa, parte oeste hosi Dili, partisipasaun ba abertura / loke hosi auturidade lokais iha Municipio Liquisa.

Media officer Gabinete Vise Ministru Justisa kobre durante loron ida tomak, akompanha atividade diarias, nebe halao observasaun ba pontus de reflesaun importante sira nebe Ministériu Justisa halao ona iha tinan 2014, identifika erros, desafius, desvantagems sira nebe satan hela servisu sira iha Ministériu ida nee, hare mos oinsa hametin servisu iha Ministériu Justisa ba futuro oin mai.

Vise Ministru Justisa Ivo Valente, hodi Ministru Justisa nian naran oficialmente halo abertura / loke Retiru ho topiku : Enkontru Alargadu Konsellu Konsultivo Ministériu Justisa, hatoo nia intervensaun ba abertura koalia iha tinan oin mai sei hadia buat balu iha Ministériu nia laran.

Vise Ministru Justisa Ivo Valente rekonese mos katak diretor Municipio sira sei falta buat barak maka hanesan material sira ba servisu nian, nune mos transporte nebe maka atu fasilita funsionarius sira nian servisu. Lori Ministru Justisa nia naran hakarak hatoo agradesementu ba funsionarius hotu Ministériu Justisa nian, tamba ho funsionarius sira nian esforsu AN maka servisu Ministériu nian bele lao ba oin.

Ema nebe atu avaliasaun ba servisu funsionarius sira nian servisu, laos ita nebe servisu hamutuk, maibe ita nia atendementu ba komunidade sira maka diak tamba sira maka sei fo avaliasaun ba iha funsionarius sira. Tamba komunidade sira maka hanesan ema nebe senti direitamente atendementu funsionarius sira nian.

Vise Ministru Justisa Ivo Valente husu ba chefe departementu sira atu halo avaliasaun servisu ba funsionarius sira, bele hatene saida maka nia halo ona no hetan sucesso iha tinan ida nia laran, no saida maka seidauk halo no persiza atu halao fali iha tinan hira tuir mai.

Iha fatin refere Vise Ministru Justisa Ivo Valente, apreciasaun ba dirasaun hitu (7), iha Ministériu Justisa. Koalia mos lalaok servisu iha ambito Ministériu Justisa durante tinan ida nian laran nebe hasoru desafius oin – oin, liu – liu konaba ba Administrativos, nebe sai responsabilidade ka knar ba Vise Ministru Justisa nian. Vise Ministru Justisa, Ivo Valente mos sei fo oportunidade ba dirasaun hotu – hotu atu hatoo sira nian sugestao durante sira hasoru iha tinan ida tomak.

Inspector GIA Hendrique Oliveira hatoo nian intervensaun konaba tekniku Administrativos nebe durante hosi GIA halao inspectasaun auditoria ba dirasaun tomak Ministériu Justisa nian. Inspector GIA halo ona planu ba investigasaun auditoria ba tinan 2015. Enkontru durante oras 8 nian laran ho diskusaun diak ho kompresaun barak no sulusaun diak hodi Ministériu Justisa ba iha futuro diak.

Antes atu remata enkontru konsellu konsultivo, SETP Jaime Xavier Lopes sei hatoo resumu / konklusaun ba diretores no chefe departementu nebe tuir iha enkontru nee. Resultadu ba apresentasaun hosi dirasaun hitu (7), hatudu progresu lubun ida, Ministériu Justisa atinji ezekusaun orsamentu, 90 too 100 %, signifika implementasaun planu lao ho diak no sucessu iha tinan 2014.

Maske hasoru desafius barak hanesan: Rekursus Umanus, Seidauk iha Lei hodi difini titulu Nain ba Rai, Orsamentu limitadu, Falta ekipamentu no transporte etc.

Ikus liu Ministru Justisa Dionisio Babo, halo encerementu ba enkontru konsellu konsultivo, ho nian intervensaun akresenta ba funsionarius Ministériu Justisa tomak tenki hadok AN hosi hahalok la diak, maibe tenki servisu hamutuk no fo apoiu ba malu iha tempo servisu, fo mos parabens ba funsionarius Ministériu Justisa halao ona servisu ezekusaun orsamentu 2014 ho diak no sucessu.
Jantar hamutuk no divertimento.