Dili, MNEC, Ministru Justisa Ivo Valente partisipa iha aniversáriu Komisaun Anti Korrupsaun (KAK) ba dalimak (5) iha loron 22 fulan-Fevereiru 2015 ne’ebé mak hala’o iha Salaun Ministériu Negosiu Estrajeiru no Kooperasaun (MNEK).

Iha aniversariu KAK ba dala 5 ne’e, partisipa hosi membru VI Governu Konstitusionál, ho tema sentrál mak: Kombate Korrupsaun Hosi Perspetiva Legal.

Aniversáriu KAK partisipa oradór ho panelista lubuk ida mak hanesan; Presidente Tribunal Rekursu Guilhermino da Silva, Prokuradór Jeral da Repúblika Jose Ximenes, Provedór Direitus Umanus no Justisa (PDHJ) Silveiro Baptista Pinto no mós Presidente Komisaun A Parlamentu Nasionál Carmelita Moniz. Aliende oradór sira hato’o sira-nia pontu de vista kona-ba “oinsa” kombate korrupsaun, iha biban ne’e mós KAK halo aprezentasaun ba servisu KAK nian durante iha tinan 5 nian, aprezenta atividade sira no mós konsulta publika iha territoriu Timor-Leste tomak.

Iha nia diskursu, Komisáriu KAK Adérito António Pinto Tilman hato’o agradesimentu no apresiasaun ba bainaka-sira ne’ebé marka prezesa iha fatin ne’e, atu tuir seremônia ne’e to’o rohan, nune’e bele hetan esperiénsia hosi oradór sira-nia matenek. Esplika mós kona-ba objetivu aniversáriu ida ne’e hanesan meius ba KAK hodi hala’o mós kampaña Anti Korrupsaun iha Timor-Leste.

Iha mós intervensaun badak hosi Provedór PDHJ Silveiro Pinto ne’ebé akresenta barak liu kona-ba lalaok servisu boa governasaun, nune’e mós fó ninia apresiasaun balun ba iha servisu no investigasaun lubuk ida ba V Governu Konstitusionál.

Ikus liu, intervensaun hosi Sua Excelénsia Primeiru-Ministru Dr. Rui Maria Araújo hatete katak, iha Governu ida nee fo apoiu tomak ba servisu KAK nian hodi kombate korupsaun tamba nee se mak pratika korupsaun nee hanesan risku boot ida maske seidauk aker toman no laiha toleransia ba se deit mak halo korupsaun kuandu iha evidensia nebe mak forte, dehan Premeiro Ministru.

Hau servisu ohin halo loron hat (4), maibe iha buat todan bo’ot ida mak hau hodi, iha aniversáriu KAK ba dala 5 ne’e, primeira vez hau halo abertura ba seremônia ida ne’e, hau hakarak fó hau-nia parabens ba servisu KAK nian durante ne’e, hosi imi-nia servisu maka’as hahu hosi primeiru Komisáriu KAK to’o Komisáriu agora Adérito António Pinto Tilman. Korrupsaun iha impaktu bo’ot no afeta ba povu mukit sira, korrupsaun sei fó obstakulu bo’ot ida ba dezevolvimentu nasaun, no povu sei sofre maka’as, hodi dehan korrupsaun iha Timor-Leste sei ladiak ema hotu-hotu nia moris.

Seremônia ba aniversário KAK ba dala 5 ne’e, termina ho kúa bolu, loke champainha no almosu hamutuk ho membru VI Governu Konstitusionál.