Dili, loron 04 fulan-Marsu 2014, Ministru Justisa Ivo Valente ho Sekrétariu Estadu Terras no Propriedade (SETP) Jaime Xavier Lopes simu Vizita hosi UNE-TL (Uniaun Nasionál Eskuteiru Timor-Leste) iha Ministériu Justisa.

Ekipa UNE-TL lidera hosi Presidente UNE-TL Idelta Maria Rodrigues, kompostu hosi Komisária Eskuteiru Internasionál, Komisáriu Ezekutivu Nasionál no Komisáriu Rejionál-sira.

Ministru Justisa Ivo Valente hato’o ninia apresiasaun ba Presidente UNE-TL ho ninia ekipa katak, “hau apresia ho ita-bo’ot sira-nia vizita ne’e hodi hasoru hau ne’ebé mak toma konta ba Ministériu Justisa.

Hanesan Ministru Justisa, sente abertu ba Eskuteiru Timor-Leste iha prosesu dezenvolvimentu karáter no personalidade foinsae-sira nune’e kontribui ba dezenvolvimentu nasionál.”

Iha tempu hanesan, Idelta Maria Rodrigues hato’o ninia apresiasaun ba Ministériu Justisa kona-ba kooperasaun servisu diak tebes durante ne’e, maske nune’e hau hakarak hateten mós katak sei iha buat balun seidauk hetán solusaun, por ezemplu espasu ba Konstrusaun Sede Nasionál Eskuteiru Timor-Leste.

Tanba-ne’e, ami husu ba Ministru Justisa atu eskoilla fatin ruma ba ami hodi komesa hari’i sede hodi nune’e iha espasu ba funsionamentu UNE-TL nian.

Iha biban ne’e mós, Idelta Maria Rodrigues ho ninia ekipa aprezenta mós programa UNE-TL, atividade sira mak la’o durante ne’e, no informa ba Ministru Justisa kona-ba planu involvimentu UNE-TL iha Jamboree Internasionál iha Japaun iha tempu besik mai.

Presidente UNE-TL husu ba Ivo Valente atu sai Membru Honoráriu/ Konsileiru UNE-TL. Responde kestaun ne’e, Ivo Valente agradese tanba UNE-TL konvida ona nia hodi foti parte iha prosesu dezenvolvimentu eskuteiru Timor-Leste.

“Hau sempre fó apoiu ba esforsu diak sira ne’e, tanba hanesan Timor-oan no Ministru Justisa sei fó apoiu tomak ba futuru diak ita-nia foinsae no nasaun doben Timor-Leste,” promete Ivo valente.

Iha fatin hanesan, Presidente UNE-TL mós husu ba SETP Jaime Xavier Lopes atu foti parte mós Membru Honoráriu UNE-TL, hanesan mós ho Ministru Justisa, SETP Jaime Xavier Lopes mós afirma ninia disponibilidade nu’udar Membru Honoráriu UNE-TL.

Jaime Xavier Lopes mós fó hatene katak, “ohin ita-hotu eskoilla ona fatin propiu ba Sede UNE-TL, tanba ne’e, hau husu ba Komisáriu Ezekutivu-sira atu submete lalais pedidu arendamentu ba SETP iha semana ne’e nia laran.”

Depois de enkontru, Ministru Justisa, SETP no Membru Ezekutivu UNE-TL hasai foto hamutuk.