Ministériu Justisa liu husi Diresaun Nasionál Direitus Umanus no Sidadania (DNDHC) no Diresaun Nasionál Rejistu Notariadu (DNRN) halo divulgasaun Lei iha Postu administrative Ossú, munisipiu Viqueque iha loron 13 fulan Marsu tinan 2015.

Iha abertura administradór postu Ossú, Candido Henrique da Silva hateten,” iha postu Ossú dala ruma ita nia lia nain sira tesi lia la los karik, ohin ita hotu ne’ebé partisipa iha ne’e atu rona ho didiak kona-ba saida mak Ministériu Justisa mai divulga ba ita iha Ossú kona-ba lei.

Nune’e mós ba estudante sira, imi ne’ebé nu’udar futuru ba nasaun ne’e rona ho didiak, hafoin sai husi fatin ne’e bele fahe mós buat ruma ba inan aman sira ne’ebé la mai iha eventu ida ne’e.”

Diretór DNDHC, Celito Cardoso iha abertura koalia ba komunidade ne’ebé nakonu iha merkadu Munisipiu Ossú ne’e hateten,” Ministru Justisa delega hau ho kolega sira hamutuk ekipa ida mak mai iha Ossú hodi sosializa lei, ho objetu atu habelar informasaun ba komunidade hodi hatene kona-ba lei ne’ebé oras ne’e implementa ona iha ita nia nasaun Repúblika Demokrátika Timór-Leste atu hodi asegura paz no dezenvolvimentu.

Normalmente ami halo programa hanesan ne’e iha fatin hotu iha munisipiu 13 nia laran hodi haklaken informasaun ba komunidade hotu hodi hatene.”

Diretór Rejistu Munisipiu Viqueque iha apresentasaun matéria hateten,” ema hotu hotu iha direitu atu hetan dokumentu ida liu husi rejistu, tanba rejistu moris ne’e mak aktu ofisiál ba rekoñesimentu husi Estadu RDTL kona-ba ema nia moris.

Rejistu moris ne’e importante hodi rekoñese katak ema ida moris no pretense ba familia no komunidade ida hodi asegura ninia direitu, rejistu hodi garante ema nia nasionalidade, nune’e mós hodi bele fasilita ema nia otas ho lolos hodi hatene ema nia identidade lolos.”

Iha programa divulgasaun ne’e komunidade ne’ebé partisipa besik ema nain atus tolu (300) ne’e liu husi sesaun husu no hatan tuir observasaun hakerek nain hatudu katak komunidade barak liu mak preokupa ho lei kona-ba nain ba rai no hato’o sira nia kestaun kona-ba problema rai no uma okupa iha munisipiu Viqueque.

Tuir fali komunidade kestiona kona-ba oinsa prosesu atu hetan dokumentu legal sira hanesan sertidaun moris, sertidaun óbitu, kartaun Billete Identidade (BI) no Passaporte.

Ekipa divulgasaun iha Postu Administrativu Ossú Munisipiu Viqueque kompostu husi: Diretór DNDHC, Celito Cardoso, Diretór Rejistu Munisipiu Viqueque, Rogerio, Domingas de Oliveira, José Paulino Dias Ximenes, Francisco Vasco Soares no representa Diretór Terras Munisipiu Viqueque, Joao.

João Maupelo da Costa
Ofisiál Relasaun Públika