Dili, Ministru Justisa Ivo Valente hamutuk ho Funsionáriu públiku Ministériu Justisa nian tuir Retiru Páskoa loron-sorin iha Salaun Rejistu Notariadu (DNRN) Bebora, iha loron 20 fula-Marsu 2015.

Depois-de retiru kontinua ho misa ne’ebé prezide hosi Padre Juvito Soares no remata iha tuku 06:30 lokoraik. Atividade retiru Páskoa ida ne’e, hahu iha tuku 02:00 lokoraik, Padre Juvito Soares fó oportunidade konfessa ba funsionáriu Ministériu Justisa tomak, iha ninia homilia Padre Juvito fó hanoin ba funsionáriu públiku ho nia família tomak atu prepara án hodi simu Loron Páskoa ho klamar mo’os.

Ministru Justisa Ivo Valente iha ninia mensajem Páskoa hateten ba funsionáriu tomak katak, “Loron Páskoa nu’udar loron sakrifísiu, no Nai Jesus Cristo hatudu duni ninia sakrifísiu ba ita ema salan-nain hotu, hau husu ba imi-hotu hodi internaliza homilia ne’ebe ohin Amo Lulik fó mai ita hodi prepara an ba Loron Páskoa. Hanesan sarani-oan tenke haktuir mós dalan Nai Jesus nian ne’ebé hatudu mai ita, sakrifísiu, ita-nia sakrifísiu mak tenke servisu maka’as liu tan ba povu timor-oan nia moris diak, badinas hatu’ur justisa ba timor-oan tomak, hakribi salan no hábót espíritu damai kristaun nian iha ita-nia moris lor-loron.”

Wainhira remata Retiru Páskoa, Padre Juvito Soares entrega prenda ba Ministru Justisa, SETP Jaime Xavier Lopes no Diretora Nasionál DNRN Fatima de Araújo.

Partisipa iha Retiru Páskoa ne’e mak Diretór-Jeral, Inspetór-Jeral, Diretór Nasionál sira, Xéfi Departementu sira no funsionáriu tomak iha ámbitu Ministériu Justisa.