SAME – MUNISÍPIU MANUFAHI, Kuarta-Feira, loron 15 Abril 2015, S.E. Ministru Justisa Ivo Valente halo inspesaun urjénti ba Konservatóriu Notariadu no Rejistu Sivíl Ministériu Justisa iha Munisípiu Manufahi.

Inspesaun urjénti S.E. Ivo Vatente nia objetivu mak atu hare’e besik servisu notáriu nian, liu-liu atendimentu públiku BI, tratamentu sertidaun nascimentu, etc.

Alem-de hare’e tuir atendimentu públiku, hodi asegura katak prezensa funsionáriu sira iha tempu servisu nian, rona situasaun servisu funsionáriu sira, hare’e mós fasilidade apoiu ba servisu, prosesu lala’ok atendimentu ba povu, absénsia funsionáriu no sistema arkivu ba dokumentu notáriu nian.

Iha inspesaun ne’e, Ministru Justisa vizita sala ida-idak, hahu hosi fatin servisu Diretór Konservatóriu Notariadu Manufahi no husu kona-ba “oinsá” ninia servisu, ema hirak mak lor-loron mai halo tratamentu dokumentu sivíl no dezafiu sira mak Diretór hasoru durante ne’e.

Iha oportunidade ne’e mós, Ministru ba hare’e kuadru absénsia ba funsionáriu nian lor-loron, hodi husu mós funsionáriu sira nia servisu iha atendimentu públiku nian, hare’e data-entry iha livru no husu kondisaun komputadoria, sistema arkivu no fasilidade sira hodi apoiu ba servisu lor-loron nian.

Alem-de hare’e besik situasaun servisu Konsevatóriu Munisípiu, Ministru Justisa Ivo Valente informa mós ba Diretór Konservatóriu no nia funsionáriu sira katak, Ministériu Justisa agora fó prioridade ba atendimentu públiku nian, ita sei halo alargamentu no instalasaun ba tratamentu BI iha munisípiu hotu.

Iha tinan oin (2016), sei fó biban orsamentu hodi instala mós mákina produsaun BI iha Manufahi, ita mós tenke iha formulariu disponível ba rejistu sivíl nian hodi nune’e populasaun Manufahi la-presiza atu ba to’o iha Dili hodi trata no hetan sira-nia dokumentu.

Hodi hákotu ninia vizita no inspesaun, Ministru Justisa Ivo Valente fó nia apresiasaun ba servisu maka’as Diretór Konservatóriu Notariadu Munisípiu Manufahi ho ninia funsionáriu tomak.

Hau husu ba imi-hotu, funsionáriu sira no dirijénti Ministériu Justisa iha ne’e atu servisu didi’ak bá, atende di’ak ita-nia povu sira, tane pontuálidade servisu.

Wainhira iha kestaun balun ne’ebé nessesáriu hodi hetan apoiu urjénti, halo favór hato’o proposta ba Diretóra Nasional Notariadu no Rejistu Sivíl Maria Fatima de Araújo, nia sei enkamiña mai hau no hau sei buka meius hotu-hotu atu solusiona.