DILI, Tersa-Feira, loron 21 Abril 2015, Ministru Justisa Ivo Valente prezidi reuniaun nivél dirijente ministériu hodi fó orientasaun no entrega dokumentu Orsamentu Rektifikativu Ministeriu Justisa tinan sivíl 2015 ne’ebé mak hetán ona promulgasaun hosi S.E. Presidente da Repúblika iha Sala Reuniaun Ministériu Justisa.

Reuniaun ida ne’e partisipa hosi Defensór Públiku Jerál Sergio Hornai, Diretór Jerál Interinu Crisogno Neto, Diretór Nasionál sira,Xéfi Departementu sira no Ofisiál Finansas iha ámbitu Ministéiru Justisa.

Iha sesaun abertura, Ministru Justisa hateten katak, pakóte fiskál orsamentu rektifikativu 2015 ho kategoria salario e vencimento, bens e servicos, capital menor no capital desenvolvimentoba Ministériu Justisa ho totál alokasaun hamutuk $26,076 milhoes dolár amérikanu.

Hau hakarak informa mós ba imi-hotu katak, situasaun ezekusaun orsamentu Ministériu Justisa iha 2014 hatudu dezenpeñu ezekusaun di’ak, prosenjazem liu 90%. Tinan ne’e, 2015, VI Governu Konstitusionál mós iha komprimissu bo’ot atu hasa’e dezenpeñu ezekusaun ho kualidade.

Dalaruma ita-bo’ot sira iha duvida kona-ba aprovasaun númeru osan ba diresaun ida-idak, tanba-ne’e, hau husu ba Diretór Nasionál no Xéfi Departementu sira atu kolabora didi’ak ho Diretór Finansas hodi verifika orsamentu ne’ebé mak aloka ona ba iha kada diresaun; hateten Ivo valente.

Ministru Justisa Ivo Valente hak’tuir tán, kona-ba kestaun poupansa, ita tenke evita despeza ne’ebé la-nesessáriu, ne’e relasaun ho polítika VI Governu Konstitusionál hodi halo poupansa ba despeza públiku, katak ita-hotu tenke reduz despeza mak la-nesessáriu iha kada diresaun wainhira ezekuta orsamentu.

Por Ezemplu; uzu veíkulu no kombustível, funsionáriu sira sei uza veíkulu iha loron Sabadu no Domingu. Hau hanoin, asaun iha tereñu seidauk sériu. Hau husu ba Diretór sira, Sesta-Feira tenke halo kontrollu ba veíkulu sira; tantu kareta no motorizada Estadu nian.

Kuandu uza veíkulu iha tempu feriadu no hetán kaptura hosi Polísia, responsabildade tenke foti hosi superiór sira, tanba superiór sira mak fó autorizasaun ba uzu veíkulu.

Iha biban ne’e, Diretór Jerál Interinu, atuál Diretór Nasionál Finansas Crisogno Neto, aprezenta mós ezekusaun orsamentu Ministériu Justisa trimestre nian, no nia husu atu halo ezekusaun tuir Planu Asaun Anuál (PAA) no tuir lala’ok jestaun finansiamentu públiku nian.

Iha fatin hanesan, Defensór Públiku Jerál Sergio Hornai hato’o sira-nia planu iha tinan ne’e katak, sei halo konstrusaun Edifísiu Defensoria Públiku iha Munisípiu Bobonaro no Ermera.

Sei sosa mós veíkulu, kareta Estadu hamutuk hat (4) hodi distribui ba iha Defensoria Públiku iha Munisípiu Baukau, Cova-Lima, Oe-Cusse no Dili.

Hodi hákotu reuniaun ne’e, Ministru Justisa husu ba Dirijente Ministériu Justisa atu laós de’it relata sira-nia atividade mak atinzi ona, maibe fahe mós sira-nia esperiénsia ba malu, “oinsá” ultrapassa dezafiu no obstákulu sira, barreira mak sira hasoru no reseita efikaz hodi solusiona problema ruma.

Fahe esperiénsia nu’udar meius atu aprende ba malun, ajuda prosesu buka solusaun, aprende no tranfere matenek aproximasaun metódu propiu nian; hodi nune’e atravez hosi prosesu aprende, susesa mós ita-hotu nia servisu iha Ministériu Justisa.

Reuniaun ida ne’e hala’o hosi tuku 15:00 lokoraik, no termina iha tuku 17:11 lokoraik.