MANUFAHI – Kuarta-Feira, Loron 20 fulan-Maiu 2015, Ministru Justisa Ivo Valente sai Inspetór ba serimónia Isar Bandeira Nasionál ba Aniversáriu Loron Restaurasaun Independénsia RDTL ba dala XIII iha Parque Dom Boa Ventura ne’ebé lokalizadu iha Same, Munisípiu Manufahi.

Prosesu serimónia la’o hakmatek, foufoun, Ministru Justisa to’o iha pódio de honra simu kedan relatóriu katak serimónia isar bandera prontu atu realiza.

Depoiz simu relatóriu, Ministru Justisa halo ezame ho revista formatura, no kontinua entrega Bandeira RDTL ba angariadór Bandera hodi hasa’e.

Depoiz bandera sa’e ona, Ministru Justisa Ivo Valente fó-nia apresiasaun ás no honra ba veteranu no mós heróis libertação da patria, tanba sira mak ita-nia Nasaun Timor-Leste moris; “ha’u husu ba imi-hotu atu fó um-minuto de seléncio ba sira-nia luta nain ne’ebé mak sakrifíka nia án tomak ba rai doben ida ne’e.”

Iha ninia-diskursu, Ministru Justisa Ivo Valente hateten, ha’u mai iha ne’e, lori Diskursu S.E. Presidente Taur Matan Ruak hodi hato’o ba povu tomak, nia-diskursu ida ne’e halo iha Munisípiu Bobonaro nu’udar fatin ba seremónia Estadu nian iha tinan ida ne’e. Diskursu Presidente-Repúblika ba timor-oan tomak, inklui mos ba povu iha Munisípiu Manufahi.

Tuir mai, Ministru Justisa le’e Diskursu Presidente-Repúblika, diskursu ne’e ho pajina hamutuk 19.

Isar Bandeira Loron 20 Maiu la’o ne’ebé lokalizadu iha Parque Dom Boa Ventura hetan partisipasaun masimu hosi veteranu sira, funsionáriu públiku Munisípiu Manufahi, Presidente Câmara Município Fegeira da Foz Portugal João Ataide, Administrador Munisípiu Manufahi Felomeno Tilman, autoridade lokál sira, profesores, bombeirus no seguransa sivíl, parseiru dezenvolvimentu sira, polísia, Direjente Ministériu Justisa, estudante sira, joventude, Igreja, mídia lokál no nasionál, sosiedade sivíl no mós populasaun sira.

Aliende Isar Bandeira, Aniversáriu Loron Restaurasaun Indepedénsia Timor-Leste dada mós antusiásmu maka’as hosi povu Manufahi, no hetan divertimentu oioin hosi Komisaun Organizadora, divertimentu no animasaun hirak ne’e mak hanesan; drum band, dada tali, konsertu tradisionál, atrasaun hosi estudante sira no kompetisaun jinástiku.

Parabéns ba Timor-Oan Tomak!
Parabéns Timor-Leste!