Ministériu Justisa liu husi Diresaun Nasionál Direitus Umanus no Sidadania (DNDHC) komemora loron Internasionál kontra Tortura no Tratamentu At hamutuk ho komunidade no estudante eskola sekundária sira iha Munisípiu Bobonaro iha loron 26 fulan Juñu tinan 2015.
Komemorasaun ne’e realiza liu husi Semináriu ne’ebe ho tema” Hamutuk Ita Kontra Tortura ba Dignidade Estadu Timor-Leste” ne’e halao iha Munisípiu Bobonaro hodi hanoin hikas ema Timoroan ne’ebé Militar Indonesia halo tortura iha tempu okupasaun Indonesia, tanba luta ba independensia hanesan: hodi kadeira hanehan iha ain fuan, kesi liman no ain hodi tara, soke ho eletrisidade, sunu plastiku hodi halo turu ba ema nia isin lolon no sira seluk.

Oradór ba Semináriu ne’ebe organiza husi DNDHC ne’e kompostu husi Komandante PNTL Munisípiu Bobonaro, Superintendente Xefe, Armando Monteiro, koalia kona-ba Papel PNTL iha Prevensaun Tortura no Tratamentu At, Unidade Asesoria Direitus Umanus (UADU), Anjet Lanting, koalia kona-ba Obrigasaun Estadu parte atu realiza Konvensaun Kontra Tortura no Tratamentu At husi Prespetiva ONU, Representante Ministru Justisa, Diretór Diresaun Nasionál Direitus Umanus no Sidadania (DNDHC), Celito Cardoso koalia kona-ba Implementasaun Konvensaun Kontra Tortura no Tratamentu At iha Timor-Leste no Diretór Asosiasaun HAK, Manuel Monteiro, koalia kona-ba Tortura no Tratamentu At iha Pratika.

Administradór Munisípiu Bobonaro, Domingos Martins iha abertura hateten “ koalia kona-ba tortura, ita hateke fila fali ba kotuk, uluk Portugal tama iha Timor halo tortura ba ita nia avon sira, Japaun tama iha Timor halo tortura ba ita no ikus liu Indonesia mai okupa Timor-Leste halo tortura at liu ba ema Timoran sira, ema la hatene no labele fosai ba iha rai liur no rai seluk la hatene. Maibe ohin loron ema halo tortura ka tratamentu at de’it iha fatin balun, mundu hotu hatene kedas.”

Semináriu ne’ebé partisipa husi eskola sekundaria no professor sira ne’e Administradór hatutan liu tan”Tortura bai-bain ita rona mai husi Profesor sira, PNTL, F-FDTL no uluk hau nu’udar Profesor, hau sempre baku alunus sira, karik ida ne’e hau sala husu diskulpa.”
Diretór DNDHC, Celito Cardoso iha abertura hateten” ohin iha mundu konsideira loron 26 fulan Juñu nu’udár loron Internasionál Kontra Tortura no Tratamentu At. Konvensaun Kontra Tortura no Tratamentu At katak hahalok at ne’ebé ema halo ba ita, hanesan iha tempu okupasaun Indonesia, Militar sira halo ba ita, tanba ita luta ba ita nia independensia to’o mate ba ita nia rai.”
Diretór ne’e hatutan liu tan dehan” ohin ita hanoin fila fali tortura kona-ba ita nia luta, nune’e mós ita nia lider sira iha komitmentu kona-ba prinsípiu direitus umanus bain hira Timor-Leste ukun rasik-an.”
Hafoin semináriu komisaun organizadora lori aifunan ba kari iha semiteriu Santa Cruz Maliana hodi fo omenaze ba ema timoroan ne’ebe fo sira nia-an ba militar Indonesia hodi halo tortura ba sira nia isin lolon to’o mate ba ita nia rai doben Timor-Leste.

João Maupelo da Costa
Ofisiál Relasaun Públika