AUDENSIA PUBLIKU HO DEPUTADU KOMISAUN D-PARLAMENTO NACIONAL BA PROPOSTA DA LEI KONABA PROTESAUN KONSUMIDORES

Dili, Iha loron Tersa-feira, 1 Julho 2015, ekipa husi Ministério da Justiça, ne’ebe lidera husi Diretor Direcção Naçional de Assessor Jurídica e Legislação (DNAJL) Ministériu da Justisa (MJ), Nelinho Vital, hodi reprezenta Sr. Ministro da Justiça, halo diskusaun ho Deputadu sira husi Komisaun D-Parlamento Nacional nian ba Proposta Lei Konaba Protesan Konsumidores.

Proposta Lei ida ne’e, aprezenta husi Deputadu sira hanesan inisiativa lejislativa husi Parlamento Nacional ninian ho baze ba artigo 95 Konstituisaun Republika.

Objetivu husi audensia ida ne’e, atu bele hetan hanoin ida konstruktivu husi parte Governo nian, hanesan instituisaun implementador. Ho nune’e persiza tebes iha persepsaun hanesan ba proposta lei refere, molok lei ne’e, entrada em vigor.

Hatan konaba pozisaun Ministeriu Justisa nian ba proposta lei ne’ebe Deputadu sira aprezenta ne’e, Diretor Nelinho hatete katak, “em prinsipiu, tuir tekniku Ministeriu Justisa nian, la dun iha ona problema. Maibe, persiza hadia ou aumenta tan artigu ida tan hodi regula konaba sansaun administrativa nian. Tamba multa ne’e parte penal nian, la’os sansaun administrativu nian. Iha administrativu ita konhese ho koima”.

Iha diskusaun durante óras rua sein ne’e, hamosu diskusaun ida ne’ebe klean la’os deit ba parte politika nian, maibe parte tekniku nian liu. Atu konkretiza hanoin hirak ne’e, DNAJL sei haruka parser tekniku iha papel ba Komisaun D-Parlamento.

Hafoin remata diskusaun ne’e, iha semana oin mai, Komisaun D Parlamento Nacional sei aprezenta ba parte espesializada.

(Mize Correia/DNAJL)