MINISTRU JUSTISA PREZIDE REUNIAUN KONSELLU JERÁL CENTRO FORMAÇÃO JURÍDICA

DILI – Sesta-Feira, loron 07 fulan-Agusto 2015, Ministru Justisa Ivo Valente prezide Reuniaun Konsellu Jerál Centro Formação Jurídica iha Aula Reuniaun Diretora Jerál Centro Formação Jurídica (CFJ) Caicoli, Dili.

Centro Formação Jurídica nu’udar órgaun tutela iha Ministru Justisa nia okos tuir Diploma Ministérial nú. 6/2013 ho objetivu prinsipál mak promove no realiza formasaun tékniku-jurídika, linguístika, no deontolójika ba majistradu no defensór públiku sira no mós ba ajente profesionais justisa nian; mak hanesan advogadu, ofisiáis justisa, notáriu, konservadór sira, tradutór no interpreter jurídiku hodi kontribui ba iha dezenvolvimentu administrasaun di’ak no aperfeisoamentu direitu.

Ministru Justisa, Ivo Valente iha ninia abertura reuniaun ne’e hateten, reuniaun ne’e importante atu rona relatóriu hosi Diretora CFJ, “saída” mak halo ona tinan kotuk, inklui dezafiu no susesu sira ba realizasaun programa formasaun ne’ebé mak la’o dadaun iha tinan ne’e, sei halo mós aprezentasaun ba planu formasaun iha CFJ no ita sei deside tipu formasaun ba autór justisa sira; ita sei aprova planu formasaun ba 2016. Ne’ebé, ohin mós sei rona no diskute prosesu rekrutamentu no preparasaun ba formasaun ne’ebé hala’o ona hosi Centro Formação nian no “oinsá” formasaun iha tinan oin mai, ita bele diskute mós assuntu diversu balun no ha’u hein ita-bo’ot sira atu aumenta wainhira iha assuntu importante balun mak ita tenke diskute ohin.

Tuir mai, Ministru Justisa dahuluk fó oportunidade ba Diretóra Jerál CFJ, Marcelina Tilman hodi halo aprezentasaun relatóriu CFJ iha tinan 2014 no iha tempu hanesan hetan feedback no diskusaun ba rezultadu sira mak atinzi ona depois halo diskusaun, no tuir kedan aprezentasaun ba planu formasaun ba tinan 2016. Aprezentasaun Diretora CFJ ne’e hetan apresiasaun hosi Ministru Justisa, Prokuradór Jerál, Defensór Públiku no Presidente do Conselho de Gestão; no ikus deside no aprova tipú formasaun nessesáriu ba iha majistradu sira, defensoria públika, advogadu privadu no ofisiais justisa nian.

Iha ajenda diversu, diskute mós dezafiu sira ne’ebé formadór no dosente internasionál sira hasoru iha Centro Formação period 2015, posibilidade rekrutamentu ba formadór espesialista ba área sivíl no direitu internasionál, prosesu rekrutamentu ba kandidatu sira mak sei tuir kursu ka formasaun majistradu no defensoria públiku nian, no mós diskute proposta Rejime Jurídiku Karreira ba Funsaun Formadór Nasionál sira.

Reuniaun Konsellu Jerál CFJ partisipa hosi Ministru Justisa Ivo Valente, Procurador-Geral da República Dr. José da Costa Ximenes, Defensor Público Geral Dr. Sergio Hornai, Presidente do Conselho de Gestão e Disciplina da Advocacia (CGDA) Dr. Nelinho Vital no Directora do CFJ Dra. Marcelina Tilman.

Evangelino Belo
Xéfi Gabinete Ministru Justisa
Ministériu Justisa