DILI, CFJ – Segunda-Feira, loron 17 fulan-Agusto 2015, Ministru Justisa, Ivo Valente, abertura turnu datolu ba Kursu Formasaun Ofisiais Justisa Defensoria Públika tinan 2015 iha Centro Formação Jurídica (CFJ) Dili.

Turnu datolu ne’e, formadu hamutuk ema nain 27 no sei tuir formasaun intensivu durante fulan 18 iha Centro Formação Jurídica (CFJ) Dili, formasaun ne’e sei konklui ho teória, estájiu no mós prátika.

Iha ninia intervensaun ba abertura Kursu Datolu Defensoria Públika, Ministru Justisa Ivo Valente hateten,

“kapasitasaun importante tebes ba ofisiais justisa sira, ita-bo’ot sira escolhido ho prosesu ne’ebé naruk no kompetitivu entre ema barak ne’ebé mak hakarak mai iha ne’e, tanba-ne’e, ha’u husu ba alin no hau-nia oan sira atu aproveita ho didi’ak oportunidade ida ne’e hodi absorve materia no koñesimentu hosi formadór sira.”

Hanesan Presidente Konsellu Superiór Defensoria Públika, Ministru Justisa mak prezide prosesu sira ba promusaun, nomeasaun, kolokasaun, transferénsia, troka no desloka ema, sei foti asaun disiplinar no mós aktu sira relasaun ho natureza servisu defensór públiku sira, inklui defensór públika nivél munisípiu nian.

Tanba-ne’e, uza oportunidade kursu ne’e ho didi’ak, hanesan ema escolhido tanba iha potensialidade ba karreira tékniku no faz parte ba profesionais justisa nian, ejiji atu halo servisu maka’as liután, aliénde karreira defensór sira regula ho rejime espesiál, imi simu renumeratóriu ne’ebé bót kompara ho funsionáriu públiku baibain, katak, imi tenke assume servisu barak liután; hateten Ministru Justisa ba formadu sira.

Ministru Justisa mós esplika kona-ba planu Ministériu Justisa nian iha tinan 2015 katak, sei halo alargamentu ba defensoria públika iha Munisípiu Ermera no Bobonaro, katak, alargamentu defensoria to’o iha munisípiu sira mós sei ejiji formadu sira wainhira remata kursu ne’e, sai ona denfensór tenke prontu simu destakamentu hodi nune’e lori atendimentu justisa nian besik liután ita-nia povu iha área rurais ne’ebá.

Relasaun ho kestaun destakamentu no nessesidade povu iha munisípiu sira, hanesan Ministru Justisa no Konsellu Superiór Defensoria Públika, “imi prontu ka la’e kuandu hetan destakamentu ba munisípiu sira?”, simultaneamente, formadu sira responde ho “ami pronto!”; husu Ivo Valente ba formadu sira.

Iha biban ne’e, Defensór Públika Dr. Sergio Hornai mós hato’o objetivu kursu formasaun ne’ebé hala’o hosi Defensoria Públiku Jerál iha CFJ, katak, formasaun ne’e sei halo durante iha fulan 18 nia laran, formadór sira mai hosi timor-oan no internasionál (Portugal), nia esplika metodolojia ne’ebé mak sei uza, importansia lingua Portuguesa ba formasaun no komprensaun kontiúdu leis sira hodi nune’e bele apoiu di’ak liután servisu defensoria nian no administrasaun tribunal iha futuru.

Serimónia abertura turnu datolu ba Kursu Formasaun Ofisiais Justisa Defensoria Públika tinan 2015 iha Centro Formação Jurídica (CFJ) partisipa hosi Diretór Jerál Ministériu Justisa Henrique de Oliveira Ximenes, Diretora Jerál CFJ Marcelina Tilman da Silva, Inspetór Jerál Ministériu Justisa Lucas Antonio da Costa, Xéfi Gabinete Ministru Justisa Evangelino Belo, Defensór Públiku sira, Agvogadu sira, parseiru dezenvolvimentu (doadór sira), ofisiais sira hosi Ministériu Justisa no mós formadór nasionál no internasionál.

Evangelino Belo
Xéfi Gabinete Ministru Justisa
Ministériu Justisa