Ministériu Justisa liu hosi Diresaun Nasional Direitus Umanus no Sidadania-DNDHC, Diresaun Nasional Rejistu Notariado-DNRN no Diresaun Nasional Asesoria Juridika no Lejislasaun-DNAJL) hala’o divulgasaun iha Postu Administrativu Letefoho Municipiu Ermera iha loron 11 Agostu tinan 2015 no aktividade divulgasaun iha Suco Lour, postu Administrativu Bobonaro, iha loron 13 Agostu 2015.

Iha sesaun Abertura ba program divulgasaun iha Postu Administrativu Letefoho reprezentante Administrador Postu Administrativu Letefoho, CDO Sr. Luis Martins, hateten, “Letefofo area ne’e dook husi kapital no klaru komunidade falta informasaun lei, ho biban ida ne’e hau husu komunidade hodi akumpaña di-didiak sesaun ne’e, hau agradese ba ekipa nasional husi Ministeriu Justisa ne’ebé mai direta hodi divulga lei no hasoru komunidade sira.

Husi ekipa nasional ba divulgasaun ne’ebé kompostu husi diresaun tolu mak hanesan DNDHC, DNRN no DNAJL hodi divulga lei mak hanesan : 1. Politika Governu konaba sistema Lei,no atribusaun titularodades beins e movies, Registu Civil, Lei nasionalidade no seluk-seluk, Lei Protesaun Testamunha, Lei kona ba direitu familia no direitu susseoes, Violensia Domestika ne’ebé sai pakote husi program divulgasaun nian.

Sesaun ida tan iha tempu no fatin neébe la hanesan, iha Suco Lour Postu Administrativu Bobonaro liu hosi abertura Administrador Municipiu Bobonaro, Domingos Martins hateten, “iha area ne’e maske do’ok husi kapital maibe tuir hau nia hare laos izoladu tamba komunidade iha area ne’e iha ona uma mutin laos uma du’ut ona no iha parabola. Maske nune’e, informasaun legal matein ita presija para ita hatene ita nia direitu no dever hodi ses husi konflitu, hau apresia no agradese tamba foin Ministeriu Justisa maka halao programa iha area ne’e, hau sujere mantein kontinua programa hirak ne’e iha ami nia area izoladu sira seluk.

Diretór DNDHC, Celito Cardoso iha nia abertura no aprezentasaun materia kada sesaun divulgasaun hateten, “Programa divulgasaun lei ida ne’e ho objetivu atu transmite informasaun lei sira ne’ebé aplika da-dauk iha ita nia nasaun Repúblika Demokratika Timor-Leste, nune’e ita nudar siadadaun oinsa ita bele hatene ita nia direitu no ita nia dever hanesan sidadaun ne’ebé moris iha nasaun ida ne’e, nune mos liu husi program divulgasaun ida ne’e hodi bele minimiza konflitu horizontal ne’ebé dala barak sempre mosu husi komunidade hodi nune husu komunidade sira tenke kontribui ba paz no estabilidade hodi resolve problema liu husi meknaismu ne’ebe tuir lei sira.

Aprezentasaun materia hosi Diretóra DNRN, Maria de Fatima hateten, “Governu Timor-Leste proteje sidadaun hotu-hotu nia direitu liu hosi dokumentu. Sidadaun tenki iha identidade sivil hanesan, Bilete identidade(BI), Sertidaun RDTL, sertidaun mate/obitu, pasaporte ne’e iha tipu oi-oin, ba sidadaun sira enkuandu atu ba rai liur tenki trata pasaporte no ba maluk estranjeiru ne’ebé kleur ona iha Timor wainhira prense rekezitus ona bele teste hodi sai sidadaun Timor. ”

Aleinde materia hirak ne’e, iha mos materia sira seluk informa iha kada sesaun hanesan kona-ba Direitu Familia no Susesaun hato’o hosi Xefe Departementu DNAJL, Pascoal da Costa no Xefe Departementu Yudi Pamukas, Lei Kontra Violensia Domestika hato’o hosi Tekniku Superior, Carmelindo da Silva Caetano, no Lei Protesaun Testemuña hato’o hosi Xefe Departementu Direitus Umanus, Francisco X.V Soares.

Programa divulgasaun iha Postu Administrativu Letefoho ho kuantidade partisipante hamutuk atus ida tolu nolu resin tolu(133) no sesaun ida iha Suco Lour Postu Administrativu Bobonaro hamutuk ema atus rua(200). Sesaun husu no hatan hosi kada sesaun sira ne’e, prekupasaun komunidade dominante ka barak liu maka relasiona ho problema rai nian.

Iha programa divulgasaun ne’e kolaborasaun maximu lideransa no komunidade iha area rua refere. Komunidade iha Suco Lour, Postu Adminitrativu Bobonaro hasoru ekipa nasional sira, lideransa municipiu, lideransa postu administrativu, reprezentante PNTL no F-FDTL ho Tebe dai no tara tais. depois finaliza sesaun ikus iha Suco Lour, tuir Xefi Suco SIBUNI, Mateus Bere Laka Maya ne’ebé mós sai hanesan partisipante iha sesaun ne’e hato’o nia hanoin katak “Programa ne’e importante tebes tamba informasaun lei lubuk ida ne’ebé hatete mai ami hodi evita konflitu, maske mai koalia deit maibe nia benefisiu diak ba ami nudar lideransa komunitaria no komunidade tomak iha area ne’e.”

Carmelindo da Silva Caetano
Tekniku Superior Relasaun Públiku no Divulgasaun DNDHC