DILI, CFJ –Segunda-Feira, loron 07 fulan-Setembru 2015, S.E. Ministru Justisa Ivo Valente hamutuk ho S.E. Ministru Estadu, Koordenadór asuntu Administrasaun Estadu no Justisa Dionísio Babo-Soares, PhD., abertura Diagnóstiku Nasionál ba Ministériu Justisa ne’ebé mak sei hala’o hosi Sekretáriu Estadu Fortalesimentu Instituisionál (SEFI) iha Salaun Centro Formação Jurídica (CFJ), Dili.

Ministru Justisa Ivo Valente iha ninia diskursu hateten, Diagnóstika Nasionál hosi Fortalesimentu Institusionál realiza iha Ministériu Justisa hanesan ezersísiu auto-avaliasaun ida ho intensaun atu hare’e Ministériu Justisa nia prestasaun servisu no produtividade instituisaun nian. Nia objetivu mak, atu revé fali prátika ka lala’ok servisu Ministériu Justisa nian durante periódu hirak nia laran, hodi buka hatene problema fukun iha lala’ok servisu nian no fornese solusaun no rekomendasaun ba fortalesimentu no reforma institusionál ho forma ne’ebé signifikante no sustentável.

“Ha’u hato’o ha’u-nia agradesimentu bo’ot ba ekipa hosi Gabinete de Secretário do Estado de Fortalesimento Institusionál ne’ebé Servisu hamutuk Pontu Fokál Ministériu Justisa nian ba Diagnostiku Nasionál, realizasaun programa ne’e hatudu katak, imi halo kordenasaun di’ak tebes ho Ministériu Justisa;” agradese Ministru Justisa ba realizasaun Diagnóstika Nasionál ida ne’e.

Ministru Justisa hatutan, Enkontru ida ne’e importante nu’udar momentu oportunu ba ita-hotu atu koa’lia bá malu, avalia ita-nia servisu institusionál hodi bele dezempeña no melhora diak liután ita-nia servisu iha futuru.

Tanba, VI Governu Konstitusionál hala’o programa Diagnóstika Nasionálatu sai baze ida hodi reve no re-oriénta fali lala’ok no esforsu servisu Ministériu Justisa nian durante ne’e, atu nune’e ba oin, ita sei serví ho efisiénte no efikásia no mós oriénta di’ak liután ba produsaun rezultadu servisu.

Iha biban ne’e, S.E. Ministru Estadu, Koordenadór asuntu Administrasaun Estadu no Justisa Dionísio Babo-Soaresiha sesaun abertura hateten mós katak, Diagnóstika Nasionál hanesan prosesu avaliasaun ba instituisaun nia lala’ok no nia funsionamentu, hodi hare’e existénsia servisu ne’ebé la’o tiha ona no mós hare’e hikas “saída” mak nu’udar guia ka matadalan hodi hala’o servisu sira ne’e.

Nune’e, ihaárea prinsipál hitu ba foku diagnóstika instituisaun no organizasaun nian hodi halo analize mak hanesan; (1) Polítika, vizaun, estratéjia no lideransa; (2) Estrutura governasaun no kuadru konstituisionál, estrutura burokrasia dadaun ne’e todan ka kma’an; (3) Jestaun rekursu umanu, “oinsá” imi jere imi-nia rekursu umanu; (4) Jestaun rekursu seluk (finanseiru no materiais); (5) Kultura organizasaun no komunikasaun interna; (6) Outputs, rezultadu no prestasaun servisu; ikus mak (7) Jestaun relasaun no komunikasaun externa; esplika Dionísio Babo-Soares, hanesan mós Ministru Administrasaun Estatál.

Partisipa iha Diagnóstika Nasionál ida ne’emak direjente ofisiais hamutuk ema 107 ne’ebé asumi kargu diresaun sira no xéfia mak hanesan; Diretór-Jerál, Defensór Públiku-Jerál, Inspetór-Jerál no Sub-Inspetór sira, Diretora Centro Formação Jurídica (CFJ), Polísia Siéntifika Investigasaun Kriminál (PSIK), Diretór Nasionál sira, Diretór nivél munisípiuba 12 Municípios no Diretór sira hosi Região Administrativa Espesiál de Oecusse, Xéfi Departementu sira, Xéfi Gabinete Ministru Justisa, Xéfi Gabinete STP, tékniku profesionais superiór sira no Assessores Nasionál no Internasionál iha ámbitu Ministériu Justisa.

Diagnóstika Nasionál ba Ministériu Justisa sei hala’o durante iha loron-hát nia laran ne’ebé lidera hosi Sekretáriu Estadu Fortalesimentu Institusionál (SEFI) Dr. Francisco Borlako, ne’ebé hahú hosi loron 07-10 fulan-Setembru 2015.

Maria de Lourdes Lin
Media Officer
Gabinete Ministru Justisa