JENEBRA, SUÍÇA - Kuarta-Feira, loron 23 fulan-Setembru tinan 2015, S.E. Ministro Justisa Ivo Valente prezide reuniaun preparatóriu ekipa delegasaun Timor-Leste nian molok submete relatóriu situasaun labarik Timor-Leste ba iha Komité Nasões Unidas Direitu Labarik.

Prezensa Governu iha Jenebra reprezenta Estadu RDTL hodi responde perguntas sira mak mai hosi Komité Nasões Unidas Direitu Labarik (CRC) ba relatóriu Estadu nian ne’ebé submete ona iha tinan 2013 liubá.

Molok ba atu halo aprezentasaun iha Membru Komité CRC nia oin, Ministru Justisa ho delegasaun Timor-Leste hala’o reuniaun preparatóriu loron tomak, hahu tuku 10:00 dadersan to’o iha tuku 20:00 kalan Oras Jenebra nian, reuniaun ne’e lokalizadu iha Edifísiu Misaun Permanente Timor-Leste (Embaixada Timor-Leste) iha Jenebra, Suíça.

Ministru Justisa, Ivo Valente wainhira hahu reuniaun hateten, reuniaun ohin ne’e, ita sei diskute preparasaun ba aprezentasaun relatóriu direitu labarik ne'ebé mak ita submete ona ba Komité Nasões Unidas Direitu Labarik iha tinan 2013 liubá, nu’udar Xéfi Delegasaun, ha’u husu ita hotu-hotu tenke preparadu iha kontéudu asuntu ita-nia labarik sira iha Timor-Leste, atu nune'e ita bele responde no intende perguntas sira ne'ebé mak sei mai hosi Komité CRC ba ita-hotu.

Relasaun ho perguntas ne’ebé ho kontéudu polítiku, ha’u, Señora Vise-Ministra Edukasaun no Señor Embaixadór mak sei responde, enkuantu, perguntas iha área tékniku no espesifíku sira, ami sei entrega ba ita-bot sira hanesan direjente ofisiál liña ministériu nian hodi responde, tanba-ne’e, ha’u husu ba ita-hotu atu prepara án didi’ak, Bem preparado hodi responde perguntas sira mak sei mai hosi Komité CRC ninian; orienta Ministru Justisa wainhira atu hahu reuniaun preparasaun no konsolidasaun idéias delegadu sira.

Iha parte seluk, Señor Embaixadór Timor-Leste ba Jenebra Marciano da Silva hateten; ita hotu-hotu sei aprezenta faktu sira, ita sei hatudu rezultadu ne’ebé mak feitu hosi “saída” mak Governu halo ona em espesifíku hodi responde situasaun labarik sira iha ita-nia rai, importante mak ita tenke hatene palavra savi sira hodi responde perguntas sira, baibain perguntas nia natureza mak hanesan “saída” mak halo ona, “oinsá”, “tanbasa”, “hodi bainhira”, mak “ne’ebé” no planu ba oin “oinsá”; ne’ebé, ha’u espera katak ita-hotu hatene didi’ak ita-nia situasaun labarik sira iha Timor-Leste.

Reuniaun delegasaun Timor-Leste iha Embaixada Timor-Leste iha Jenebra hahu ho aprezentasaun hosi tékniku sira, no halo diskusaun klean ba iha nivél kualidade atendimentu ba labarik sira durante ne’e, Estadu nia komprimissu ba protesaun labarik, polítika no enkuadramentu legál sira, kestaun saúde no edukasaun, kestaun prizaun ba labarik sira no mós nivél kresimentu labarik sira ne’ebé rejistradu, no asuntu relasionadu seluk-seluk tán.

Partisipa reuniaun ne’e mak; Vise-Ministra Edukasaun Dra. Dulce de Jesus Soares, Embaixadór Timor-Leste iha Jenebra Dr. Marciano da Silva, Diretór Nasionál Diresaun Nasionál Direitus Umanus no Sidadania (DNDHC) Ministériu Justisa Dr. Celito Cardoso, Komisária Direitu Labarik Dra. Maria Barreto, Diretora MSS Dra. Antonia Carmen da Cruz, reprezentante hosi MNEC, Ministériu Defeza, SEPFOPE, Ministériu Saúde no Assessores sira.

Solange Pires

Korespondénte Gabinete Ministru Justisa

Ministériu Justisa