MADRID, ESPAÑA – Segunda-Feira, loron 28 fulan-Setembru 2015, S. E. Ministru Justisa Timor-Leste, Ivo Valente hanesan mós Presidente Conferênsia dos Ministros da Justiça dos Países da Língua Ofisial Portuguesa (CMJPLOP) halo sorumutu dahuluk nian ho Secretário Geral Conferênsia de Ministros da Justiça dos países Iberio-americana (COMJIB), Sr. Arkel Benítez iha Sidade Madrid, España.

Sorumutu ne’ebé realiza iha Sekretaridu COMJIB iha Sidade Madrid mós partisipa hosi Secretário Geral CMJPLOP Sr. Nelinho Vital no Sr. João Pedro hanesan assessór jurídiku Ministru Justisa nian.

Sorumutu ne’e nakonu ho amizade, aliénde kongratula Sr. Benítez ne’ebé asumi Secretário Geral COMJIB foun, parte rua partilha mos informasaun ba malu, troka hanoin kona-ba situasaun hosi lalaok konferénsia nian, no koalia kona-ba oinsá hametin nafatin lasu amizade entre nasaun membru sira iha área justisa nian.

Aproveita oportunidade ne’e, Ministro Justisa Timor-Leste informa kona-ba situasaun justisa Timor-Leste nian, fahe mós hanoin posibilidade apoiu hosi nasaun membru COMJIB nian.

Asuntu korupsaun iha setór administrasaun públiku no prizaun sai hanesan asuntu ida ne’ebé mak hetan atensaun iha sorumutu ne’e, tanba kuaze hasoru problema hanesan iha komunidade organizasaun internasionél rua ne’e.

Hosi sorin seluk, Secretário Geral COMJIB hato’o mós ninia sentimentu kontente hodi simu delegasaun husi CMJPLOP no mós hato’o nia parabéns ba Ministru Justisa Timor-Leste ne’ebé mak agora dadaun lidera hela CMJPLOP hanesan organizasaun internasionál maske hanesan nasaun foun ida.

Sorumutu ba dahuluk ne’e, sai hanesan momentu prinsipál ida atu hametin kooperasaun di’ak entre organizasaun internasionál rua ne’e, nomos nasaun membru sira iha área dezenvolvimentu justisa nian.

Hodi informa mós katak, COMJIB hanesan organizasaun internasionál ida ne’ebé mak halibur nasaun sira ne’ebé koalia lian ofisiál espanhol, ho membru hamutuk nasaun 21, husi kontinente Europa, Amérika no Áfrika. Asembléia Jerál Ministru Justisa COMJIB nian hala’o tinan 2 dala-ida, no asembléia ikus mak asembléia ba dala XIX iha Sidade Santo Domingo, República Dominicana.

Sorumutu entre Presidente CMJPLOP (le’e: Ministru Justisa Timor-Leste) ho Secretário Geral COMJIB hala’o durante oras ida resin, ikus mai ensera ho troka lembransa ba malun no foto hamutuk hanesan jeitu amizade entre ulun-bót husi organizasaun internasionál rua ne’e.