DILI, MJ – Kuarta-Feira, loron 07 fulan-Otubru 2015, S.E. Ministru Justisa Ivo Valente dirije reuniaun Konsellu Konsultivu Ministériu Justisa (KK-MJ) iha Sala Reuniaun Ministériu Justisa (MJ), Dili.

Reuniaun ne’e ho ajenda mak introduz Diretór Nasionál foun Polísia Sientífika Investigasaun Kriminál (PSIK) ne’ebé mak hetan ona posse hosi S.E. Primeiru-Ministru Interinu Dr. Agio Pereira iha loron 01 Otubru 2015, aprezentasaun progresu implementasaun atividade kada diresaun idak-idak, halo avaliasaun ba taxa ezekusaun orsamentu Ministériu Justisa nian, no asuntu diversu balun tán.

Iha ninia introdusaun ba reuniaun, Ministru Justisa fó-nia bem-vindu ba Diretór Nasionál foun ba PSIK, Dr. Vicente Fernandes Brito no kongratula ninia prezensa primeiru iha reuniaun Konsellu Konsultivu ba Ministériu Justisa. Señor Ministru mós esplika oituan kona-ba papel Konsellu Konsultivu nian nu’udar órgaun konsultivu ba asuntu servisu no organizasaun internál Ministériu Justisa nian, fatin ne’e nu’udar espasu ba kargu xéfia iha ámbitu Ministériu Justisa atu diskute, avalia no akompaña servisu tomak mak ita hala’o.

Ha’u fó bem-vindu ba Dr. Vicente Fernandes Brito ne’ebé asume Diretór foun ba PSIK ne’ebé mai hamutuk ona ho familia bót Ministériu Justisa nian, ha’u hatene, ita tenke servisu maka’as hodi hadiak ita-nia instituisaun, estatutu no harmoniza kestaun legál sira, konserteza tenke kolabora didiak ita-nia servisu tuir ninia evolusaun no kbiit Ministériu Justisa nian; hateten Ministru Justisa, Ivo Valente.

Antes Ministru Justisa fó tempu ba Diretór PSIK atu introduz án, Señor Ministru fó-koñese kargu-xéfia sira-hotu ne’ebé mak partisipa iha reuniaun ne’e, hahu hosi Diretór-Jerál to’o iha assessór sira ne’ebé fó apoiu ba iha Gabinete Ministru Justisa.

Iha ninia intervensaun, Diretór Nasionál PSIK fó-nia apresiasaun ba Ministru Justisa, Ivo Valente no familia tomak Ministériu Justisa nian, haktuir mós iha reuniaun ne’e “saída” mak nia sei prioritiza ba servisu polísia sientífika nian, nune’e mós “oinsá” servisu administrativu ne’ebé tutela ba Ministériu Justisa no servisu funsionál PSIK ne’ebé kabe ba iha Ministériu públiku.

Depois-de ajenda primeiru, Ministru Justisa hanesan mós Presidente Konsellu Konsultivu fó tempu ba Diretór-Jerál Ministériu Justisa hodi halo aprezentasaun jerál ba atividades ministériu nian. Iha ninia intervensaun, Diretór-Jerál informa katak, prosesu relatóriu tri-meste datoluk nian, agora iha finalizasaun no aban, loron 08 Otubru 2015, oras 10:00 dadersan sei submete ba iha S.E. Ministru Estadu Koordenadór asunto asuntu Administrasaun no Justisa.

Tuir mai, Ministru Justisa husu kada diresaun idak-idak atu servisu maka’as liután, hasa’e dezempeñu ezekusaun atividades no orsamentu,
tanba ezekusaun Ministériu Justisa tuir tabela ezekusaun ne’ebé mak aprezenta hosi Diresaun Nasionál Administrasaun no Finansas (DNAF) hatudu katak ezekusaun tri-mestre datoluk em real no kompromisu foin mak atinzi 73%. Diresaun balun ninia ezekusaun sei menos de 50%, nune’e Señor Ministru husu ba diresaun relevante atu aprezenta problema loloos iha ne’ebé no husu atu aprezenta sá obstakulu, hodi nune’e buka solusaun hamutuk no aseleira lalais ezekusaun.

Haktuir esplikasaun hosi Diretór sira, katak, kategoria kapital dezenvolvimentu no kapital menór mak hatudu ezekusaun sei minimu tebes, tanba balun sei iha prosesu aprovizionamentu no prosesu implementasaun, balun tán tanba seidauk halo pagamentu, tanba-ne’e, hatudu ezekusaun seidauk tuir tarjetu,
balun tán iha relasaun ho prosesu aprovizionamentu sentrál, hein katak sei ezekuta tuir kalendáriu ezekusaun ministériu nian.

Iha ajenda diversu nian, Ministru Justisa update kona-ba ninia rezultadu vizita ofisiál relasiona ho aprezentasaun relatóriu labarik nian iha Komité Nasões Unidas CRC iha Jenebra (Suíça) no mós reuniaun ho Sectretário Geral Paíz Lingua Español nian iha Madrid, España foin lalais ne’e.

Hodi taka reuniaun KK-MJ, Ministru Justisa apela ba diretór sira-hotu katak, ita-hotu tenke aseleira lalais ezekusaun, tanba ita-nia ezekusaun efetivu hela fulan-rua, katak to’o de’it fim de Novembru 2015; imi-hotu tenke apoiu malu, kolabora, no komunika ba malun. Importante mak asegura nafatin ninia kualidade ezekusaun; apela Ministru Justisa, Ivo Valente.

Reuniaun ne’e taka iha meudia tuku 12:15 ne’ebé partisipa hosi; Defensór Públiku Jerál Sergio Hornai, Diretór-Jerál Henrique de Oliveira Ximenes, Xéfi Gabinete Ministru Justisa Evangelino Belo, Inspetór-Jeral Lucas Antonio da Costa, Diretór PSIK Vicente Fernandes Brito, Diretóra Sentru Formasaun Jurídika (CFJ) Marcelina Tilman da Silva, Diretór DNAF Crisogno Neto, Diretór DNAJL Nelinho Vital, Diretór DNDHC Celito Cardoso, Diretóra DNRN Maria do RFC de Araújo, Diretór DNTP Romão Guterres no Diretór DNPRS Helder Belo.

Maria de Lourdes Lin
Media Officer
Gabinete Ministru Justisa