DILI, DNRN – Segunda-Feira, loron 19 fulan-Otubru 2015, S.E. Ministru Justisa Ivo Valente akompaña S.E. Primeiru-Ministru RDTL, Dr. Rui Maria de Araújo halo inspesaun supreza ba iha Diresaun Nasionál Rejistu Notariadu (DNRN), Bebora, Dili.

Inspesaun supreza ne’ebé Xéfi Governu hala’o ne’e nu’udar esforsu Governu nian hodi hadia kestaun atendimentu públiku nian. Nune’e mós atu hare’e besik liután servisu DNRN nian no rona rasik “saída” mak sai problema ba atendimentu públiku, hodi nune’e buka solusaun ba kestaun sira mak DNRN hasoru.

Primeiru-Ministru ne’ebé akompaña hosi Ministru Justisa no Inspetór-Jerál Estadu halo inspesaun sistemátiku no rigor, halo vizita ba iha kada departementu ida-idak nian iha ámbitu DNRN nian.

Inspesaun ne’e hahu hosi balkaun tratamentu ba nasionalidade, aula ba sistema arkivu, Aula Téknolojia Informatika, balkaun notáriadu, balkaun passaporte no Bilhete Identidade no mós balkaun ba tratamentu bom-comportamento.

Iha inspesaun ne’e, Primeiru-Ministru husu ba funsionáriu sira no Diretora Nasionál DNRN; saída mak sira halo loron-loron, oinsá lala’ok atendimentu, jestaun ba rekursu umanu ne’ebé limitadu, oinsá mákina halo operasaun, rekursu lojistíku ba apoiu servisu nian, tambasá mak sei mosu insatisfasaun barak hosi públiku ba atendimentu durante ne’e, obstakulu no dezafiu sira, no seluk-seluk tán.

Primeiru-Ministru aliénde husu klarifikasaun balun kona-ba servisu sira ne’ebé funsionáriu sira hala’o, fó mós intrusaun direitamente ba Ministru Justisa atu tau matan di’ak liután servisu atendimentu públiku nian, buka mekanismu ida hodi aseleira lalais Bilhete Identidade ba povu tomak antes remata tinan 2016.

Inisia reuniaun alargadu ida nivél inter-ministeriál kona-ba diskusaun kartaun uníku, submete proposta Lei Rejistu Prediál ba Konsellu Ministru hodi diskute no harii ajénsia bankária iha área DNRN nian hodi fasilita di’ak liután ita-nia povu wainhira halo pagamentu ba tratamentu passaporte nian.

Primeiru-Ministru, Dr. Rui Maria de Araújo hákotu nia inspesaun iha DNRN ho deklarasaun imprenssa ba mídia nasionál jornais no eletrónika.