MINISTRU JUSTISA KOMEMORA LORON DIREITU LABARIK IHA ESKOLA PRE-SEKUNDÁRIA 30 AGUSTO COMORO

DILI, MJ – Sexta-Feira, loron 20 fulan-Novembru 2015, S.E. Ministru Justisa Ivo Valente komemora Loron Direitu Labarik hamutuk ho estudante no profesores sira iha Eskola Pre-Sekundária 30 Agusto Comoro, Dili.

Komemorasaun Loron Direitu Labarik 20 Novembru 2015 ne’e ba dala-13, depois Timor-Leste ratifika Konvensaun Direitu labarik iha tinan 2002. Komemorasaun ne’e ho atividade sira mak hanesan; sertame – kompetisaun kadi kakutak entre estudante sira, le’e puizia no mós kanta muzika hodi anima estudante sira.

Iha ninia diskursu, Ivo Valente hateten, loron ohin ne’e nia-sentidu importante tebes, loron ba direitu labarik sira, direitu labarik timor-oan mak tenke hetan edukasaun di’ak, labarik sira mak sei determina futuru nasaun.
Ha’u hato’o ha’u-nia parabéns ba imi-hotu no labarik hotu-hotu iha Timor-Leste! Iha paíz barak, labarik ho idade hanesan imi barak mak labele asesu ba eskola tanba sira sei hasoru funu, sira sei hamlaha no sira sei tanis hela.

Tanba-ne’e, ha’u husu ba imi-hotu, mai ita hotu-hotu “um minuto silêncio” hodi fó solidaredade no homenajem ba imi-nia maluk sira iha Timor no mundu tomak mak agora dadaun sei hasoru susar, funu no violénsia; husu Ministru Justisa.

Hafoin ne’e, Ministru Justisa kontinua ninia diskursu, diskursu ho jestu interativu no komunikativu tebes, kontente, hamnasa no basa-liman k’solok, dala balun Ministru Justisa so’e perguntas baziku balun ba estudante sira kona-ba saída mak direitu, saída mak dever, sá importansia eskola, no papel labarik nian nu’udar futuru nasaun nian.

Ministru Justisa hateten liután, ha’u rona katak estudante sira dalabarak ho liafuan kroat hasoru profesores sira, ha’u hakarak hateten ba oan sira, katak, papel profesores importante tebes, profesores nia sakrifísiu bót ba imi-nia futuru, sira mak sei lori imi atu ba ne’ebé. Tanba-ne’e, imi tenke rona no respeita imi-nia profesores sira, nasaun nia futuru laós iha governante nia liman de’it, maibé iha ita-nia profesores nia liman.

Hanesan governante, ami sei esforsu nafatin atu halo buat hotu-hotu hodi nune’e bele hákonu nesesidade sira iha eskola,
hadia eskola iha Dili no iha munisípiu sira, hadia fasilidade sira no aumenta livru para imi tuir prosesu aprendizajem ho di’ak; promete Ministru Justisa, Ivo Valente.

Iha biban ne’e, Ministru Justisa mós halo vizita ba dapur merenda escolar nian hodi hare’e besik menu aihan ba estudante sira, wainhira to’o iha fatin refere, estudante sira forma no simu dadaun aihan. Uza oportunidade vizita ne’e, Señor Ministru ajuda fahe bee-hemu ba alunus sira, no koalia ho Diretór Eskola Pre-Sekundáriu 30 Agusto kona-ba fornesimentu tipu aihan loron-loron ba estudante sira no kestaun hijienidade.

Maria de Lourdes Xavier Lin
Media Officer
Gabinete Ministru Justisa