DILI, GMJ – Segunda-Feira, loron 23 fulan-Novembru 2015, S.E. Ministru Justisa Ivo Valente hala’o reuniaun ho Señora Embaixadora, Xéfi Delegasaun União Europeia Sylvie Tabesse no Señora Responsável Koordenasaun Externa Gabriela Köhler-Raue iha Gabinete Ministru Justisa, Dili.

Reuniaun ne’e koalia kona-ba preparasaun diálogu polítiku entre União Europeia ho Timor-Leste, introduz posibilidade apoiu União Europeia ba Governu Timor-Leste; liu-liu ba iha Ministériu Justisa liu hosi formasaun espesializada ba Polísia Sientífika Investigasaun Kriminál (PSIK), apoiu tékniku ba disputa rai no propriedade no mós reforma setór justisa.

Ministru Justisa iha ninia lian makloke hato’o nia gratidaun ba União Europeia ne’ebé mak fó ona nia apoiu ba Governu Timor-Leste liu hosi fornesimentu laboratóriu, peritu hosi Portugal no formasaun espesializada ba ajente PSIK sira.

“Lori Ministériu Justisa, ha’u hakarak expressa hau-nia gratidaun ba apoiu União Europeia nian através hosi Instituto Camões ba PSIK, ami sei presiza apoiu hosi ita-bót sira iha área formasaun ba kestaun espesífiku ba investigasaun kriminalidade nian, tanba-ne’e, ha’u konvida ita-bót sira atu kontinua apoiu iha fulan hirak mai tán,” husu Ministru Justisa, Ivo Valente.

Iha biban ida ne’e, Embaixadora União Europeia Sylvie Tabesse iha Timor-Leste hateten, iha tinan oin (2016), ami sei fó apoiu ba kestaun boa-governasaun, jestaun finansiamentu públiku no hasa’e abilidade dezenvolvimentu rurál tuir Programa Indikativu Nasionál mak asina ona iha loron 02 fulan-Setembru iha Samoa.

Ami mós sei buka dalan apoiu tuir mai ba iha Ministériu Justisa em kestaun tékniku ka peritu kurtu prazu nian ba disputa rai depois-de Lei Rai aprova, kestaun rejistu prediál (Land dan Property Registry Law) no posibilidade balun ba kestaun polítika reforma setór justisa nian; hateten Sylvie Tabesse.

Reuniaun iha ámbitu amizável ne’e, parte-rua buka partilla informasaun ba malun kona-ba kompozisaun Komisaun Reforma Setór Justisa nian, kestaun koordenasaun institusionál, diálogu polítika, apoiu União Europeia ba Observadór sira iha Eleisaun Jerál, Fundu Dezenvolvimentu Kapitál Umanu, kooperasaun Timor-Leste ho Portugal no seluk-seluk tán.

Maria de Lourdes Xavier Lin,
Media Officer
Gabinete Ministru Justisa