DILI, CFJ – Kuarta-Feira, loron 25 fulan-Novembru 2015, S.E. Ministru Justisa Ivo Valente halo abertura ba Diagnóstiku Nasionál Fortalesimentu Institusionál iha Centro Formação Jurídica (CFJ), Kaikoli, Dili.

Diagnóstiku Nasionál ba daruak hosi Sekretáriu Estadu Fortalesimentu Institusionál (SEFI) ne’e halo ba parseiru Ministériu Justisa nian. Nia objetivu mak atu rona hanoin no perspetiva hosi parseiru nasionál no internasionál sira mak durante ne’e fó ona sira-nia apoiu ba servisu Ministériu Justisa nian.

Iha ninia diskursu abertura, Ministru Justisa Ivo Valente hateten, diagnóstiku nasionál reflete ona Planu Estratéjiku Dezenvolvimentu Nasionál tinan 2011-2030, katak tenke fortelese instituisaun Estado sira ba iha servisu administrasaun públiku nian, haforsa koordenasaun apropriadu ho parseiru sira no buka hákbi’it instituisaun atu nune’e hasa’e prestasaun servisu.

Ha’u apresia tebes ho dirijente prinsipál SEFI Sr. Francisco da Costa Soares ne’ebé hala’o ona faze di’ak tebes hodi simu ezersísiu no avaliasaun ho parseiru Ministériu Justisa nian, saída mak Ministériu Justisa atinzi agora konta mós esforsu tomak governante sira uluk nian, ha’u mai atu hatutan no haforsa nafatin administrasaun justisa nian; hateten Ministru Justisa.

Ministru Justisa kontinua, atu priense lakuna no frakeza sira kona-ba servisu Ministériu Justisa nian durante iha tinan 13 nia laran, ita sei halo auto-avaliasaun ne’ebé konklui ba iha aspetu-hitu mak hanesan; (1) Politika-vizaun-estratéjia-lideransa, (2) Estrutura governasaun no enkuadramento institusionál, (3) Rekursus humanus nian, (4) Jestaun rekursu sira seluk, (5) Produtu-rezultadu-prestasaun servisu, (6) Jestaun komunikasaun esternál no (7) Kultura organizasaun no komunikasaun internál.

“Ho kestaun hirak ne’e, ha’u fiar katak, rezultadu pretenente hosi diagnóstika ne’e sei hamosu rekomendasaun ruma ba prosesu hadiak servisu administrasaun Ministériu Justisa nian iha futuru,” hákotu Ministru Justisa.

Marka prezensa iha iha Diagnóstika Nasionál ba parseiru Ministériu Justisa nian mai hosi instituisaun no membru sosiedade sivil sira, Igreja, ajénsia internásionál sira, Reprezentante Embaixada Portugal, Brazil, Japaun, UN Woman, Unidade Assessoria Direitus Umanus ONU, USAID, Diretór PSIK, Diretór DNAF, Diretór Prizaun no Reinsersaun Sosiál, Inspetór-Jerál Ministériu Justisa, fasilitadór sira hosi SEFI no seluk-seluk tán.