MINISTRU JUSTISA FÓ OMENAJEN BA RESTU MORTAIS – PATRIÓTA LIBERTASAUN NASIONÁL IHA CAILACO

BOBONARO – Sexta-Feira, loron 27 fulan-Novembru 2015, tuku 04:00 lokoraik, S.E. Ministru Justisa Ivo Valente to’o iha Postu Administrativu Cailaco, Munisípiu Bobonaro hodi fó omenajen ba restu mortais – patrióta libertasaun nasionál.

Omenajen ba patrióta sira (restu mortais) halo parte hosi atividade simultante Ministru Justisa nian hodi komemora Loron Independénsia RDTL ba dala-40 iha Maliana, Munisípiu Bobonaro.

Iha ninia vizita, Ministru Justisa simu informasaun hosi Administradór Postu Cailaco, Alfredo Moniz da Costa katak, restu mortais patrióta libertasaun nasionál halibur hosi inisiativa família no autoridade lokál sira, no dadaun ne’e halo’ot iha fatin temporária tolu mak hanesan; aula postu administrasaun rasik, ida iha Suku Atudara no seluk tán iha Suku Meligo.

Hanesan responsavel postu, Alfredo Moniz husu ba Ministru Justisa atu halo vizita mós ba iha fatin temporáriu restu mortais rua seluk, ho nune’e, Señor Ministru Justisa hakat ba iha fatin idak-idak hodi hare’e rasik kondisaun urnas, fó-nia omenajen no hasoru família patrióta sira.

Iha oportunidade fó omenajen ne’e, Ministru Justisa hateten, "Iha ha’u-nia vizita ne’e hodi hare’e no fó onra ba ita-nia herói sira ne’ebé mak husik ona ita, hodi agradese ba sira-nia luta, sakrifísiu no mehi ba ukun rasik án, sira-nia mehi atinzi duni. Ho nune’e, Estadu ka Governu iha responsabilidade atu kontinua patrióta sira-nia mehi ba povu hoto-hotu nia moris di’ak, Governu kontinua mehi herói sira ho dezenvolvimentu; kontinua hadia ita-nia estrada, fornese bee-mós, eletrisidade ba povu, hari’i eskola, hafasil asesu ba saúde no asesu justisa formál ba ita-nia povu."

Tanba-ne’e, ita-hotu tenke kontinua servisu maka’as, fó esperansa ba ita-nia oan sira hodi bele asesu ba saúde no eskola di’ak, eskola mak fatin ba preparasaun jerasaun foun tuir mai, labarik no joven sira tenke badinas eskola no istuda maka’as tanba futuru nasaun ne’e iha sira-nia kaba’as, ita labele husik mehi herói sira monu le’et; enkoraja Ministru Justisa, Ivo Valente.

Urnas restu mortais ne’ebé Postu Administrasaun Cailaco halibur hosi Suku Ualu (8) hamutuk patrióta 115, no tuir informasaun kuaze patrióta 121 mak seidauk hetan. Tuir planu Governu nian, urna ne’e sei entrega ba iha Osoáriu Minisípiu Bobonaro hodi halo’ot ba iha Jardim Herói.

Relasaun ho restu mortais hirak ne’e, Ministru Justisa hateten, "ita hare’e herói barak mak mate, sira-nia sakrifísiu la-hanesan ho ita-nia sakrifísiu, herói sira sakrifíka án iha funu, mate no husik ruin rihun ba rihun namkare lemo-lemo, hodi ita-nia liberdade no moris di’ak nian.
Ita nia sakrifísiu mak tenke servisu maka’as, badinas no joven sira tenke istuda hodi ajuda Estadu/ Governu, atu nune’e ita-nia oan no beioan sira labele tán falta ropa, falta aihan no laiha uma atu toba."

Vizita fatin urnas restu mortais sira hákotu iha tuku 06:30 lokoraik, no delegasaun Ministru Justisa fila hikas ba Maliana hodi prepara ba atividade sira seluk.

Akompaña Ministru Justisa iha vizita ne’e mak; Administradór Munisípiu Bobonaro Domingos Martins, Komandante PNTL Munisípiu Bobonaro, Inspetór-Jerál Ministériu Justisa, Diretór PSIK, Diretór DNAF, Diretór DNPRS, Xéfi Gabinete Ministru Justisa, no mós direjente sira seluk hosi Ministériu Justisa nian hosi nasionál no Munisípiu Bobonaro.

Maria de Lourdes Xavier Lin
Media Officer
Gabinete Ministru Justisa