MALIANA – Hahu loron 26 to’o 28 fulan-Novembru 2015, S.E. Ministru Justisa Ivo Valente hala’o atividade oin-oin, simultáneamente iha Munisípiu Bobonaro hodi komemora Loron Independénsia Timor-Leste ba dala-40.

Ministru Justisa ho nia-komitiva to’o Maliana iha loron 26 fulan-Novembru, hahu ho ninia vizita servisu ba iha Edifísiu Administrasaun Munisípiu Bobonaro hodi hasoru malu ho Administradór Munisípiu Domingos Martins. Iha biban ne’e, atu rona no hare’e rasik preparasaun no atividade sira ne’ebé mak sei hala’o hosi Munisípiu Bobonaro ba komemora Loron Independénsia Repúblika Demokrátika Timor-Leste (RDTL) iha Maliana.

Depois rona progressu progpreparasaun ba atividade komemorasaun hosi Komisaun Organizadora, Ministru Justisa fó-nia apresiasaun ás ba Administradór Munisípiu Bobonaro ho ninia ekipa tomak, no nia husu atu kontinua servisu maka’as, dezenvolve liña koordenasaun ho di’ak no komunikasaun tenke mútua hodi nune’e susesa atividade sira tuir planu mak iha ona.

Iha loron 27 fulan-Novembru, tuku 09:00 OTL, Ministru Justisa halo vizita kortezia ba Amo Vigariu Jerál Diocese Maliana, Lucio de Deus, Pr. iha Edifísiu Diocese Maliana, Munisípiu Bobonaro.

Iha vizita kortezia ne’e, Ministru Justisa fó informasaun kona-ba isár bandeira ba loron 28 Novembru nian, informa mós atividade sira durante komemorasaun nian, koalia mós progressu konstrusaun Kapela iha Prizaun Maliana nian, no fó-nia agradesimentu ba Diocese Maliana ne’ebé kontribui ba prosesu akompañamentu prizioneiru sira iha prizaun nia laran.

Hafoin nia vizita, Ministru Justisa iha tuku 10:00 dadersan kontinua hakat ba iha Sentru Jináziu Maliana hodi halo abertura ba iha feira produtu lokál grupo feto sira ne’ebé mak hetan apoiu hosi ONG Internasionál World Vision iha Timor-Leste.

Iha oportunidade ne’e, Ministru Justisa halo vizita stand produtu lokál idak-idak, aliénde hare’e besik produtu lokál sira, Señor Ministru hatudu nia apoiu no entusiasmu. Ministru Justisa husu tuir tipu produtu sira, husu ninia folin no sosa balun, no mós koko produtu balun.

Iha lokoraik, tuku 03:00, Ministru Justisa Ivo Valente sai hosi Maliana no halo viajen ba iha Postu Administrativu Cailaco, viajen ne’e hodi fó-nia omenajen ba restu mortais-patrióta libertasaun nasionál iha fatin refere. (favór klik: http://www.mj.gov.tl/?q=node/995) Omenajen ba patrióta sira-restu mortais hanesan vaz parte hosi atividade simultánea Ministru Justisa nian hodi komemora Loron Independénsia RDTL.

Loron 28 fulan-Novembru, tuku 09:00 dadersan hanesan píku atividade tomak nian, S.E. Ministru Justisa Ivo Valente sai inspetór serimónia isár bandeira ba komemorasaun Independénsia RDTL ba dala-40 iha Sentru Jináziu Maliana.

Iha serimónia isár bandeira 28 Novembru ne’e, Ministru Justisa le’e diskursu no mensajen hosi S.E. Presidente-Repúblika Taur Matan Ruak ba povu Timor-Leste tomak, liu-liu ba povu Munisípiu Bobonaro.

Iha prosesu serimónia isár bandeira, Ministru Justisa nu’udar inspetór serimónia halo inspesaun ba parada hafoin serimónia hahu.

Isár bandeira la’o ho diak tebes, Polísia Nasional Timor-Leste (PNTL) Munisípiu Bobonaro mak sai hanesan Alta Entidade ba isár bandeira komemorasaun Loron Independénsia Timor-Leste 28 Novembru ba dala 40 iha Munisípiu Bobonaro.

Serimónia komemorasaun ne’e hetan siguransa masimu hosi PNTL Munisípiu Bobonaro nian.

Hafoin remata serimónia isár bandeira, aprezenta drum-band hosi Munisípiu Bobonaro nian, kompetisaun dada tali, kompetisaun sa’e bua, feira ne’ebé hatudu produtu lokál, aihan lokál, artesanatu oin-oin halo hosi tais Timor nian ne’ebé atrai ema barak hodi hare’e no sosa.

Marka prezensa iha serimónia ne’e; komunidade Bobonaro, Administraór Munisípiu, Postu Administradór sira, Xéfi Suku sira, estudante sira, Relijioza hosi Diocese Maliana, Ministériu Saúde, PNTL, Siguransa Sivil, Bombeiros, funsionáriu públiku sira, direjente ofisiál Ministériu Justisa, konvidadus internasionál, ONG Lokál, Nasionál no Internasionál, entidades sira seluk tán.

Depois iha lokoraik tuku 05:00 OTL, Ministru Justisa kontinua inspetór ba serimónia arriár bandeira ba komemorasaun Loron Independénsia RDTL. Serimónia arriár bandeira nasionál iha Munisípiu Bobonaro hákotu ho susesu bót.

Iha kalan tuku 08:30 OTL, Ministru Justisa ho Administradór Munisípiu Bobonaro, no ekipa tomak asisti tiru fuguete iha Jináziu Maliana hodi diverte populasaun Maliana ba komemorasaun Independensia Repúblika Demokrátika Timor Leste (RDTL), tiru fuguete ne’e hetan entusiasmu maka’as hosi komunidade no labarik sira.

Iha serimónia nia rohan, tuku 09:00 kalan, Ministru Justisa ho autoridade munisípiu sira, parseiru-doadór sira, ONG lokál, Nasionál no Internasionál selebra 28 Novembru iha Edifísiu Munisípiu Bobonaro, ho jantár konfraternizasaun, kanta muzika, fahe premiu no seluk-seluk tán.

Akompaña atividade simultánea Ministru Justisa Ivo Valente mak; Administradór Munisípiu Bobonaro Domingos Martins, Segundo Komandante PNTL Munisípiu Bobonaro Inspetór João da Costa, Diretór PSIK Vicente Fernandes e Brito, Xéfi Gabinete Ministru Justisa Evangelino Belo, Diretór DNAF Crisogno da Costa Neto, Diretóra CFJ Marcelina Tilman, Diretór DNSPRS Helder Cosme Marçal Belo, Inspetór-Jerál Lucas António da Costa, Diretór Konservatóriu no Rejistu Notariadu Munisípiu Bobonaro João Maupelo da Costa, Diretór Terras Propriedade Munisípiu Bobonaro Damião Fontes Lobato, Sub-Inspetór GIA Antonio Fatima no direjente ofisiál ámbitu Ministériu Justisa nian.