REPÚBLICA DEMOCRÁTICA DE TIMOR-LESTE

REPÚBLICA DEMOCRÁTICA DE TIMOR-LESTE

Diploma Ministerial

21/2013

Elaborasaun Planu Investimentu Distritál



Objetivu prinsipál hosi Dekretu-Lei kona-ba Planeamentu Dezenvolvimentu Integradu Distritál (PDID) mak atu estabelese no utiliza instituisaun ne’ebé eziste iha nível distritu, sub-distritu no suku hodi responsabiliza ba elaborasaun no implementasaun projetu infraestrutura sira-ne’ebé identifika iha Planu Investimentu Distritál (PID).



Dekretu-Lei ne’e implementa ona iha nível lokal husi tinan 2012 no durante periodo nee fo ba Ministeriu Administrasaun Estatal lisaun atu hadia prosesu elaborasaun Planu Investimentu Distrital nebe iha aprovadu, liu husi Diploma Ministerial Nº.9/2012, 4 Abril.

Objetivu prinsipál hosi Diploma Ministerial ne’e mak atu harmoniza prosedimentu aplikavel iha PDID ho Planu Desenvolvimento Nasional Suco (PNDS) no hadia instrumentu planeamentu ne’ebé orgaun PDID utiliza iha nível distritu hodi prioritiza didiak proposta nebe komunidade identifika atu implementa liu husi PDID.



Nune’e, Governu, liu hosi Ministru Administrasaun Estatál no Ordenamentu Territóriu, fó ordén, tuir previzaun iha nº.2 artigu 19º, Dekretu-Lei nº.4/2012, 15 Fevereiro, atu publika diploma tuir-mai:



Seksaun I

Dispozisaun Jerál



Artigu 1º

Objetu



Diploma ida-ne’e regula prosesu ne’ebé órgaun hosi Planea-mentu Dezenvolvimentu Integradu Distritál (PDID) hala’o hodi identifika no defini prioridade investimentu hodi fornese servisu públiku iha distritu liuhosi Planu Investimentu Distritál (PID).



Artigo 2º

Definisaun Planeamentu Dezenvolvimentu Integradu Distrital



1. Planeamentu Dezenvolvimentu Integradu Distrital (PDID) refere ba intrumentu legal ho objektivu atu harmoniza programa dezenvolvimentu lokal hanesan Programa Desenvolvimentu Descentralizadu no Planu Nasional Dezenvolvimentu Suku, liu husi prosesu ida deit ba planeamentu no implementasaun projetu infraestrutura ba prestasaun servisu iha nivel Distritu,Sub-Distritu, no Suku.



2. Programa Dezenvolvimentu Descentralizadu refere ba programa nebe implementa projetu infraestrutura ho valor $0 too $500,000.00 dolar amerikanu, aprovadu iha nível Distritu atu implementa liu husi kontratu ho empreza konstrusaun sivil.



3. Planu Nasional Dezenvolvimentu Suku refere ba programa nebe implementa projetu infraestrura ho valor menus $70,000.00 dolar amerikanu aprovadu iha nivel suku atu implementa liu husi komunidade lokal iha nível Suku



Artigu 3º

Órgaun elaborasaun PID



Entidade ka órgaun nee’bé partisipa iha elaborasaun PID mak:



a) Konsellu Suku;



b) Delegasaun Territoriál (DT);



c) Komisaun Dezenvolvimentu Sub-distritál (KDSD);



d) Komisaun Dezenvolvimentu Distritu (KDD);



e) Ministeriu responsável ba Administrasaun Lokál;



f) Liña Ministeriál;

g) Ajénsia Dezenvolvimentu Nasionál (ADN).



Artigu 4º

Prinsípiu Elaborasaun PID



1. Planu Investimentu Distritál (PID) mak lista projetu infraestrutura ne’ebé Komisaun Dezenvolvimentu Distritál (KDD) aprova hafoin prosesu konsulta ne’ebé órgaun PDID hala’o ho komunidade.



2. PID elabora tinan-tinan bazeia ba armonizasaun entre Planu Dezenvolvimentu Suku (PDS) no Planu Estratéjiku Dezenvolvimentu Nasionál (PEDN).



3. Alokasaun orsamentu Jeral Estadu sai baze ba implementa-saun projetu ne’ebé aprova iha tinan kotuk no mós sai hanesan orsamentu indikativu ba planeamentu tinan fiskál tuir-mai.



Artigu 5º

Definisaun Ferramentu PID



1. Ta´es inisiál mak mekanizmu ne’ebé órgaun PDID sira halo hodi hili ka elimina proposta hirak ne’ebé bele hatama ba Planu Investimentu Distritál tuir kritéria ne’ebé determina iha menu indikativu, haree aneksu nº.1 hosi diploma ida-ne’e.



2. Menu indikativu indika lista exemplu investimentu tuir sek-tor 5 ba finansiamentu PDID ne’ebé iha impaktu direta no indireta ba komunidade nia nesesidade báziku, utiliza ba dezenvolvimentu infraestrutura no fó benefísiu ba uma kain barak.



3. Bazeia ba menu indikativu, investimentu hirak tuir-mai ne’e labele tama PDID:



a) Konstrusaun ka reabilitasaun edifisiu relijiozu;



b) Konstrusaun ka reabilitasaun edifisiu ba explorasaun interese privadu;



c) Ekipamentu ho material eskritoriu (hanesan computador, impresora, papel ka seluk tan);



d) Pagamentu salariu, divida, indemnizasaun no kustu re-gular hirak seluk tan;



e) Programa kreditu.



4. Klasifikasaun tuir paralelizmu mak ferramenta ne’ebé utiliza hodi halo komparasaun sistemátika entre projetu ida ho ida seluk ho objetivu atu fasilita hodi foti desizaun kona-ba projetu ne’ebé atu sai nu´udar prioridade.



5. Ferramenta Matriz Setór Multi-kritéria mak ferramenta ne’ebé KDD utiliza hodi halo prioritizasaun ba proposta ida-idak tuir análize imparsiál ho objetivu atu fasilita komparasaun projetu hirak ne’ebé tau ona iha setór ida nia laran tuir kritéria hirak tuir-mai ne’e:



a) Prioridade as liu ba prioridade primeiru iha KDSD;

b) Prioridade ba projetu nebe fo servisu ka benefisiu diretu ba komunidade;



c) Prioridade ba projetu nebe lokaliza iha area remota;



d) Prioridade ba projetu nebe hadia problema tuir rezultadu sensus



6. Ferramenta Matriz Multi-Setór Multi-Kritéria mak ferramenta ida-ne’ebé KDD utiliza hodi halo prioritizasaun ba proposta ida-idak tuir análize imparsiál ho objetivu atu fasilita komparasaun projetu hirak hosi setór hotu-hotu tuir kritéria hirak tuir-mai ne’e:



a) Prioridade ba projetu ho rezultadu as liu hosi matriz se-tór multi-kritéria;



b) Prioridade ba projetu nebe aumenta kapasidade ba prestasaun servisu liu husi rehabilitasaun;;



c) Prioridade ba projetu nebe relasiona ho Millennium De-velopment Goals;



d) Prioridade ba projetu nebe fo benefisiu diretu ba feto.



Seksaun II

Prosesu Elaborasaun PID



Artigu 6º

Faze Elaborasaun PID



Elaborasaun PID sei halo fazeadamente tuir pasu hirak tuir-mai ne’e:



a) Identifikasaun nesesidade dezenvolvimentu iha suku;



b) Prioritizasaun nesesidade dezenvolvimentu iha Suku no Delegasaun Territoriál nível sub-distritu;



c) Prioritizasaun no aprovasaun nesesidade iha KDSD no Delegasaun Territoriál nível distritu;



d) Ta’es, verifikasaun no avaliasaun iha nível distritu;



e) Prioritizasaun proposta no preparasaun esbosu PID hosi KDD;



f) Aprezentasaun no diskusaun esbosu PID ne’ebé prepara hosi KDD iha SKDD no SKDN;



g) Finalizasaun no aprovasaun PID ne’ebé prepara hosi KDD;



h) Submisaun PID ne’ebé aprova ba Ministériu Adminis-trasaun Estatal;



i) Reajustamentu PID tuir Orsamentu Jerál Estadu ne’ebé aprova hosi Parlamentu Nasionál.



Artigu 7º

Identifikasaun Nesesidade Suku



1. Identifikasaun nesesidade suku mak prosesu konsulta no identifikasaun proposta ne’ebé Konsellu Suku hala’o iha suku ida-idak hodi haruka ba KDSD.



2. Konsellu Suku sira bele hahú prosesu konsulta no identifikasaun sira nia nesesidade hafoin Governu, liu hosi ministériu responsável ba Administrasaun Lokál, anunsia numeru totál proposta projetu ne’ebé orgaun PDID iha distritu bele aprezenta,.



3. Konsellu Suku asegura no atualiza lista PDS liuhosi konsulta ho komunidade iha nível aldeia hodi hetan finansiamentu PDID, tuir manuál kona-ba Planu Dezenvolvimentu Suku.



4. Bainhira Konsellu Suku identifika sira nia nesesidade tenki determina proposta ne’ebé hakarak implementa liu husi Planu Dezenvolvimentu Desentralizadu (PDD) no Planu Nasional Dezenvolvimentu Suku (PNDS), tuir regra matadalan PDID..





Artigu 8º

Prioritizasaun Nesesidade Suku



1. Prioritizasaun nesesidade iha nível suku mak prosesu examinasaun no análize ne’ebé Konsellu Suku hala’o hodi ta’es no prioritiza proposta hosi Planu Dezenvolvimentu Suku (PDS).



2. Hafoin prosesu konsulta, Konsellu Suku utiliza menu indikativu hodi hala’o ta’es inisiál molok halo prioritizasaun.



3. Hodi hala’o prioritizasaun no aprovasaun proposta projetu ne’ebé bele hetan finsansiamentu PDID, Konsellu Suku tenki utiliza ferramenta Klasifikasaun tuir paralelizmu.



4. Konsellu Suku tenki haruka ba KDSD lista proposta prioridade no deskrisaun projetu aprovadu atu implementa tuir PDD no PNDS.



5. Proposta projetu PNDS ne’ebé Konsellu Suku haruka tuir númeru anteriór, iha objetivu atu bele fasilita prosesu ta´es inisiál KDSD no labele tama prosesu prioritizasaun hosi KDSD no KDD.



6. Ministru husi Ministeriu Administrasaun Estatal, liu hosi despaxu, mak determina totál proposta projetu ne’ebé suku ida-idak tenki haruka tinan-tinan.



Artigu 9º

Identifikasaun nesesidade



Delegasaun Territoriál nível Sub-distritu



1. Identifikasaun nesesidade investimentu Delegasaun Territoriál nível sub-distritu mak prosesu identifikasaun projetu ne’ebé unidade delegasaun territoriál nível sub-distritu hala’o hodi aprezenta proposta projetu ba finansiamentu PDID.



2. Bainhira suku submete proposta projetu ba KDSD, Delegasaun Territoriál iha nível sub- distritu mós tenki haruka proposta projetu ne’ebé aprova ba KDSD.

3. Ministru husi Ministeriu Administrasaun Estatal, liuhosi despaxu, mak determina totál proposta projetu ne’ebé delegasaun territoriál ida-idak tenki haruka tinan-tinan.



Artigu 10º

Identifikasaun no Prioritizasaun Nesesidade KDSD



1. Prioritizasaun nesesidade KDSD mak prosesu ne’ebé KDSD hala’o hodi prioritiza proposta projetu hirak ne’ebé simu hosi suku no Delegasaun Territoriál nível sub-distritu.



2. Hafoin simu proposta projetu, KDSD tenki utiliza menu indikativu hodi halo lista ta’es inisiál molok halo prioritizasaun.



3. KDSD tenki utiliza ferramenta klasifikasaun tuir paralelizmu atu hala’o prioritizasaun no aprovasaun proposta projetu ne’ebé atu hetan finsansiamentu PDID.

4. KDSD haruka ba KDD lista prioridade no deskrisaun pro-jetu atu implementa tuir PDD no aneksa lista prioridade dezenvolvimentu suku ne’ebé atu implementa liu hosi PNDS.



5. Ministru husi Ministeriu Administrasaun Estatal, liu hosi despaxu, mak determina totál proposta projetu ne’ebé KDSD ida-idak tenki haruka tinan-tinan.



Artigu 11º

Identifikasaun nesesidade



Delegasaun Territoriál nível Distritu



1. Identifikasaun nesesidade delegasaun territoriál nível distritu mak prosesu identifikasaun projetu ne’ebé delegasaun territoriál nível distritu sira hala’o hodi aprezenta proposta projetu hirak ne’ebé atu rekomenda ba KDD.



2. Bainhira KDSD submete proposta projetu ba KDD, Delegasaun Teritorial iha nível distritu mós tenki haruka deskrisaun projetu ne’ebé aprova ba KDSD.



3. Ministru husi Ministériu Administrasaun Estatal liu hosi despaxu, mak determina totál proposta projetu ne’ebé Delegasaun Territoriál ida-idak tenki haruka tinan-tinan.



Artigu 12º

Ta’es, Verifikasaun no Avaliasaun



1. Ta’es, verifikasaun no avaliasaun mak prosesu ne’ebé Sekretariadu no EVAS hala’o hodi ta’es, verifika no avalia proposta projetu ne’ebé KDD simu hosi KDSD no Delegasaun Territoriál nível distritu.



2. Sekretariadu bazeia ba menu indikativu atu halo ta’es inisiál ba proposta hotu-hotu ne’ebé KDD simu no haruka ba Xefe EVAS sira lista proposta projetu atu prepara verifikasaun no avaliasaun proposta projetu..



3. Hafoin simu lista proposta projetu ba verifikasaun no avaliasaun, Ekipa Verifikasaun, Avaliasaun no Supervizaun (EVAS) vizita fatin projetu hodi verifika no avalia viabilidade proposta ida-idak,

4. Iha prosesu verifikasaun proposta, EVAS tenki haree ba fatór krítiku hirak tuir-mai ne’e:



a) Problema kona-ba rai;



b) Problema kona-ba direitu propriedade;



c) Risku ba meiu-ambiente;



d) Fatin lulik ka sagradu.



e) Wainhira iha konflitu ho parte rua hadau malu konaba fatin;



5. EVAS tenki elimina husi prosesu planeamentu proposta projetu ne’ebé identifika katak iha fatór krítiku.



6. Hafoin verifikasaun, Sekretariadu no EVAS tenki prepara dezeñu no kalkula kustu hosi proposta projetu ida-idak atu hetan aprovasaun hosi órgaun kompetente iha nível distritu.



Artigu 13º

Prioritizasaun proposta no preparasaun PID



1. Prioritizasaun proposta mak prosesu ne’ebé Sekretariadu ho EVAS halo hodi prioritiza proposta hotu-hotu ne’ebé hetan ona ta’es, verifikasaun, avaliasaun.



2. Sekretariadu ho EVAS utiliza ferramenta Matriz Setór Multi-Kritéria no Matriz Multi-Setór Multi-Kritéria hodi prioritiza proposta projetu ba PID.



3. Sekretariadu tenki aprezenta ba KDD relatóriu konaba prosesu planeamentu no sumáriu proposta projetu ba PID.



Artigu 14º

Aprovasaun esbosu Planu Investimentu Distritál



1. KDD tenki diskute relatóriu no sumáriu projetu ne’ebé Sekretariadu no EVAS aprezenta hodi aprova esbosu Planu Investimentu Distritál.



2. Esbosu Planu Investimentu Distritál mak lista proposta investimentu ne’ebé KDD aprova no propoin atu hetan finansiamentu hosi PDID.



3. Proposta projetu ba konstrusaun ka reabilitasaun edifisiu administrasaun públika nebe la tama PID, Koordenador KDD bele haruka ba MAE ka ba Ministeriu sira seluk ho kompetensia iha nivel sentral atu aprezenta projetu nee liu husi SKDN.



4. Esbosu Planu Investimentu Distritál ne’ebé KDD aprova tenki inklui lista projetu ne’ebé atu implementa ho PDD no PNDS.



Artigu 15º

Sorumutu Koordenasaun Dezenvolvimentu Distritu



1. Sorumutu Koordenasaun Dezenvolvimentu Distritu (SKDD) mak sorumutu ida-ne’ebé organiza hosi Koordenadór KDD ho partisipasaun membru sira hotu no envolve parte interesadu hotu-hotu iha nível distritu, hodi fornese informasaun, diskute no harmoniza proposta projetu esbosu PID.



2. Parte interesadu nível distritu mak:



a) Funsionáriu administrasaun distritu;



b) Funsionáriu administrasaun sub-distritu;



c) Delegasaun territoriál nível distritu;



d) Sosiedade Sivil ne’ebé hala’o servisu iha distritu;



e) Diretór-Jerál hosi ministériu ida-idak ka ninia reprezen-tante.



3. Rezultadu hosi SKDD mak esbosu PID ne’ebé atu aprezenta iha SKDN no tenki iha ata.



4. KDD ida-idak tenki submete esbosu PID ba ministériu responsável ba Administrasaun Lokál atu fahe ba liña minisériu sira molok hala’o SKDN;



5. DT nível distritu tenki hato’o esbosu PID ne’ebé aprova liu hosi SKDD ba ministeriu tutela molok hala’o SKDN.



Artigu 16º

Sorumutu Koordenasaun Dezenvolvimentu Nasionál



1. Sorumutu Koordenasaun Dezenvolvimentu Nasionál (SKDN) mak sorumutu ida-ne’ebé lidera hosi Primeiru-Ministru ho partisipasaun parte interesadu hotu-hotu iha nível distritál no nasionál, fasilita hosi ministériu responsável ba Administrasaun Lokál no ministériu Finansas.



2. Parte interesadu sira-ne’ebé partisipa iha nível distritál no nasionál ne’e mak:



a) Reprezentante membru KDD;



b) Membru Governu;



c) Sosiedade Sivil ne’ebé hala’o servisu iha distritu;



d) Parseiru dezenvolvimentu.



3. SKDN hala’o hodi fornese informasaun, diskute no harmoniza proposta projetu hodi evita duplikasaun entre Planu Distritu nian ho Planu Dezenvolvimentu Nasionál;



4. Rezultadu hosi SKDN mak konfirmasaun kona-ba lista pro-jetu PID no tenki iha ata.



Artigu 17º

Finalizasaun PID



1. Hafoin SKDD no SKDN, Sekretariadu KDD realiza prosesu finalizasaun PID atu hetan aprovasaun KDD.



2. KDD tenki submete ba Governu PID ne’ebé aprova ona hamutuk ho dokumentu tuir-mai nee:

a) Planu Asaun Anuál (PAA) KDD;



b) Matriz Relatóriu Trimestrál (MRT) KDD;



c) Dokumentu deskrisaun projetu;



d) Dokumentu dezeñu no kustu projetu.



3. Dokumentu ne’ebé identifika iha alínea a) no b), númeru 2 iha leten tenki submete ba ministériu responsável ba Administrasaun Lokál hamutuk ho Administrasun Distritu nian.



4. Ministériu responsável ba Administrasaun Lokál mak submete PID ba ministériu Finansas no fó kópia ba ministériu relevante sira.



Artigu 18º

Reajustamentu PID



1. Bainhira iha alterasaun ba proposta dotasaun orsamentu, KDD tenki reajusta PID tuir Orsamentu Jerál Estadu ne’ebé Parlamentu Nasionál aprova.



2. Reajustamentu ne’e tenki hala’o moluk implementasaun PID.



Seksaun IV

Dispozisaun Finál no Tranzitóriu



Artigu 19º

Ferramenta no Formuláriu PID



Ferramenta no formuláriu ofisiál hirak ne’ebé atu utiliza hodi elabora PID sei fó-sai iha Matadalan Planeamentu PDID nebe aprovadu liu hosi Despaxu Ministru husi Ministériu Administrasaun Estatal.



Artigu 20º

Revogasaun



Diploma ne’e revoga Diploma Ministerial Nº.9/2012, 4 Abril konaba Elaborasaun Planu Investimentu Distrital.



Artigu 21º

Tama iha vigór



Diploma ida-ne’e tama iha vigór iha loron tuir-mai hafoin publika iha Jornál Repúblika no sei aplika ho efeito retroaktivu ba prosesu elaborasaun Planu Investimentu Distrital nebe hahu ona iha nível Suku.





Aprova hosi Ministru Administrasaun Estatál no Ordenamentu Territóriu iha loron 18, fulan Outubro, tinan 2013





Publika,







Ministru Administrasaun Estatál







Jorge da Conceição Teme