ORIENTASAUN KDL BA GOVERNANTES, PRATIKANTE MEDIA, INSTITUTO RELIZIOZA NO ONG IHA DISTRITO AILEU, 3 OUTUBRO 2008

Ministra da justiça

Hanesan Estado Parte ba Konvensaun Direitu Labarik (KDL) nian,Ita iha obrigasaun atu integra no implementa prinsipiu KDL nian iha programa dezenvolvimentu nasional.

Nomos hatúr ona iha Artigu 42 KDL nian katak, Estado Parte iha obrigasaun atu habelar prinsipiu KDL nian ba ema adultu nolabarik sira.

Bazeia ba prinsipiu hirak ne'e, Direcção Nacional dos Direitos Humanos e Cidadania-Ministério da Justiça servisu hamutuk nia parseiru UNICEF hala'o programa sorumutu ho autoridade governo nian, pratikante media, instituisaun relizioza no sosiadade sivil iha distritu kona ba atu habelar liu tan prinsipiu KDL nomos atu tau iha komitmentu ita hotu nian kona ba implementasaun prinsipiu KDL ne'e rasik. Programa sorumutu ne'e hala'o iha distritu identifkadu hanesan Distrito Aileu, Manatuto no Oe-cusse. Tuir mai ba tinan oin, sei habelar tan distrito Viqueque no Ermera.

Objetivu principal husi atividade orientasaun KDL ne'e maka:atu hasa'e koñesimentu governantes,pratikante media,instituisaun relizioza,no sosiadade sivil sira kona ba KDL ne'e rasik nomos atu habelar informasaun kona programa Governo nian iha area labarik nian,habelar no promove KDL iha servisu fatin nomos komunidade tuir knar no responsabilidade ida-idak nian no objetivu ida ikus maka atu integra no implementasaun husi valor KDL nian tuir profesionalismu ida-idak nian, hanesan iha area edukasaun, saude, justisa, seguransa, social. Informasaun, saneamentu, protesaun no seluk tan.

Ba Distrito Aileu, foin realiza iha loron 3 de Outubro de 2008. Programa ne'e hetan partisipasaun maximu husi konvidadus sira inklui nai ulun sira iha Distrito Aileu (hanesan Administrador,Adjunto Administrador no Administrador Sub-Distritos).Iha sorumutu ne'e, hamosu mos komitmentu husi partisipantes sira atu promove no proteje direitu labarik nian tuir prinsipiu KDL. Komitmentu hirak ne'e hatudu liu husi asinatura partisipantes nian ba dokumentu komitmentu atu implementa prinsipiu KDL nian.Asinatura dokumentu ne'e hahú husi Sr. Administrador Distrito Aileu nian, molok atu ensera sorumutu ne'e.

Sorumutu hanesan sei hala'o mos iha Distrito Manatuto iha loron 10 Outubro 2008 tuir mai.