MINISTRU JUSTISA ADIA ASINATURA MEMORANDUM DE ENTENDIMENTU ENTRE MINISTÉRIU JUSTISA HO UNITED NATION DEVELOPMENT PROGRAMME.

Dili, MJ: Ministru Justisa Dr. Tiago Amaral Sarmento adia asinatura Memorandum de Entendementu ne’ebé tuir planu sei asina entre Ministériu Justisa (MJ) ho Programa Nasoens Unidas ba Dezenvolvimentu (UNDP- sigla ingles) ka United Nation Development Program (UNDP).

Haktuir ba ajenda husi Ministru Justisa nian; Segunda-feira (18/07) ohin, iha oras tuku 10:00 dader, Ministru Justisa Dr. Tiago Amaral Sarmento asina Memorandum de Entendementu entre Programa Nasoens Unidas ba Dezenvolvimentu (UNDP-sigla Ingles) ho Ministériu Justisa Repúblika Demokrátika Timor-Leste.

Maibe seremonia asinatura refere labele realiza tanba lideransa maximu UNDP ne’ebé atu asina memorandum refere la iha fatin, informa Ministru Justisa ba Media Gabinete MJ.
Aleinde ne’e, Ministru Justisa mós rezeita atu asina memorandum de entendementu refere ho reprezentante ne’ebé hetan delegasaun kompetensia husi UNDP Country Representative iha Timor Leste.

Area hirak ne’ebé iha kontiudu kooperasaun refere mak hanesan tuir mai :

  • Hametin kapasidade ba Ministéru Justisa nian no ninia instituisaun afiliadu sira hanesan Sentru Formasaun Jurídiki no Judisiáriu (SFJJ) no Defensoria Publika (DP) iha promosaun no hala’o lei no ordem, direitus humanus no prestasaun servisu justisa nian ne’ebé efikás.
  • Asistensia teknika ba Ministériu Justisa no ninia instituisaun afiliadu hanesan SFJJ no DP, fasilidade koresional atu apoiu politika no Lejizlasaun asesu ba servisu Justisa, peskiza, administrasaun, no seluk tan.
  • Apoiu Infraestrutura/renovasaun hodi hametin kumprimentu ba padraun direitus umanus, resposta ba kestaun jéneru, seguransa saúde Publika, no sustentabilidade ambientál.
  • Apoiu COVID
  • Area sira seluk ne’ebé konsidera nesesariu no konkorda ona iha elaborasaun husi parte sira.

Kooperasaun ida ne’e sei konsentra ba asaun sira atu hametin kapasidade institusional no asesu ba Justisa grupu vulneravel no grupu marjinalizadu sira, hanesan feto, labarik-feto, ema ho defisiensia sira, nune’e mós atu hadiak kestaun sensivel- jeneru ba fasilidade koreksional sira.

Nune’e sei hein fali koordenasaun kontinuasaun entre Ministériu Justisa ho UNDP hodi bele realiza asinatura ba Memorandum de Entendementu refere.

18 Jullu 2022