Ministru Prezidensia Konsellu Ministrus, Fidelis L. Magalhaes ho Vise-Prezidente MCC nian, Cameron Alford asina akordu kompaktu ho valor millaun 484 iha Salaun Nobre, Ministériu Negosiu Estranjeirus no Kooperasaun, Praia dos Coqueiros, Dili, Tersa (19/07).

Dili, MJ: Tersa-feira (19/07), loraik hafoin partisipa iha seremonia hahu konstrusasun ba Biblioteka Nasionál Timor-Leste, iha Bairo-Pite, Dili. Ministru Justisa Dr. Tiago Amaral Sarmento kontinua partisipa iha seremonia asina akordu Kompaktu ho MCC ne’ebé realiza iha salaun Nobre, Ministériu Negosiu Estranjeirus no Kooperasaun, Praia dos Coqueiros, Dili.

Governu Timor-Leste ho ajénsia governamentál Amerikana Millennium Challenge Corporation (MCC), Tersa-feira (19/07) ohin, asina ona akordu kooperasaun ba programa ida ne’ebé sei implementa durante tinan lima, ho montante totál dollar Amerikanu millaun 484, ho objetivu atu redús ki’ak liuhusi kreximentu ekonómiku.

Akordu kompaktu ho MCC ne’e asina husi Ministru Prezidénsia Konsellu Ministrus, Fidelis Magalhães no Vise-Prezidente MCC nian, Cameron Alford, iha serimónia ida ne’ebé hala’o iha Ministériu Negósius Estranjeirus no Kooperasaun, Dili.

Ministru Justisa Dr. Tiago Amaral Sarmento konversa ho Enkaregadu Negosiu Estadus Unidus Amerka, Tom Dalley, iha biban asinatura akordu Kompaku MCC iha Salaun Nobre, Ministériu Negosiu Estranjeirus no Kooperasaun, Praia dos Coqueiros, Dili, Tersa (19/07).

Investimentu ne’e sei hare ba projetu prinsipál rua, ida atu hadi’ak sistema bee, saneamentu no drenajen, no ida seluk iha área edukasaun no formasaun nian. Ida uluk inklui tratamentu ba bee, ezgotu, sistema drenajen, reforsu ba instituisaun no entidade reguladór sira, no kriasaun abastesimentu sólidu ida ba bee no ezgotu ba uzu doméstiku. Ida tuirmai sei inklui Sentru Exelénsia Foun ida ba formasaun profesór foun sira ne’ebé sei garante padraun kualidade no lideransa nian.

Husi totál ne’ebé kalkula ona hamutuk dolar Amerikanu millaun 484, dollar Amerikanu millaun 420 sei disponibiliza husi MCC, no Governu Timor-Leste sei kontribui ho dolar Amerikanu millaun 64. Valór ne’ebé sei disponibiliza husi Timor-Leste sei aloka de’it ba projetu tratamentu bee, ezgotu no drenajen nian, husi osan sira-ne’e dollar Amerikanu millaun 34 sei uza hodi halo ligasaun ba uma sira no hodi dezativa fosa ne’ebé iha. Restu dolar amerikanu millaun 30 sei utiliza hodi apoia instalasaun sistema konvensionál no ba instalasaun bomba bee nian.

Konsellu Administrasaun MCC nian iha fulan-Dezembru tinan 2017, hili ona Timor-Leste, nu’udár nasaun ne’ebé kumpre rekizitu hodi implementa programa ida ne’e ba promosaun kreximentu ekonómiku, ne’ebé aliña ho prioridade sira dezenvolvimentu nasionál nian.

Ministru Prezidensia Konsellu Ministrus, Fidelis L. Magalhaes konversa Vise-Prezidente MCC nian, Cameron Alford ho iha Salaun Nobre, Ministériu Negosiu Estranjeirus no Kooperasaun, Praia dos Coqueiros,Dili, Tersa (19/07).

Iha loron 21 fulan-Jullu tinan 2018, Ministru Fidelis Magalhães no Vise-Prezidente Adjuntu MCC nian, Jonathan Brooks, asina ona akordu finansiamen Millennium Challenge Corporation, ho misaun atu identifika setór ekonómiku sira ne’ebé sei dezenvolve durante implementasaun programa ne’e nian.

Ekipa Dezenvolvimentu Kompaktu ba Dezenvolvimentu Governu Timor-Leste (CDT-TL) nian ida-ne’e, ofisiálmente kria ona iha loron 25 fulan-Marsu tinan 2019 no lidera husi Embaixadór Constâncio Pinto.
Hosi loron 11 to’o 17 fulan-Abríl tinan 2022, Ministru Fidelis Magalhães lidera delegasaun altu nivel ida, ne’ebé kompostu husi reprezentante 14 entidade governamentál oioin, halo viajen ba Washington, Estadus Unidus Amérika (EUA), hodi halo negosiasaun akordu kompaktu ho MCC.
Serimónia asinatura ne’e marka prezensa husi membru Governu Konstitusionál VIII, Parlamentu Nasionál, Autoridade Munisipál, lider komunitáriu, reprezentante husi organizasaun públika sira, sosiedade sivíl no setór privadu, korpu diplomátiku no parseiru sira dezenvolvimentu nian.

19 Jullu 2022
#Media Gabinete MJ