Ministru Justisa Dr. Tiago Amaral Sarmento hato'o ninia intervensaun iha seremonia abertura Training of Trainer (ToT) iha salaun Jackie Chang -UNICEF, iha UN Compound, Caicoli-Dili, Segunda (08/08).

Dili, MJ: Segunda-feira (08/08) dader ne'e, Ministru Justisa Dr. Tiago Amaral Sarmento no Provedora Direitus Humanus no Justisa (PDHJ) Dra. Jezuina M. F. Gomes halo ona abertura ba programa pilotu ba Kooperasaun entre Ministériu Justisa ho PDHJ iha Treinamentu ba Treinador sira ne’ebé konesidu ho Training of Trainer (ToT) ba kandidatu formador ba programa prevensaun tortura ba Guarda prizional sira iha Estabelesimentu Prizional sira iha Timor-Leste.
Objetivu husi programa ida ne'e hodi haforsa kooperasaun Instituisaun no esforsu koletivu hodi hametin promosaun no protesaun direitus umanus ba Guarda Prizional sira iha Timor-Leste nomos direitus umanus Prizioneiru sira nian.

Seremonia abertura ne'ebé halao iha oras tuku 9:00 dader Otl, ne'ebé hala'o iha salaun Jackie Chang -UNICEF, iha UN Compound ne'e partisipa husi Treinador hirak ne'ebé sei hetan treinamentu nemak hanesan ofisiais sira husi PDHJ no Diretor sira husi Guarda Prizional tolu hanesan Becora, Gleno no Suai nian.

Iha abertura Ministru Justisa husu ba Diretor hirak husi Ministériu Justisa no liuliu husi Estabelesimentu Prizional Becora, Gleno no Suai nian ne'ebé tuir formasaun TOT ida ne'e atu tuir no aprende ho diak lisaun sira, nune'e bele kontinua fó fali treinamentu ba Guarda prizionals sira iha Estabelesimentu Prizional tolu hanesan Becora, Gleno no Suai.

”Hanesan Ministru Justisa, hau orienta ba ita boot sira, aproveita didiak, hatene didiak materia saida mak treinador sira atu fó ba imi iha loron hirak tuir mai, para depois liu tiha ida ne’e, hamutuk nafatin ho PDHJ, Ministeriu Justisa organiza fali formasaun ba ita nia maun alin sira, ita nia maluk sira husi guarda prizional tolu hanesan Bekora, Gleno no Suai,” Ministru Justisa esplika.

Partisipantes no Treinador sira foto hamutuk ho Ministru Justisa Dr. Tiago Amaral Sarmento no Provedora Direitrus Humanus Dra. Jezuina F. M. Gomes hafoin halo abertura ba seremonia abertura Training of Trainer (ToT) iha salaun Jackie Chang -UNICEF, iha UN Compound, Caicoli-Dili, Segunda (08/08).

”Ita boot sira iha dever atu tuir formasaun ida ne’e, atu hatene liu, tamba hanesan treinador, Diretor sira mak tenki hatene liu, atu nune’e bele kontinua hanorin fali ba Guarda prizional sira seluk”.”Hanesan professor tenki han bosu liu alunos, kuando alunos mak han bosu liu professor, ne’e professor bele mate hamrik iha oin”. Ministru Justisa fó ezemplu.

Ministru Justisa mós agradese ba PDHJ no Assosiasaun Prevensaun Tortura ne’ebé konsege implenta MoU ne'ebé iha maske iha tinan rua nia laran la bele implementa tanba ho situasaun pandemia Covid, maibé ohin konsege realiza ona.

Antes ne’e iha loron 06 fulan Outubru 2020, Ministru Justisa sesante Dr. Manuel Cárceres da Costa ho Provedora Direitus Humanus no Justisa Dra. Jezuina M. F. Gomes asina ona nota de entendementu no iha fulan Marsu liuba lansa ona modula ba treinamentu nian.

No Segunda-feira (08/08/2022) ohin, Ministru Justisa Dr. Tiago Amaral Sarmento halo ona abertura ba Treinamentu ba Treinador sira, hodi kontinua ba faze implementasaun treinamentu ba guarda prizional sira seluk, husi establesimentu Prizional tolu.

08 Agostu 2022
#Media_Gabinete_MJ