Ministru Justisa Dr. Tiago Amaral Sarmento akompaña Primeiru Ministru Taur Matan Ruak ku'u kafé iha Railaku, Ermera Tersa (09/08).

Dili, MJ: Tersa-feira (09/08) semana ne'e, Ministru Justisa Dr. Tiago Amaral Sarmento partisipa iha Workshop Nasionál ba Dezenvolvimentu Cadeia de Valor ba Kafé ne'ebé hala'o iha Salaun Reuniaun CCT - Railaku, Ermera.
Iha Workshop Nasionál ho tema”Konsultasaun Nasionál ho Kafekultor, Setor Privadu no Parseiru Dezenvolvimentus kona-ba Dezafius no Oportunidade sira iha dezenvolvimentu Cadeia de Valor ba kafe husi fini to’o hemu ka Xikra ne’e,” lidera direita husi Sua Exelensia Primeiru Ministru Taur Matan Ruak.

Planu dezenvolvimentu setór Kafé tinan 2019-2030 ho objetivu atu kontribui signifikativamente ba moris di'ak, liu hosi reforsa reziliensia sosiál no ekonómia asegura seguransa ai-han, kontribui ba aumenta kresimentu ekonómniku no hasa'e produtividade agrikultura Kafé Timor-Leste nian.

Workshop ne'ebé hahu iha oras tuku 09:00 dader ne'e, lidera direta husi Sua Exelensia Primeiru Ministru Taur Matan Ruak, no partisipa mós husi membru sira iha área ekonómia nomós área setor produtivu nian hanesan Ministru Koordenador Asuntu Ekonomiku, Joaquin Amaral Ministru Obras Publikas Abel Pires, Ministru Agrikultura e Peskas Pedro dos Reis, Vise Ministriu Finansas Antonio Freitas, Sekrétariu Estadu Ambiente Deometrio do Amaral de Carvalho, no Prezidente Institutu Jestaun Ekipamentu (IGE - Sigla Portugues), Hermenegilda da Costa Laurentina.

Ministru Justisa Dr. Tiago Amaral Sarmento ho Ministru Obras Publikas Abel Pires, kuda fini kafe iha Rai Laku, Ermera (09/08).

Aleinde Membru Governu no lideransa instituisaun estadu nian, partisipa mós husi Prezidente autoridade Munisípiu Ermera, autoridade lokál, parseiru dezenvolvimentu sira, setor privadu sira inklui konvidadus no komunidade sira.

Iha workshop ne’e, hafoin halo abertura husi Sua Exelensia Primeiru Ministru Sr. Taur Matan Ruak, iha aprezentasaun husi kafekultor sira husi Munisípiu Ainaro, Aileu, Bobonaro Manatuto no Manufahi kona-ba esperensia no dezafius ne’ebé kafekultor sira infrenta iha prosesu dezenvolvimentu kafe husi produsaun to’o merkadu “.
Hafoin ne’e kontinua kedas ho aprezentasaun husi reprexzentante husi setor privadu sira hanesan; ACT, CCT, OLAM PARCIC, PEACE WIN JAPAUN, YMCA Koreia , kona-ba papel setor privadu iha dezenvolvimentu Kafé iha Timor-Leste.
Aleinde ne’e iha mós aprezentasaun husi Parseiru dezenvolvimentu sira Kafe iha nasaun seluk no apoiu ba dezenvolve Kafe iha Timor-Leste.

No iha oras tuku 12:30, Sua Exelensia Primeiru Ministru Taur matan Ruak halo rezumu no hato’o orientasoens politika ba Dezenvolvimentu Cadeia de Valor ba Kafé, husi fini kuda to’o hemu xikra.

09 Agostu 2022
#Media_Gabinete_MJ