Primeiru Ministru Taur Matan Ruak lidera Sorumutuk Konsellu Ministrus ordinariu, terseiru semana fulan Agostu nian, iha palasiu Governu, Dili, Kuarta (17/08).

Dili, MJ: Kuarta-feira (17/08) ohin , Ministru Justisa Dr. Tiago Amaral Sarmento aprezenta ba Konsellu Ministrus aditasaun ba Dekretu lei Informasaun Kadastrál, iha Sorumutuk Konsellu Ministrus (KM) tereseiru semana fulan Agostu nian, iha Palasiu Governu, Dili no hetan ona aprovasaun husi Konselluu Ministrus.
Projetu Dekretu-Lei ida ne’e nian sai ona hanesan objetu deliberasaun iha sorumutuk Konsellu Ministrus iha loron 8 fulan-juñu tinan 2022, maibé, tanba desizaun hodi altera artigu 46, kona-ba data ne’ebé tama ba vigór diploma nian, presiza submete projetu Dekretu-Lei ida-ne’e nian ba deliberasaun foun. Nune’e sei define katak diploma tama iha vigór iha loron 01 fulan-novembru tinan 2022, uluk define katak diploma ne’e sei tama iha vigór iha loron 120 hafoin ninia publikasaun.

Ministru Justisa Dr. Tiago Amaral Sarmento konversa ho Ministra Saude dra. Odete Freitas, iha biban reuniaun Konsellu MInistrus.

Informa mós katak projetu lei refere promulga ona husi Prezidente Republika, Dr. Jose Manuel Ramos Horta, iha loron 15 fulan-Agostu 2022.
Konsellu Ministrus mos aprova ona projetu Dekretu-Lei, ne’ebé aprezenta husi Ministru Prezidénsia Konsellu Ministrus, Fidelis Manuel Leite Magalhães, kona-ba alterasaun dahuluk ba Dekretu-Lei nu. 15/2017, loron 17 fulan-maiu, ne’ebé kria no define estrutura orgánika Institutu Nasionál Administrasaun Públika nian (INAP).
Ho diploma ne’e, hakarak atribui ba institutu públiku ne’e, tuir Programa Governu nian, responsabilidade boot ba nivel formasaun ne’ebé kualifikada ba rekursu umanu iha Administrasaun Públika, liuliu hodi fó programa sira lideransa nian no programa kapasitasaun avansada iha Administrasaun Públika. Nune’e, misaun foun INAP nian ba nivel formasaun profisionál iha Administrasaun Públika ne’e hakarak reforsa formasaun profisionál hanesan instrumentu estratéjiku modernizasaun no transformasaun ba Administrasaun Públika, liuhusi estabelesimentu área estratéjika sira ba formasaun.
Konsellu Ministrus aprova mós projetu Dekretu-Lei, ne’ebé aprezenta husi Ministru Obras Públikas, Abel Pires da Silva, kona-ba alterasaun daruak Dekretu-Lei nu. 8/2019, loron 24 fulan-abril, ho redasaun ne’ebé mai husi ninia alterasaun dahuluk, ne’ebé aprova ona liuhusi Dekretu –Lei nu. 50/2022, 14 fulan-outubru, kona-ba Orgánika Ministériu Obras Públikas nian.
Ho konsiderasaun ba tomada pose titulár foun ida Ministériu Obras Públikas nian, objetivu mak atu halo alterasaun sira ne’ebé presiza hodi organiza filafali servisu balun ne’ebé inklui iha Ministériu, atu fó efisiénsia boot liután iha ezekusaun ba ninia atribuisaun sira.

Primeiru Ministru Taur Matan Ruak lidera Sorumutuk Konsellu Ministrus ordinariu, terseiru semana fulan Agostu nian, iha palasiu Governu, Dili, Kuarta (17/08).

Ho nune’e, halo divizaun ba Diresaun Jerál Administrasaun no Finansas ba diresaun rua ho vokasaun ne’ebé lahanesan. Ida haree liu ba ezekusaun orsamentál ne’ebé inklui Diresaun Nasionál Aprovizionamentu no Orsamentu no Finansas, iha ne’ebé inklui mós Unidade Planeamentu Estratéjiku, ne’ebé ba oin sei sai hanesan diresaun nasionál. Seluk haree liu ba kestaun administrasaun jerál rekursu sira iha Ministériu, iha ne’ebé inklui Diresaun Nasionál Administrasaun no Jestaun Patrimóniu no Rekursu Umanu, aumenta mós Diresaun Nasionál Teknolojia Informasaun nian, ne’ebé hakarak atu fó suporte apoiu ba dijitalizasaun serbisu iha Ministériu.
Hasai mós Diresaun Jerál sira ne’ebé hakotu tiha ona ho nomeasaun ba órgaun diretivu empreza públika, Bee Timor-Leste, E.P. no Eletrisidade de Timor-Leste, E.P.
Diresaun Nasionál Estrada, Ponte no Kontrolu ba Inundasaun fahe mós ba diresaun nasionál rua; ida haree liu ba estrada no ida seluk haree ba prevensaun no kontrolu ba bee-sa’e hodi nune’e Ministériu bele iha entidade ida ho kompeténsia espesífika hodi hamenus risku inundasaun ne’ebé akontese hela ba beibeik, tanba alterasaun klimátika sira.
Ministru Administrasaun Estatál, Miguel Pereira de Carvalho no Vise-Ministru Administrasaun Estatál, Lino de Jesus Torrezão, aprezenta ba Konsellu Ministrus Relatóriu Misaun hodi Apoia Prosesu Resenseamentu Eleitorál iha Giné-Bissau nian. Delegasaun timoroan lidera husi Vise-Ministru, Lino de Jesus Torrezão, vizita ona Giné-Bissau iha loron 22 fulan-jullu to’o 8 fulan-agostu, hodi halo sorumutuk ho autoridade lokál sira hodi verifika kondisaun ezistente no identifika nesesidade sira ba organizasaun resenseamentu eleitorál no realizasaun ba eleisaun livre no demokrátika iha Giné-Bissau, ne’ebé sei hala’o iha loron 18 fulan-dezembru oin mai.
Ikusliu, Ministru Petróleu no Minerál, Victor da Conceição Soares no responsavel sira husi ANPM, Timor Gap no IPG, halo aprezentasaun ida kona-ba progresu sira iha setór petróleu no mineral. Aprezentasaun ne’e ho nia objetivu atu fó vizaun jerál ba membru Konsellu Ministrus, kona-ba atividade prinsipál sira ne’ebé planeia ka realiza ona, atu haforsa indústria petrolífera nasionál.

17 Agostu 2022
#Media_Gabinete_MJ