Sidadaun hirak ne'ebé simu ona sira ninia dokumentus hanesan Sertidaun Moris no Billete Identidade (BI) foto hamutuk Ministru Justisa Dr. Tiago Amaral Sarmento, Vise Ministru Justisa Jose E. Caetano ho Sekretariu Administrador iha Com- Lautem.

Dili, MJ: Kinta-feira (18/08) dader ne'e, Ministru Justisa Dr. Tiago Amaral Sarmento akompaña husi Vise Ministru Justisa, Jose E. Caetano halo abertura ba Atendimentu Rejistu Integradu Online ba Sertidaun Moris no Billete Identidade iha Suku Com, Postu Administrativu Lautem, Munisípiu Lautem.

Iha intervensaunMinistru Justisa esplika katak kartaun BI no Sertidaun nasimentu ne’e hanesan xavi ba sidadaun sira atu bele asesu ba pensaun governu nian hotu.

“ Kartaun rua ne’e importante tebe-tebes ba inan aman sira, ba avo sira, estudante sira, ba Joven sira, ba ema hotu, atu trata dokumentus hala’o atividade saida deit, liuliu governu nia politika ida agora, hodi fahe, hodi fo, hodi tulun subsiduu ba inana aman sira, kbiit laek, sira, ba estudante sira, ba inan isin rua sira, governu nia politika hodi fo apoiu ajudus subsisdiu, kartaun BI no Sertidaun nasimentu ne’e hanesan xavi.”

Vise Ministru Justisa Jose E. Caetano entrega dokumnetus Sertidaun Moris no Billete Identidade ba sidadaun sira iha Com-Lautem, Kinta (18/08).

Ho lansamentu ne'e, sidadaun sira bele ona prense formulariu via online husi sira nia fatin no submete ba iha sistema Rejistu Notariadu hodi bele halo verifikasaun no prosesa dadus ne'ebé iha.

Aleinde halo lansamentu ba atendementu Rejistu movel integradu online ba Sertidaun Moris no Emisaun Billete Identidade, aproveita biban Ministru Justisa Dr. Tiago Amral Sarmento mós fahe informasaun kona-ba preparasaun Ministériu Justisa nia atu fahe Serfifikadu Titlu Nain ba Rai ka ho lian malayu dehan Sertifikat Kepemilikan Tanah ba populasuan sira iha suku Com, Lautem.

Seremonia lansamentu ne'e akompaña mós husi Defensor Publiku Jeral Dr. Cancio Xavier no Diretor sira ambitu Ministériu Justisa, Sekretariu Administrador Munisípiu Lautem, Administrador Postu, autoridade lokal sira inklui komunidade sira.

18 Agostu 2022
#Media_Gabinete_MJ