Ministru Justisa Dr. Tiago Amaral Sarmento lidera reuniuan ekipa Konjunta ne'ebé kompostu husi Diresaun Jeral Terras e Propriedades no Servisu Kadastrus Ministériu Justisa, Komisaun Anti Korrupsaun (CAC) no SERVE hodi halo averigasaun ba arrendatariu hirak ne’ebe la kumpri dever ho diak, Cafetaria Ministériu Justisa, Segunda (22/08).

Dili, MJ: Segunda-feira (22/08) ne'e, Ministru Justisa Dr. Tiago Amaral Sarmento forma ekipa konjunta ida atu halo averigasaun ba arrendatariu sira ne'ebé la kumpri kontratu arrendamentu Rai Estadu ho diak.

Hafoin reuniaun, ba Media sira iha Cafetaria Ministériu Justisa, Ministru Justisa, Dr. Tiago Amaral Sarmento, informa ba jornalista sira katak "Ministru Justisa konvoka reuniaun hamutuk ho instituisaun importante sira ne'e atu tau hamutuk hanoin oinsa para forma ekipa konjunta ida i sei estabelese ninia termos referensia ou ezemplu ida para hatur tiha ninia diploma legal ida hodi hare ba arendamentu rai no propriedades iha teritoriu Timor laran tomak".

Ekipa Konjunta ne'e sei halo averigasaun ba arrendatariu sira ne'ebé halo ona kontratu ho Governu maibe la kumpri sira nian dever hodi selu arrendamentu ne'ebé iha.

Ekipa konjunta ne'e forma hafoin Ministru Justisa simu relatoriu inspesaun husi Gabinete Inspesaun no Auditoria (GIA) Ministériu Justisa, iha fulan Maiu liuba ne'ebé hatudu katak kompania ka arrendatariu barak mak la kumpri dever ho diak, nune'e Ministru Justisa deside hodi forma ekipa Ida ne'ebé kompostu mós husi Komisaun Anti Korrupsaun (CAC-sigla portugués) no SERVE atu hamutuk halo averigasaun ba arrendatariu hirak ne'ebé la kumpri dever ho diak.

22 Agostu 2022
#Media_Gabinete_MJ