Sesaun foto hamutuk Primeiru Ministru, Taur Matan Ruak ho Ministru Justisa Dr. Tiago Amaral Sarmento no Dirijentes hotu husi Ministériu Justisa hafoin reuniaun, Edifisu Sentral oin, Ministériu Justisa, Sexta (09/09).

Dili, MJ: Sexta- feira (09/09) dader ne'e Ministru Justisa Dr. Tiago Amaral Sarmento ho Dirijentes sira simu Primeiru Ministru, Taur Matan Ruak, iha knar fatin Ministériu Justisa, Rua Colmera-Dili.
Objetivu husi vizita ida ne'e, hodi bele koalia kona-ba planu Ministériu Justisa nian no bele fó orientasoens no ordem direta ba tekniku sira husi Diresaun Jeral Terras e Propriedades e Servisu Kadastrus hodi bele halo levantamentu ba dadus no terrenu hirak ne'ebé tuir planu sei simu uluk “Sertifikadu Titlu Nain ba Rai” iha selebrasaun Loron Proklamasaun Independensia 28 Novembru mai,” Informa Ministru Justisa ba diretores sira ambitu Ministériu Justisa iha salaun Konferensia Ministériu Justisa.

Primeiru Ministru, Taur Matan Ruak iha intervensaun iha reuniaun ho Ministru Justisa Dr. Tiago Amaral Sarmento no Dirijentes hotu husi Ministériu Justisa hodi fó orientasoen servisu ba preparasuan no atribuisaun Sertifikadu Titlu Nain ba Rai, Salaun Konferensia, Ministeriu Justisa, Sexta (09/09).

Iha aprezentasuan Diretora Servisu Kadastrus, Genoveva Xavier esplika katak ho distribuisaun titlu nain ba rai tuir padraun tekniku ne’eb’e lolos, ita bele minimiza no halakon problema disputa rai ne’ebé iha, titlu nain ba rai mós ajuda tebtebes, ba eispropriesaun ba terrenu ba konstrusaun Aeroportu nian, liuhusi atribuisaun sertfikadu titlu nain ba rai hafasil servisu governu nian ba halo espropriesaun, nia fó razaun se kuandu titlu nain ba rai iha ona, ekipa tenika la presiza ba halo levantamentu no sukat rai tan maibe, rekolha deit sertifikikadu titlu nain ba rai no bele rezolve problemas hirak ne’e nune’e ita la presiza dada tempu hodi prejudika programa governu nian.
Ho sertifikadu titlu nain ba rai mós bele preve frauda iha faan no sosa. Akontese problema barak disputa rai mosu tanba balun laos faan ninia rai, mais faan fali ema seluk nia rai”, Diretora ne’e esplika iha aprezentasaun ba Primeiru Ministru, Taur Matan Ruak.
Primeiru Ministru mós esplika katak sertifikadu titlu nain ba rai ne’e iha valor boot tanba investor ida atu mai investe iha timor aspetu ida mak ambiente negosiu ne’ebe bele suporta nune’e nia bele mai investe, no ida ne’e liga mós ba sertifikadu titlu nain ba rai.

Rai ninia situasaun regularizadu ne’e atrai investidores, tanba aspetu ida importante mak ambiente negosiu. Ambiente negosiu ne’e ida mak ne’e titular rai laiha; hau mai kuda hau nia osan iha ne’e, aban bulak ida mai dehan rai ne’e hau nian, nia mos fo ezemplu rai Ensul Meci hafoin investe tiha 40 milloens, iha ema balun mai reklama dehan rai ne’e sira nian.”

Dirijentes no tekniku sira husi Ministériu Justisa iha reuniaun ho Primeiru MInistru Taur Matan Ruak hodi rona orientasoen servisu ba preparasuan no atribuisaun Sertifikadu Titlu Nain ba Rai, Salaun Konferensia, Ministeriu Justisa, Sexta (09/09).

Xefe Governu mós dehan, funsionáriu babain no kargu xefia Ministériu Justisa nian mak ema ne’ebé lori justisa ba ema, entaun ne’e hatudu ema hotu nia liberdade, no distinu iha Ministériu Justisa nia liman.
“Entaun ida-ne’e maka misaun ne’ebé ita-boot sira tenke halo, tanba ne’e tenke hare ho ema no Estadu nia vida. Ema-nia vida tanba rai ne’e fó valór ba ema, katak iha rai ita bele peñor hodi foti osan, bele dezenvolve ekonomia família, no halo nia uma seguru. Enkuantu ba Estadu fó rendimentu rai ninia situasaun regularizadu ne’e bele atrai investidór tanba aspetu ida importante mak ambiente negósiu,” tenik Primeiru Ministru Taur Matan Ruak ba Dirijentes sira Ministériu Justisa nian.
Primeiru Ministru Taur Matan Ruak mós apresia ho servisu Ministru Justisa Dr. Tiago Amaral Sarmento ho dirijente sira tanba fulan-tolu deit iha tinan 2022 hatama reseita millaun $4 ba kofre Estadu.
“Ha’u kontente tanba Ministru Justisa informa ba hau katak iha fulan-tolu kobra millaun $4, hau dala ruma tur hanoin katak, sé imi fulan-tolu deit kobra ona hanesan ne’e, sira seluk iha tinan barak la kobra signifika katak balun ne’e ba fali fatin seluk. Entaun hauu fó parabéns. Imi kumpre de’it lei, lalika tauk presaun hosi sé de’it, maibé tenki ho atensaun se lae imi mak impoin lei imi mak ba para uluk fali iha kadeia,”Primeiru Ministru haktuir.

Partisipa iha seremonia ne’e Dirijentes hotu Ministériu Justisa nian inklui teknika kadastrus Ministériu Justisa no notariu hirak ne’ebé sei emite Sertifikadu Titlu nain ba rai.

09 Setembru 2022
#Media_Gabinete_MJ