Ministériu Justisa hala’o konsultasaun públiku proposta lei apoio Judisiariu daruak iha distrito Baucau, 8 Juñu 2010 iha salaun administrasaun distrito.

Konsultasaun ne’e nu’udar konsultasaun daruak ne’ebé hala’o depois konsultasaun dahuluk iha Ministériu Negosiu Estranjeirus iha 4 Juñu 2010 ho alvu ba Defensór Públika, Advogadus no Juiz hamutuk ema nain 50. Konsultasaun daruak ne’ebé hala’o iha Baucau ho nia alvu eh tarjetu ba autoridades distritál, PNTL, administradór sub-distrito, autoridades lokais sukus no aldeias inklui mós advogadus privadu no administradora Tribunal distrito Baucau, total partisipantes iha eventu ne’e ema besik 200.

Adjuntu administradór distrito Baucau iha nia abertura hateten,” ohin administradór sub-distrito nai nen ho nia xefe suku nain 59 partisipa iha sorumutu ida ne’e. durante tinan 10 Timor Leste ukun rasik-an, no ohin loron iha sorumutu loron ida ne’e koa’lia kona-ba lei judisiariu, katak lei ne’ebé ita nia rasik ne’ebé agora iha ita boot sira nia liman. Konsultasaun ida ne’e atu fo ita boot sira apoiu no opiniaun hodi kontribui ba lei judisiariu ne’e.”

Adjuntu administradór ne’e hatutan tan,” saida mak ita boot sira kontribui iha lei ne’e atu ita boot sira nia hanoin tama iha lei ida ne’e nia laran, atu aban bain rua lei ne’e fila mai ita.”

Iha abertura ne’e Director Direcção Nacional Assessoria Legislação e Judísiario, Francisco Vasco Soares ne’ebé nu’udar reprezenta Ministra Justisa iha nia diskursu hateten,” lei ida ne’e inportante liu ba ema sira ne’ebé, liu liu kbi’it laek, ekonomia laiha atu asesu ba Tribunal. Ne’eduni ho konsultasaun ida ne’e atu husu ita boot sira nia hanoin, apoiu atu lei ne’e bele sai diak liu tan molok lori ba konsellu ministru no hetan aprovasaun iha Parlamento Nasional.”

Programa konsultasaun ne é, Assesor ba Direcção Nacional Assessoria Legislação e Jurídica, Adino Nunes Cabral, nu’udar apresentador material durante prosesu konsultasaun.

Konsultasaun ne’e realiza tamba servisu hamutuk entre Direcção Nacional dos direitos Humanos e de Cidadania (DNDHC) no Direcção Nacional Assessoria Legislação e Judísiario (DNAJL) no hetan apoiu orsamentu hosi organizasaun The Asia Foundation.

Nu’udar fasilitadór ba programa ne’e mai hosi ekipa direcção rua mak DNDHC, Direcçtór Dr. Celito Cardoso ho nia ekipa , Direcção DNAJL, Director Dr. Vasco Francisco Soares ho ekipa no orsamento ba programa ne’e mai hosi The Asia Foundation. João Mp. da costa/DNDHC.