VMJ sai inspektur komemorasaun 28 Novembru iha Bobonaro

Vise Ministru Justisa hetan autorizasaun hosi ministru Estatal hodi sai nu’udar inspektur serimonia içar Bandeira Nasionál ba komemorasaun loron proklamasaun Independensia 28 Novembru 2010 iha distritu Bobonaro. Iha serimonia ne’e autoridades distritál ne’ebé akompaña Vise Ministru Justisa mak señor Administradór distritu Bobonaro, Señor Domingos Martins, komandante PNTL distritu Bobonaro, Jose Maria Neto Moc no komitiva Vise Ministru Justisa inklui Director DNDHC, Celito Cardoso, Director DNAJL, Vasco Soares, Representa Director DNTPSC, Merino Corte Real Tilman, Xefe departamentu Divulgasaun, João Mp. da Costa, xefe Departamentu direitus Humanos, Helder Godinho Martins no Sekretaris VMJ, Auxiliadora Caetano.

Iha serimonia içara Bandeira Nasional ne’e vise Ministru Justisa, Ivo Jorge Valente le’e mensazen ne’ebé haruka hosi Dili hanesan tuir mai,” tinan 35 liu ba primeiru Governu RDTL simu pose, hodi hamrik hanesan órgaun ezekutivu paíz Soberanu no independente nian ida. Deklarasaun independénsia iha 28 Novembru 1975 sei marka para sempre, iha ita nia istoria hanesan aktu bontade no determinasaun boot ida ba kauza nasionál independensia. Tinan 35 liu-ba serimonia ne’ebé marka povo nia hakarak maske simples teb-tebes, maibe ho dignidade ne’ebé impar, hetan de’it mak ameasa hosi ahi suar metan boot ne’ebé sai hosi ró-ahi funu Indonezia nian ne’ebé balabu ba mai hela iha tasi Atauru laran ba. Ne’e hanesan sinál katak mate no terus boot sei mosu ba ita nia povu ne’ebé bele hare hosi dook. Maibe ita nia povo asuwa’in laran la taridu no fuan la lakon! inspiradu ho ideal liberdade ho emansipasaun, hakarak atu hadauk hikas fali nia independensia, hodi nune’e oferese sakrifisiu ne’ebé boot no ho aten brani tebes.

Povo Timor-Leste,

Ohin 28 Novembru 2010, ita iha erois nasionáis bara-barak atu fo omenajen, inan ho aman, maun alin ho oan sira atu hanoin no tanis ba, maibe atu rejista progressu barak ne’ebé ita hetan daudaun.
Loke matan no hare isoens tempu uluk nian hodi fo onra nafatin ba sira ne’ebé ho sira nia sakrifisius halo ita nia ideal independensia sai posivel, mak ho laran metin ita bele hateke mós ba oin ba futuru. Futuru ho esperansa!

Ita hasoru dezafius ka sasadik oin-oin hanesan bain-bain paíz foun ida hasoru no sei iha hela faze konsolidasaun Estadu, maibe ita fo ona pasu konkretus no rezolutus tuir dalan dezemvolvimentus nasionál nian, hodi hamenus dadaun moris kiak.

Sasadik ne’ebé boot liu hotu, ne’ebé ohin loron ita hasoru no mós iha tinan hira mai ne’e laran, mak timór-oan tomak hosi ponta leste ba toó Oeste, iha Atauru no iha enclave Oe-Cusse, no mós maluk sira hotu ne’ebé moris namkari lemorai bele kontribui ba faze desemvolvimentu ne’ebé ita nia nasaun doben liu daudaun ne’e.”

Iha deskursu ne’e eis adjuntu Prokuradór Jeral da Repúblika ne’e reforsa liu tan dehan,” Tenke koalia kona-ba esperansa ba ita nia futurus jerasoens. Buka halo de’it buat ne’ebé diak no dame nian halao valores rekonsiliasaun no justisa iha moris loro-loron. Fiar katak so ita hotu hamutuk hanesan uluk ita halo ona, mak ita bele hari’I futuru ida ne’ebé prosperu no haksolok rohan laek ba ita nia oan sira. “
Iha tempu hanesan VMJ mós entrega prezente ba komunidades sira ne’ebé hetan premiu ba atividades kompetesaun hanesan dada tali, halai karon, tata berlindus no sae Bua.

Depois remata serimonia içar Bandeira Nasional ne’e vise Ministru Justisa ho komitiva kontinua halo divulgasaun leis, justisa no Direitus Humanos iha sub-distritu Bobonaro (suku Maliubo) iha 29 Novembru 2010, Vise ministru Justisa ho komitiva fila mai Dili 29 Novembru loro kraik.



João Mp. da Costa
Revista Ministeriu