REPÚBLICA DEMOCRÁTICA DE TIMOR-LESTE

REPÚBLICA DEMOCRÁTICA DE TIMOR-LESTE

Dekretu-Lei

16/2011

Kustu Judisiál nia Kódigu





Kustu Judisiál nia Kódigu aprovadu ho Dekretu-Lei 15/2003, publikadu iha 1 Outubru, iha lakuna no defisiénsia, ne'ebé hamosu difikuldade iha nia aplikasaun, no estabelese valór ba justisa nia taxa ne'ebé halo parte sira selu osan barak tebe-tebes atu uza servisu judisiál.



Nune'e, maka ami hakarak halo kódigu ba kustu foun ida fasil atu aplika no ho mekanizmu ne'ebé fó-fatin ba ema hotu-hotu atu hetan asesu ba justisa independentemente hosi ida-idak nia situasaun ekonómika.



Iha Kustu Judisiál nia Kódigu foun ne'e:



a) Iha rejime kona-ba kustu ketak ba prosesu sivíl no ba pro-sesu krime no organizasaun di'ak-liu ba sekretaria judisiál sira nia tezouraria;



b) Hasai tiha “Justisa nia Kofre” previstu iha kódigu anteriór no muda ba Estadu nia Kofre reseita nia 30% ne'ebé uluk tama ba kofre ida ne'ebá, tanba ita haré katak laiha justifikasaun ba Tribunál sira atu simu nafatin reseita rasik hodi selu despeza ki'ikoan sira-ne'ebé, di'ak-liu, selu ho Estadu nia orsamentu jerál tanba agora órgaun soberanu ida-ne'e iha autonomia atu jere nia orsamentu, no, nune'e, ita uza Estadu nia reseita ho transparénsia liu no Tribunál sira husik tiha operasaun todan balu ne'ebé laiha vantajen finanseira signifikativa;



c) Hatama regra balu kona-ba valór tributáriu nia aplikasaun ba situasaun ne'ebé too agora la tama iha previzaun;



d) Muda valór baze atu kalkula justisa nia taxa iha prosesu sivel atu halo prosesu ne'e nia folin sai kamán-liu;



e) Hatama redusaun ba justisa nia taxa, tuir prosesu nia espésie no tuir faze iha ne'ebé prosesu hotu, ba sorin-baluk, dahaat ida ka daualuk ida, no fó posibilidade ba juíz atu, haré ba prosesu nia simplisidade, hatún exesionalmente taxa ne'e too US$6.00;



f) Hasai tiha preparu inisiál, ne'ebé garante prosesu nia kustu ne'ebé tenke selu kuandu prosesu hotu, husik hela de'it posibilidade atu iha preparu ba despeza, kuandu presiza selu despeza kona-ba interveniente asidentál sira nia remunerasaun;



g) Kria konta intermédia iha situasaun ne'ebé prosesu para hela iha fulan 6 nia laran ka tama iha suspensaun;



h) Hatama iha ezekusaun julgadu nia likidasaun, atu fó-fatin ba pagamentu ba kredór sira;



i) Iha konta ida de'it ba prosesu ida-idak no ba responsavel no benefisiáriu hotu-hotu, no iha ne'ebé sei fahe ida-idak nia responsabilidade;

j) Fó posibilidade atu selu kustu ho prestasaun, maibé sem juru;



k) Hatama “rateiu”, atu bele selu ho saldu depozitadu iha prosesu nia konta korrente kustu ne'ebé seidauk selu;



l) Fiksa iha limite mínimu nia dobru justisa kriminál nia taxa variavel atu aplika kuandu juíz la fiksa taxa ne'e;



m) Estabelese taxa atu selu tanba aktu avulsu no servisu seluk ho folin ki'ikoan, hanesan emisaun ba sertidaun no kópia no prosesu nia konfiansa;



n) Hatún kuantia devida nia juru tan mora hosi 2% ba 0,25%.



Nune'e, tuir Repúblika nia Konstituisaun nia artigu 115, n. 1, alínea a) no b), no 3, Governu dekreta atu vale, hanesan lei, buat sira tuirmai ne'e:



Artigu 1

Kustu Judisiál nia Kódigu



Aprova iha ne'e Kustu Judisiál nia Kódigu, publikadu iha aneksu ba dekretu-lei ida ne'e hanesan nia parte integrante.



Artigu 2

Prosesu pendente



1. Kustu Judisiál nia Kódigu ne'ebé aprova ona ne'e aplika ba prosesu pendente sira, sem prejuizu ba respeitu ba desizaun tranzitada iha julgadu.



2. Sem prejuizu ba n. 1 nia dispozisaun, bele tau fali konta no likidasaun ne'ebé halo tuir kódigu ne'ebé aprova daudaun ne'e iha konta no likidasaun sira-ne'ebé halo tiha ona maibé seidauk selu nia fatin, naran katak responsavel ka interesadu ba nia pagamentu husu, iha loron 30 nia laran hahú iha loron ne'ebé lei ida ne'e hahú moris ka, seidauk hetan notifikasaun ba reklamasaun karik, iha prazu ba reklamasaun hasoru konta ka likidasaun.



Artigu 3

Destinu ba reseita ne'ebé tama tiha ona ba Justisa nia Kofre



Reseita ne'ebé tama tiha ona ba Justisa nia Kofre tuir kódigu ba kustu anteriór sei muda fali ba Estadu nia Kofre.



Artigu 4

Norma revogatória



Revoga tiha Kustu Judisiál nia Kódigu aprovadu ho Dekretu-Lei 15/2003, publikadu iha 1 Outubru, no mós norma sira iha lejizlasaun ne'ebé konsagra solusaun hasoru solusaun sira-ne'ebé kódigu foun ne'e adota.



Artigu 5

Moris



Dekretu-Lei ida-ne'e no Kustu Judisiál nia Kódigu aprovadu daudaun ne'e moris iha loron ida be tuir kedas nia publikasaun.



Aprovadu iha Ministru sira nia Konsellu, iha 2 Fevereiru 2011

Primeiru-Ministru





Kay Rala Xanana Gusmão





Ministra ba Justisa





Lúcia M B F Lobato





Promulgadu iha 11.04.2011



Publika ba





Prezidente da-Repúblika





José Ramos Horta











Aneksu





KUSTU JUDICIÁL NIA KÓDIGU



TÍTULU I

DISPOZISAUN JERÁL



Artigu 1

Kustu judisiál nia ámbitu



1. Prosesu sivíl no penál tenke selu kustu, tuir sira nia kódigu rasik no tuir kódigu ida-ne'e, salvu iha situasaun ne'ebé lei prevee izensaun.



2. Iha kustu halo parte justisa nia taxa no enkargu.



TÍTULU II

KUSTU SIVÍL



KAPÍTULU I

DISPOZISAUN JERÁL



SEKSAUN I

Izensaun



Artigu 2

Izensaun subjetiva



Sem prejuizu ba lei nia dispozisaun espesiál, iha izensaun ba kustu:



a) Estadu no nia servisu ka organizmu ida-idak, maski personalizadu;



b) Autarkia lokál, munisípiu sira nia asosiasaun no federasaun no lideransa komunitária ne'ebé lei define tiha ona;



c) Ministériu Públiku;



d) Partidu polítiku konstituidu tuir lei, nu'udar partidu polítiku sira nia estatutu;



e) Igreja katólika no konfisaun relijioza sira seluk;



f) Instituisaun ba solidariedade sosiál;



g) Inkapáz no pesoa ekiparada;



h) Sinistradu iha asidente iha traballu no ema ne'ebé sofre doensa profisionál, iha aksaun ne'ebé moris hosi asidente ka doensa ne'e;



i) Ofisiál ba justisa tanba kustu iha prosesu inutil ne'ebé nia hamosu, kuandu juíz iha despaxu fundamentadu perdoa tiha falta ne'e.



Artigu 3

Izensaun objetiva



Sem prejuizu ba lei espesiál nia dispozisaun, la iha kustu:



a) Iha prosesu ba adosaun;



b) Iha menór nia prosesu;



c) Iha prosesu ba inventáriu kuandu eransa monu ba inkapáz ka auzente iha parte inserta;



d) Iha prosesu ba interdisaun, ba inabilitasaun, ba autoriza-saun ba inkapáz nia reprezentante atu pratika aktu ruma;



e) Iha insidente atu verifika kauza nia valór hodi halo konta;



f) Iha prosesu ba traballu kuandu traballadór maka tenke seluk kustu;



g) Iha pedidu atu hetan apoiu judisiáriu.



Artigu 4

Parte nia kustu nia reembolsu



Izensaun la monu ba reembolsu ne'ebé tenke halo ba parte vensedora hanesan parte nia kustu.



SEKSAUN II

Kauza nia valór atu fiksa kustu



Artigu 5

Regra jerál



1. Iha situasaun la previstu expresamente tenke haré ba valór ne'ebé sai hosi lei prosesuál nia aplikasaun atu determina kustu.



2. Valór ne'ebé parte sira deklara serve atu determina kustu kuandu la ki'ik-liu ida ne'ebé sai hosi kritériu legál.



3. Kustu sei kalkula tuir pedidu inisiál nia valór, maski, liu tiha, ho autór ka Tribunál nia inisiativa, valór ne'e muda tiha.

4. Ba artigu ida ne'e nia dispozisaun, autór ka ezekuente tenke hatudu iha petisaun inisiál interese sira-ne'ebé vense tiha ona iha data ne'ebé nia aprezenta petisaun ne'e iha tribunál nia valór líkidu.



Artigu 6

Regra espesiál



1. Atu kalkula kustu, prosesu kona-ba pesoa nia estadu no kona-ba interese imateriál vale US$200.00.



2. Prosesu ba despeju atu denunsia kontratu ba arrendamentu urbanu nia valór hanesan ho renda anuál nia valór hamutuk ho renda ne'ebé deve hela ona nia valór no indemnizasaun rekerida nia valór.



3. Inventáriu, maski ho kumulasaun, nia valór hanesan ho bem sira atu partilla nia valór sem redusaun ba legadu no dívida.



4. Ezekutadu nia embargu, opozisaun ba ezekusaun no opozisaun ba prosedimentu kautelár nia valór hanesan ho prosesu iha ne'ebé sira tama nia valór ka, embargu no opozisaun sira-ne'e parsiál karik, hanesan ho parte ne'e nia valór.



5. Terseiru nia embargu no opozisaun ba peñora nia valór hanesan ho bem sira-ne'ebé tama iha embargu ka opozisaun ne'e nia valór.



Artigu 7

Valór iha ezekusaun, kredór sira nia konkursu no bem nia alienasaun



1. Iha ezekusaun sei haré ba kréditu ezekuendu sira nia valór totál, ka ba bem likidadu sira nia produtu nia valór totál, kuandu ida ne'e ki'ik-liu.



2. Iha kredór sira nia konkursu, kuandu ezekutadu maka tenke selu kustu, sei haré ba kréditu deduzidu sira nia valór ka ba bem likidadu sira nia valór, kuandu ida ne'e ki'ik-liu; kuandu bem sira-ne'e seidauk likida, sei haré ba bem peñoradu sira nia valór kuandu ida ne'e ki'ik-liu kréditu deduzidu sira nia valór.



Artigu 8

Kauza nia valór kuandu iha rekonvensaun ka intervensaun prinsipál



Kuandu iha rekonvensaun ka intervensaun prinsipál ho pedidu la hanesan ho autór nia pedidu, valór atu kalkula kustu hanesan ho pedidu sira ne'e nia valór nia soma.



Artigu 9

Kauza nia valór iha rekursu



Iha rekursu valór atu kalkula kustu hanesan ho sukumbénsia nia valór.

Artigu 10

Valór ilíkidu, deskoñesidu ka inezatu



Kuandu, tuir buat ne'ebé tama hela iha prosesu ida, prosesu ne'e iha valór ilíkidu, deskoñesidu ka boot-liu valór ne'ebé parte sira deklara, juíz bele fiksa kauza nia valór nu'udar nia konsidera los; ba ida ne'e, juíz bele haruka, dezignadamente, halo verifikasaun ba valór tuir lei prosesuál.



KAPÍTULU II

JUSTISA NIA TAXA



SEKSAUN I

Justisa nia taxa em jerál



Artigu 11

Baze atu kalkula justisa nia taxa



Sem prejuizu ba artigu seginte sira nia dispozisaun, iha prosesu sivíl justisa nia taxa sei kalkula ho baze iha aksaun, insidente ka rekursu nia valór, tuir tabela aneksa.



Artigu 12

Redusaun ba justisa nia taxa tuir faze iha ne'ebé prosesu hotu



1. Justisa nia taxa tun ba sorin-baluk:



a) Iha aksaun ne'ebé hotu molok iha orden atu halo dilijénsia ba prova ka, dilijénsia ne'e laiha karik, molok juíz fó desizaun finál;



b) Iha aksaun ne'ebé Ministériu Públiku mesak maka kontesta;



c) Iha ezekusaun ne'ebé hotu molok halo hotu sitasaun ba kredór sira nia konkursu;



d) Iha inventáriu ne'ebé liu tiha sitasaun ba interesadu sira nia konferénsia, maibé molok halo konferénsia ne'e, maka hotu.



2. Justisa nia taxa tun ba dahaat ida:



a) Iha aksaun ne'ebé hotu molok opozisaun tama no iha sira-ne'ebé juíz fó desizaun tanba laiha opozisaun;



b) Iha aksaun ne'ebé la admite sitasaun ba reu;



c) Iha inventáriu ne'ebé hotu molok interesadu sira nia sitasaun hotu ;



d) Iha ezekusaun ne'ebé hotu molok sitasaun ba ezekutadu hotu.



Artigu 13

Redusaun ba daualuk ida



1. Justisa nia taxa tun ba daualuk ida:



a) Iha kredór sira nia konkursu;



b) Iha prosedimentu kautelár no nia opozisaun;



c) Iha embargu;



d) Iha instánsia nia insidente;



e) Iha opozisaun ba inventáriu;

f) Iha aktu sira-ne'ebé lei bolu insidente ka konfigura hanesan insidente.



2. Iha kazu espesiál no iha prosesu simplifikadu sira juíz bele hatún exesionalmente justisa nia taxa too US$6.00 kuandu iha justifikasaun.



Artigu 14

Justisa nia taxa iha tribunál superiór



Iha rekursu justisa nia taxa tun ba ida be hakerek hela iha tabela nia sorin-baluk



Artigu 15

Redusaun ba justisa nia taxa tuir rekursu nia faze



Kuandu rekursu hetan dezersaun iha Tribunál superiór ka hotu molok Tribunál ne'e fó desizaun justisa nia taxa tun ba dahaat ida.



Artigu 16

Justisa nia taxa nia limite mínimu



Iha aksaun, insidente no rekursu justisa nia taxa, maski iha redusaun, labele tun liu US$6.00.



KAPÍTULU III

ENKARGU



SEKSAUN I

Enkargu em jerál



Artigu 17

Enkargu



Iha kustu tama enkargu sira-ne'e:



a) Reembolsu ba despeza ne'ebé Estadu nia Kofre selu tiha ona;



b) Retribuisaun ne'ebé tenke selu ba ema ne'ebé iha intervensaun asidentál iha prosesu no mós kompensasaun ne'ebé lei estabelese;



c) Despeza ho transporte, alojamentu no alimentasaun ka ajuda ba kustu, kuandu tenke selu;



d) Reembolsu ba parte vensedora hanesan parte nia kustu.



Artigu 18

Parte nia kustu



1. Iha parte nia kustu tama buat hotu ne'ebé parte ida selu tiha ona iha prosesu ne'ebé kondenasaun refere ba no nia iha direitu atu simu fali.



2. Preparu no kustu ne'ebé parte tenke simu fali tenke sura iha konta finál.



3. Buat sira seluk tan ne'ebé parte selu tiha ona sei sura mós, kuandu interesadu aprezenta nota diskriminativa no justifikativa iha loron sanulu nia laran hahú hosi loron ne'ebé nia koñese desizaun be fó-fatin ba prosesu nia kontajem.



SEKSAUN II

Remunerasaun no kompensasaun ba interveniente asidentál



Artigu 19

Remunerasaun ba interveniente asidentál



1. Peritu, louvadu, tradutór, intérprete, testemuña no ema se-luk tan ne'ebé tama iha prosesu asidentalmente no ajuda iha dilijénsia ruma iha direitu ba remunerasaun ne'ebé juíz sei fiksa hosi US$6.00 too US$250.00.



2. Kuandu intervensaun ne'e iha kompleksidade ka demora espesiál, juíz bele hasa'e remunerasaun nia valór too ida previstu iha númeru anteriór nia dobru.



KAPÍTULU IV

GARANTIA BA DESPEZA NO KUSTU SELUK TAN



Artigu 20

Preparu ba despeza



1. Iha prosesu, insidente no rekursu bele iha preparu ba despeza, salvu kuandu iha izensaun legál.



2. Preparu ba despeza maka sira-ne'ebé serve atu selu enkargu sira referidu iha artigu 19.



Artigu 21

Preparu nia montante



Prosesu nia seksaun sei hatudu, iha loron lima nia laran hahú hosi juíz nia despaxu, preparu ba despeza nia valór provavel no hakerek kota kona-ba ida-ne'e.



Artigu 22

Se maka tenke halo preparu



1. Parte ne'ebé rekere dilijénsia maka tenke halo preparu.



2. Parte responsavel iha izensaun ka dispensa atu selu kustu karik, ho Tribunál nia orsamentu maka sei selu despeza ne'e no valór ne'ebé selu tiha ne'e sei tama, tuir kustu nia regra, iha vensidu iha finál nia responsabilidade ho benefísiu ba Estadu nia Kofre, sem prejuizu ba izensaun ne'ebé nia benefísiu



Artigu 23

Oportunidade atu selu preparu ba despeza



Preparu ba despeza tenke selu iha loron 10 nia laran hahú hosi notifikasaun atu selu.



Artigu 24

Tribunál iha ne'ebé halo preparu



Preparu ba despeza sei halo iha instánsia dahuluk nia Tribunál ne'ebé prosesu ka insidente la'o.

Artigu 25

Preparu nia restituisaun



1. Preparu ba despeza sei fó fali ba parte ne'ebé halo preparu ne'e kuandu laiha pagamentu ba enkargu sira referidu iha artigu 19.



2. Kuandu osan atu fó fali ki'ik-liu US$6.00, laiha preparu nia restituisaun parsiál no, kuandu la restituida, hela ba Estadu nia Kofre.



3. Númeru anteriór nia dispozisaun aplika mós ba osan ne'ebé depozita tiha ona hanesan kustu provavel.



Artigu 26

Konsekuénsia hosi preparu ba despeza nia falta



Preparu ba despeza laiha karik, labele halo dilijénsia ne'ebé parte ruma maka rekere, sem prejuizu ba parte kontrária atu halo pagamentu hodi bele halo dilijénsia ne'e.



Artigu 27

Sertidaun no papél seluk nia kustu



Sertidaun no papél seluk labele entrega molok selu tiha nia kustu, salvu kuandu iha izensaun ba pagamentu ne'e.



KAPÍTULU V

KONTA, KUSTU NIA PAGAMENTU NO RATEIU



SEKSAUN I

Kustu nia konta em jerál



Artigu 28

Momentu atu halo konta



Salvu dispozisaun seluk, prosesu nia konta sei halo kuandu desizaun finál tranzita tiha ona no iha instánsia dahuluk.



Artigu 29

Remesa ba konta no rejime atu elabora konta provizória



1. Seksaun respetiva sei haruka ba konta prosesu ne'ebé fó-fatin atu seluk kustu, iha loron lima nia laran.



2. Sei haruka mós ba konta:



a) Prosesu ne'ebé tama iha suspensaun, kuandu juíz haruka;



b) Prosesu ne'ebé para tiha durante fulan neen tanba parte sira nia kulpa;



c) Prosesu ne'ebé iha likidasaun atu halo.



3. Prosesu sira referidu iha númeru anteriór nia alínea a) no b) nia konta sei halo hanesan prosesu sira-ne'e hotu tiha ona.



Artigu 30

Julgadu nia likidasaun



Iha aksaun ka kréditu sira nia graduasaun, kuandu Tribunál tenke halo pagamentu ruma, sei halo likidasaun ba julgadu iha momentu ne'ebé, liu tiha sentensa respetiva, prosesu ba konta dahuluk.



Artigu 31

Kustu nia konta



Iha prosesu, rekursu ka insidente ida-idak tenke halo konta ida.



Artigu 32

Prazu atu halo konta



Konta tenke halo iha loron 10 nia laran; maibé, iha aktu urjente ruma karik, tenke halo tuir urjénsia nia grau no no labele liu loron lima nia laran.



Artigu 33

Dúvida iha konta



1. Kuandu iha dúvida ruma kona-ba konta, funsionáriu kontadór tenke aprezenta dúvida ne'e, ho nia paresér, no loke konkluzaun iha prosesu ba juíz atu deside.



2. Desizaun sei konsidera notifikada ba interesadu sira ho kustu nia notifikasaun.



Artigu 34

Regra jerál kona-ba konta



1. Konta tenke halo tuir julgadu iha instánsia última, no monu ba aksaun, insidente no rekursu sira nia kustu.



2. Tenke hatama iha konta elementu sira indispensavel ba lansamentu no konta nia duplikadu ka kópia ida tenke arkiva iha seksaun sentrál.



3. Kuantia kontada sei arredonda ba sentavu nia dezena superiór ida imediata.



4. Kuandu halo konta tenke:



a) Hatudu konta nia númeru no aksaun, insidente no rekursu sira nia valór;



b) Diskrimina no soma justisa nia taxa sira aplikavel;



c) Diskrimina iha Estadu nia Kofre nia reseita multa, justisa nia taxa no mora no kréditu sira seluk nia juru;



d) Diskrimina pagamentu no retribuisaun sira-ne'ebé deve hela;



e) Likida reembolsu ba parte vensedora, divide kustu tuir julgadu no kompensa parte ida-idak nia responsabili-dade ho buat ne'ebé nia gasta tiha ona, atu kalkula kuantia ne'ebé nia tenke seluk ka simu fali, hetan tiha kuantia diskriminada sira nia soma;



f) Taka konta ne'e ho indikasaun kona-ba dívida totál, pur extensu, gia atu pasa ba responsavel ida-idak, data no kontadór nia naran no asinatura.



5. Kuandu laiha kompensasaun atu halo, sei soma reembolsu sira-ne'ebé tenke selu ba parte vensedora no halo apuramentu ba dívida totál.

Artigu 35

Kustu ho valór reduzidu



Kuandu dívida ne'ebé interesadu tenke seluk ki'ik-liu US$3.00, dívida ne'e labele konsidera, no sei halo rateiu iha kazu ne'ebé tenke halo rateiu.



Artigu 36

Konta nia notifikasaun ba interesadu sira



1. Sei notifika konta elaborada ba responsavel no interesadu sira, no mós ba advogadu no defensór públiku sira, iha loron 10 nia laran, atu bele halo reklamasaun, resebimentu ka pagamentu.



2. Notifikasaun ne'e sei halo ho konta nia kópia.



SEKSAUN II

Reklamasaun no konta nia reforma



Artigu 37

Reklamasaun no konta nia reforma



1. Ofisiozamente ka ho interesadu nia rekerimentu, juíz sei haruka reforma konta ne'ebé la halo tuir dispozisaun legál.



2. Bele hatama, iha loron 10 nia laran, reklamasaun hasoru konta:



a) Ema ne'ebé iha responsabilidade atu selu kustu, molok nia selu;



b) Ema ne'ebé iha kuantia ruma atu simu.



Artigu 38

Reklamasaun hasoru konta nia tramitasaun



1. Aprezenta tiha reklamasaun hasoru konta, prosesu tenke ba kedas funsionáriu ne'ebé halo konta ne'e, atu fó nia opiniaun iha loron 5 nia nia laran, no, tuir fali, ba juíz, atu deside iha loron 5 nia laran.



2. Labele admite interesadu nia reklamasaun daruak kuandu nia la depozita kustu ne'ebé deve hela.



Artigu 39

Rekursu hasoru desizaun ba reklamasaun hasoru konta ka kontadór nia dúvida



Desizaun kona-ba reklamasaun nia insidente no kona-ba funsionáriu kontadór nia dúvida bele hasoru rekursu ba tribunál superiór kuandu kustu kontadu nia valór boot-liu US$1,000.00.



Artigu 40

Konta nia reforma ho kustu nia repozisaun



1. Kuandu konta nia reforma fó-fatin ba Estadu nia Kofre ka entidade ne'ebé simu tiha ona kustu atu halo repozisaun, tenke dedúz repozisaun ne'e nia valór hosi kuantia ne'ebé entidade devedora iha direitu atu simu iha fulan ida tuirmai no fó-hatene faktu ne'e ba nia ho estornu nia nota.

2. Kuandu labele halo repozisaun tuir númeru anteriór, enti-dade devedora tenke fó fali kuantia ne'e.



SEKSAUN III

Oportunidade ba kustu nia pagamentu voluntáriu



Artigu 41

Prazu ba kustu nia pagamentu voluntáriu



1. Pagamentu voluntáriu sei halo iha loron 10 nia laran.



2. Prazu atu selu kustu ne'ebé sura tiha ona iha konta ne'ebé hasoru reklamasaun hahú ho notifikasaun kona-ba konta foun ka kona-ba desizaun definitiva ne'ebé la fó-razaun ba reklamasaun.



3. Iha rekursu hasoru desizaun kona-ba reklamasaun hasoru konta karik, kuandu prosesu tun mai tribunál iha instánsia dahuluk maka sei notifika responsavel atu halo pagamentu.



Artigu 42

Kustu nia pagamentu ho prestasaun



Kuandu kustu nia valór boot-liu US$50.00, ho responsavel nia rekerimentu iha prazu atu halo pagamentu voluntáriu nia laran, juíz, tuir nia arbítriu prudente, bele autoriza pagamentu ho prestasaun mensál no sem juru tan mora, iha fulan sanulu resin-rua nia laran.



Artigu 43

Kustu nia pagamentu ho depózitu ne'ebé hein Tribunál nia ordem



Kuandu kustu nia responsavel iha depózitu ruma ne'ebé hein hela Tribunál nia ordem, kustu nia pagamentu sei sai uluk kedas hosi depózitu ne'e.



Artigu 44

Pagamentu molok instaura ezekusaun



1. Liu tiha prazu atu selu dívida kona-ba kustu no molok instaura ezekusaun, devedór bele selu kustu ne'e ho tan juru tan mora ho taxa 0,25% fulan ida.



2. Juru sei arredonda ba sentavu nia dezena superiór ida imediata.



Artigu 45

Kustu nia pagamentu ne'ebé terseiru maka halo



Ema naran ida bele selu kustu ne'ebé ema seluk deve hela, iha prazu nia loron ida ikus ka liu tiha, iha kondisaun ne'ebé devedór bele selu, no hela ho direitu de-regresu hasoru devedór, salvu kuandu buat ruma hatudu katak nia halo pagamentu ne'e ho má-fé.



SEKSAUN IV

Preferénsia iha pagamentu no rateiu



Artigu 46

Pagamentu no lansamentu



1. Kuandu, liu tiha prazu atu halo pagamentu voluntáriu, pagamentu ne'e seidauk halo no labele iha levantamentu hosi depózitu nu'udar artigu 43, prosesu nia seksaun sei haruka kedas prosesu ba seksaun sentrál atu, iha loron lima nia laran, halo rateiu ba kustu nia parte ne'ebé selu tiha ona no halo pagamentu tuir artigu 47.



2. Prosesu sira-ne'ebé nia konta fó-fatin de'it ba estornu sei haruka ba seksaun sentrál atu halo lansamentu, iha loron lima nia laran tuir fali prazu atu halo reklamasaun hasoru konta.



Artigu 47

Preferénsia nia ordem atu halo pagamentu



Pagamentu sei halo tuir preferénsia nia ordem ida ne'e:



a) Reseita kontada ba Estadu nia Kofre;



b) Importánsia kontada ba entidade sira seluk;



c) Parte nia kustu.



Artigu 48

Rateiu



Halo tiha pagamentu sira referidu iha númeru anteriór, valór remanexente sei rateia ba kredór sira seluk.



Artigu 49

Pagamentu no rateiu atu halo kuandu ezekusaun hotu



Kuandu iha ezekusaun bem likidadu nia produtu la too atu selu kuantia ezekuenda no akrexidu, sei halo mós rateiu ba kuantia ne'ebé hetan tiha ona.



TÍTULU II

KUSTU KRIMINÁL



KAPÍTULU I

RESPONSABILIDADE BA PAGAMENTU



SEKSAUN I

Dispozisaun jerál



Artigu 50

La restituisaun ba valór ne'ebé selu tiha ona



Salvu iha kazu ne'ebé lei prevee espesialmente, kustu no multa ne'ebé selu tiha ona kuandu prosesu la'o daudaun labele fó fila-fali.



SEKSAUN II

Justisa nia taxa



Artigu 51

Justisa nia taxa nia fiksasaun



1. Juíz maka fiksa justisa nia taxa variavel nia valór, tuir devedór nia situasaun ekonómika, prosesu nia kompleksidade ka kestaun insidentál nia natureza dilatória ne'ebé haré kedas.



2. Kuandu juíz la fiksa valór ba justisa nia taxa, tenke konsidera iha likidasaun katak justisa nia taxa ne'e fiksa hela iha limite mínimu nia dobru, salvu dispozisaun seluk.



Artigu 52

Justisa nia taxa iha Tribunál iha instánsia dahuluk



Justisa nia taxa iha instánsia dahuluk tenke fiksa:



a) Iha prosesu krime ho tribunál singulár nia intervensaun, hosi US$10.00 too US$200.00;



b) Iha prosesu krime ho tribunál koletivu nia intervensaun, hosi US$20.00 too US$400.00



Artigu 53

Justisa nia taxa iha rekursu



Justisa nia taxa iha rekursu sei fiksa hosi US$10.00 too US$200.00.



SEKSAUN III

Enkargu



Artigu 54

Enkargu



Iha kustu halo parte enkargu sira-ne'e:



a) Reembolsu ba Estadu nia Kofre kona-ba despeza ne'ebé halo tiha ona;



b) Retribuisaun atu halo ba ema ne'ebé intervém asidental-mente iha prosesu, inkluindu kompensasaun ne'ebé lei estabelese;



c) Despeza ho transporte, alojamentu no alimentasaun ka ajuda ba kustu, ne'ebé tenke selu karik.



Artigu 55

Interveniente asidentál nia remunerasaun



1. 1. Peritu, louvadu, tradutór, intérprete, testemuña no ema seluk tan ne'ebé tama iha prosesu asidentalmente no ajuda iha dilijénsia ruma iha direitu ba remunerasaun ne'ebé juíz sei fiksa hosi US$6.00 too US$250.00.



2. Kuandu intervensaun ne'e iha kompleksidade ka demora espesiál, juíz bele hasa'e remunerasaun nia valór too valór previstu iha númeru anteriór nia dobru.



KAPÍTULU II

KUSTU NO MULTA SIRA NIA LIKIDASAUN NO PAGAMENTU



Artigu 56

Likidasaun, prazu no kálkulu nia forma



1. Seksaun sentrál sei halo kustu no multa sira nia likidasaun iha loron 10 nia laran.



2. Kuandu iha kondenasaun, desizaun finál tranzita tiha iha julgadu maka sei halo likidasaun no iha tribunál ne'ebé funsiona hanesan instánsia dahuluk.





Artigu 57

Likidasaun nia notifikasaun



1. Sei notifika responsavel no sira nia advogadu no defensór públiku, iha loron 10 nia laran, kona-ba likidasaun ne'ebé halo tiha ona atu halo reklamasaun, resebimentu ka pagamentu.



2. Notifikasaun ne'e sei halo ho likidasaun nia kópia.



Artigu 58

Likidasaun nia reklamasaun no reforma



1. Juíz sei haruka reforma likidasaun ne'ebé la halo tuir dispozisaun legál, ofisiozamente ka ho responsavel nia rekerimentu.



2. Responsavel bele reklama hasoru likidasaun, iha loron 10 nia laran, maibé molok selu tiha kustu.



Artigu 59

Prazu ba kustu nia pagamentu voluntáriu



1. Pagamentu voluntáriu sei halo iha loron 10 nia laran.



2. Kuandu iha reklamasaun hasoru likidasaun prazu atu selu kustu hahú ho notifikasaun kona-ba likidasaun foun ka kona-ba desizaun definitiva ne'ebé la fó-razaun ba reklamasaun.



Artigu 60

Kustu nia pagamentu ho prestasaun



Kuandu kustu nia valór boot-liu US$50.00, ho responsavel nia rekerimentu iha prazu atu halo pagamentu voluntáriu nia laran, juíz, tuir nia arbítriu prudente, bele autoriza kustu nia pagamentu ho prestasaun mensál no sem juru tan mora, iha fulan sanulu resin-rua nia laran.



TÍTULU III

MULTA PROSESUÁL



Artigu 61

Multa aplikavel iha prosesu sivíl no kriminál



Juíz sei fiksa multa aplikavel iha prosesu sivíl no kriminál, sem adisionál, hosi US$10.00 hanesan mínimu too US$1,000.00 hanesan másimu.



Artigu 62

Likidasaun, notifikasaun, reklamasaun no pagamentu



1. Seksaun sentrál sei halo multa nia likidasaun iha loron 10 nia laran, liu tiha desizaun finál nia tránzitu no iha tribunál ne'ebé funsiona hanesan instánsia dahuluk.



2. Sei notifika responsavel no sira nia advogadu no defensór públiku, iha loron 10 nia laran, kona-ba likidasaun ne'ebé halo tiha ona, atu halo reklamasaun ka pagamentu.



3. Juíz sei haruka reforma likidasaun ne'ebé la halo tuir dispozisaun legál.

4. Responsavel bele reklama hasoru likidasaun iha loron 10 nia laran, maibé molok selu tiha multa.



TÍTULU IV

AKTU AVULSU



Artigu 63

Valór kona-ba notifikasaun no dilijénsia avulsa seluk



Sei selu US$5.00 tanba notifikasaun, editál nia afiksasaun ka dilijénsia avulsa seluk ida-idak .



Artigu 64

Sertidaun no kópia nia folin



1. Tanba sertidaun ida-idak ne'ebé hasai hosi prosesu tenke selu:



a) Tanba pájina dahuluk US$0.50;



b) Tanba pájina 10 sira seginte ida-idak US$0.10;



c) Liu tiha pájina dasanuluk, US$1.50 tanba tahan 20 nia grupu ida-idak no US$0.10 tanba tahan sira seluk ida-idak.



2. Tanba fotokópia ne'ebé hasai hosi prosesu tenke selu:



a) Tanba sanulu sira dahuluk ida-idak US$0.10;



b) Liu tiha pájina dasanuluk, US$1.50 tanba tahan 20 nia grupu ida-idak no US$0.10 tanba tahan sira seluk ida-idak.



Artigu 65

Valór atu selu tanba prosesu nia konfiansa



Tanba prosesu ida-idak nia konfiansa tenke selu US$5.00.



Artigu 66

Pagamentu tanba aktu ka dilijénsia avulsu nia kustu



1. Aktu no dilijénsia avulsu nia kustu tenke selu kedas iha momentu ne'ebé hatama rekerimentu.



2. Konta sei halo iha rekerimentu rasik ka iha aktu pratikadu no sei rejista iha livru kona-ba aktu avulsu sira nia emolumentu.



3. Sekretáriu judisiál maka sai importánsia ne'ebé selu tiha ona nia fiél depozitáriu.



TÍTULU V

JURU TAN MORA



Artigu 67

Juru tan mora nia insidénsia no taxa



Kuantia kontada ka likidada hotu-hotu sei manán juru tan mora, ho taxa 0,25% fulan ida, hahú iha momentu ne'ebé pagamentu nia prazu hotu.







TÍTULU VI

KUSTU NO MULTA NIA PAGAMENTU KOERSIVU

KAPÍTULU I



DEPÓZITU NIA LEVANTAMENTU



Artigu 68

Depózitu nia levantamentu



Iha prazu atu selu kustu ka multa nia laran devedór la halo pagamentu no la rekere karik, juíz haruka halo lavantamentu ba kuantia korrespondente, ho juru tan mora, tuir artigu 43, kuandu depózitu ne'e halo iha prosesu ne'ebé fó-fatin ba kustu ka multa ne'e nia laran.



KAPÍTULU II

AKSAUN EZEKUTIVA TANBA KUSTU NO MULTA NIA DÍVIDA



Artigu 69

Informasaun kona-ba bem peñoravel nia ezisténsia



1. Kuandu labele hetan kustu ka multa nia pagamentu nu'udar artigu 41 too 45, 57 too 60 no 68, prosesu nia seksaun, iha loron 10 nia laran, haruka sertidaun, ho informasaun katak pagamentu seidauk halo, ba Ministériu Públiku atu instaura ezekusaun hodi halo kobransa koersiva, ho informasaun kona-ba devedór iha bem peñoravel ka lae.



2. Simu tiha sertidaun, Ministériu Públiku sei buka atu hatene responsavel iha bem peñoravel ka lae.



Artigu 70

Ezekusaun nia instaurasaun



1. Ministériu Públiku instaura ezekusaun hasoru kustu ka multa nia devedór kuandu hatene katak nia iha bem peñoravel.



2. Ezekusaun labele hala'o no labele kontinua kuandu dívida ne'e, tanba iha valór ki'ik los, la justifika aktividade ka despeza ne'ebé prosesu hamosu.



Artigu 71

Ezekusaun tan kustu, multa no valór kontadu seluk nia termu



1. Sem prejuizu ba artigu seginte nia dispozisaun, ezekusaun tan kustu, multa no valór kontadu seluk sei instaura iha apensu ba prosesu iha ne'ebé halo tiha ona notifikasaun ba pagamentu, ho rekerimentu inisiál nia autuasaum no termu sira seluk tuir prosesu ezekusaun komúm.



2. Kuandu iha dezapensasaun ba prosesu, sei hatama iha ezekusaun sertidaun kona-ba konta ka likidasaun ho indikasaun katak prazu ba pagamentu liu tiha ona.



Artigu 72

Ezekusaun nia termu iha kazu espesiál



Ezekusaun tan multa aplikada ba interveniente asidentál sei halo ho baze iha likidasaun nia sertidaun, ne'ebé seksaun tenke entrega ba Ministériu Públiku iha loron 10 nia laran.



Artigu 73

Ezekusaun nia kumulasaun



1. Hasoru responsavel ida mesak sei instaura ezekusaun ida de'it, maski iha konta barak ne'ebé sira nia kustu iha prosesu no apensa seidauk selu.



2. Kuandu iha responsavel la solidáriu barak, sei instaura ezekusaun ida hasoru sira ida-idak.



Artigu 74

Kustu provavel nia depózitu



Ezekusaun nia kustu provavel sei depozita hamutuk ho kuantia ezekuenda.



Artigu 75

Aktivu nia insufisiénsia no ezekusaun nia arkivamentu kondisionál



1. Kuandu haré katak ezekutadu laiha bem peñoravel seluk no bem peñoradu la too atu selu kustu no sobre bem sira-ne'e laiha direitu reál ba garantia rejistadu, juíz, ho Ministériu Públiku nia rekerimentu, dispensa kredór sira nia konkursu no haruka halo kedas bem sira-ne'e nia likidasaun atu selu kustu ho sira nia produtu.



2. Kuandu haré katak ezekutadu laiha bem, tenke arkiva tiha ezekusaun, sem prejuizu atu kontinua fali kuandu hatene katak ezekutadu iha fali bem ona.



Artigu 76

Kustu nia kréditu nia preskrisaun



1. Kustu nia kréditu preskreve iha prazu tinan 5.



2. Arkiva tiha ezekusaun tuir artigu anteriór, n. 2, preskrisaun nia prazu hahú iha despaxu ne'ebé ordena arkivamentu nia data.



TÍTULU VII

TEZOURARIA NIA SERVISU



KAPÍTULU I

RESEITA NIA MOVIMENTASAUN



Artigu 77

Depózitu



1. Kuantia ne'ebé mai hosi preparu ba despeza, kustu no multa, ho destinu naran ida, no importánsia seluk tan kona-ba prosesu sei depozita diretamente, ho gia, iha konta aberta iha entidade bankária ida, iha numeráriu ka xeke vizadu ho benefísiu ba entidade ida-ne'e.



2. Xeke sira mensionadu iha númeru anteriór bele haruka ba sekretáriu judisiál iha tribunál ne'ebé prosesu la'o, atu too iha ne'ebá loron ida molok pagamentu nia prazu hotu.



3. Seksaun nia responsavel tenke entrega kedas gia ba sekre-táriu judisiál, ne'ebé tenke entrega ba entidade bankária.



4. Ezekusaun nia produtu, renda, kausaun no kuantia seluk tan ne'ebé la'ós enkargu judisiál sei hatama iha entidade bankária, iha depózitu autónomu, hodi hein juíz ne'ebé kaer prosesu nia ordem.



Artigu 78

Konta bankária



1. Tribunál ida-idak sei loke konta iha entidade bankária atu halo depózitu no levantamentu ba kuantia sira-ne'ebé artigu anteriór refere.



2. Konta sira referidu iha númeru anteriór vense juru.



Artigu 79

Gia ba depózitu ka pagamentu



1. Kuandu prazu atu selu kuantia ruma hahú, seksaun emite gia respetiva no hakerek termu kona-ba emisaun ne'e iha autus no entrega gia ne'e ba parte sira ka sira nia reprezen-tante ka mandatáriu ne'ebé ba foti.



2. Kuandu tenke iha notifikasaun atu selu kuantia ruma, seksaun tenke tau ho gia respetiva.



3. Interesadu bele husu diretamente iha seksaun gia ba pagamentu naran ida no seksaun tenke pasa no entrega kedas gia ne'e.



4. Gia ne'ebé pesoa ho obrigasaun solidária tenke selu sei entrega ho termu iha autus ba ema ne'ebé mai husu uluk.



5. Kuandu iha urjénsia atu pratika aktu ne'ebé depende hosi kuantia ruma nia pagamentu no entidade bankária taka hela, sei entrega kuantia ne'e ba sekretáriu judisiál ka ema ne'ebé substitui nia, no se mak simu sai fiél depozitáriu ba kuantia ne'e no tenke depozita kuantia ne'e iha loron util seginte.



6. Hasoru kuantia referida iha númeru anteriór ema ne'ebé simu kuantia ne'e sei entrega kedas nota-resibu numeradu no asinadu iha ne'ebé tenke hakerek hela valór resebidu, ema ne'ebé ho nia naran ema halo depózitu ka pagamentu ne'e nia naran no prosesu nia identifikasaun, no arkiva nota ne'e nia talaun.



Artigu 80

Mensaun atu hakerek iha gia



1. Iha gia atu selu kuantia ruma tenke hakerek:



a) Identifikasaun kona-ba konta no banku nia balkaun;



b) Data too ne'ebé bele halo depózitu ka pagamentu;



c) Tribunál ne'ebé hasai gia ne'e, prosesu nia natureza no númeru, konta korrente no kustu nia konta nia númeru, kuandu iha;



d) Ema ne'ebé tenke selu nia naran; no



e) Valór sira nia diskriminasaun no destinu.



2. Sei pasa gia ho kópia tolu, atu hela ida iha banku, ida iha prosesu no ida ba depozitante.



Artigu 81

Gia nia duplikadu nia entrega



1. Iha dia util ida primeiru tuir fali loron iha ne'ebé simu preparu ba despeza, kustu ka multa, Caixa Geral de Depósitos (entidade bankária) haruka gia respetiva sira nia duplikadu fila ba Tribunál, ne'ebé haruka ema ba foti.



2. Kuandu iha urjénsia, halo tiha pagamentu ka depózitu, interesadu bele hatama iha prosesu dokumentu komprovativu ba pagamentu ne'e.



Artigu 82

Importánsia paga nia relasaun no kontrolu



1. Seksaun sentrál sei organiza loro-loron gia paga sira nia relasaun ida, ne'ebé seksaun ba prosesu nia responsavel tenke rubrika.



2. Seksaun sentrál konfere fulan-fulan relasaun ne'e ho banku nia extratu no averigua diferensa ruma ne'ebé hetan.



Artigu 83

Arekadasaun ba aktu avulsu sira nia emolumentu



Sei hela iha kaixa, iha seksaun sentrál, kuantia sira-ne'ebé mai hosi aktu no papél avulsu iha fulan ida-idak nia laran, atu depozita iha Estadu nia Kofre, ho gia, iha fulan seginte nia loron dahuluk.



Artigu 84

Reseita nia destina



Sei hela ba Estadu nia Kofre:



a) Multa ho natureza naran ida kobrada iha juizu;



b) Justisa nia taxa sivel;



c) Justisa nia taxa kriminál;



d) Kustu sivel ka kriminál nia juru tan mora;



e) Konta iha depózitu sira nia juru remuneratóriu;



f) Importánsia ne'ebé mai hosi aktu avulsu;



g) Xeke preskritu nia valór.











KAPÍTULU II

ORGANIZASAUN



SEKSAUN I

LIVRU OBRIGATÓRIU



Artigu 85

Livru iha seksaun sentrál



1. Seksaun sentrál tenke iha livru sira ne'e :

a) Livru atu rejista konta no likidasaun;



b) Livru ba pagamentu;



c) Livru ba aktu avulsu nia emolumentu;



d) Livru ba prosesu sira nia konta korrente.



2. Kuandu bele, livru sira referidu iha númeru anteriór sei organiza iha suporte informátiku.



Artigu 86

Livru atu rejista konta no likidasaun



1. Konta no likidasaun sira referidu iha artigu 34, n. 2, no artigu 56, n. 1, nia duplikadu maka konstitui livru atu rejista konta no likidasaun.



2. Halo tiha pagamentu ba kustu devidu no lansamentu no estornu iha livru ba pagamentu, sei hasai duplikadu sira referidu iha númeru anteriór ba livru arkivu ida.



Artigu 87

Livru ba pagamentu



Selu tiha kustu ka halo tiha rateiu ba kustu, sei halo lansamentu iha livru ba pagamentu, ho indikasaun kona-ba prosesu nia númeru no natureza, konta ka likidasaun nia númeru, livru kona-ba konta korrente nia númeru no folla no pagamentu sira ne'ebé atu halo.



Artigu 88

Livru ba aktu avulsu nia emolumentu



Iha livru ba aktu avulsu nia emolumentu sei rejista, tuir ordem numérika, emolumentu hotu-hotu ne'ebé tribunál kobra, ho anotasaun kona-ba konta respetiva nia númeru.



Artigu 89

Livru ba prosesu nia konta korrente



1. Livru ba prosesu nia konta korrente sei iha tahan ida ba prosesu ida-idak no nia apensu, iha ne'ebé sei hakerek loro-loron, iha parsela no iha koluna ketak-ketak, hanesan kréditu kuantia ne'ebé tama hanesan preparu ba despeza ka kustu ne'ebé selu tiha ona, no hanesan débitu kuantia sira kona-ba kustu atu selu no kona-ba saldu ne'ebé liu preparu ba despeza ka liu kustu depozitadu.



2. Débitu kona-ba kustu nia pagamentu ka restituisaun sei rejista iha livru kuandu tenke haruka prosesu ba seksaun sentrál atu halo lansamentu iha livru ba pagamentu ka kuandu prosesu sai ba seksaun ka tribunál seluk.



3. Halo tiha loro ida-idak nia lansamentu, sei kalkula kréditu no débitu nia saldu no sei sertifika saldu ne'e iha termu kona-ba remesa ba prosesu nia seksaun.



4. Enserra tiha konta, folla kona-ba konta sei husik hela iha livru ne'e no sei uza nafatin atu halo lansamentu foun.



Artigu 90

Livru ausiliár



Hamutuk ho livru sira-ne'ebé artigu anteriór sira refere sei iha mós livru sira-ne'ebé prátika hatudu katak presiza tan.



Artigu 91

Abertura no enserramentu nia termu



Livru sira-ne'e sei iha abertura no enserramentu nia termu, no Tribunál nia Juíz Administradór tenke asina termu sira-ne'e no rubrika tahan hotu-hotu.



SEKSAUN II

PAGAMENTU



Artigu 92

Eskrita nia verifikasaun, pagamentu no xeke



1. Iha fulan ida-idak nia loron util dahuluk, loke tiha sekretaria, halo-hotu tiha lansamentu kona-ba prosesu sira-ne'ebé simu tiha ona atu halo lansamentu no verifika tiha totál atu selu iha prosesu ida-idak tuir duni konta korrente respetiva no operasaun sira-ne'e los duni, sekretáriu judisiál soma livru ba pagamentu nia koluna ida-idak.



2. Apura tiha totál sira-ne'e, sekretáriu judisiál aprezenta livru ho prosesu respetivu ba Juíz Administradór atu haré, no juíz ne'e haré lansamentu sira-ne'e tuir duni dadu sira-ne'ebé hakerek hela iha prosesu sira-ne'e no tau nia vistu iha sira hotu; iha prosesu ne'ebé tenke kontinua ka tenke haruka ba Tribunál seluk, Juíz Administradór tenke halo kedas ezame ne'e kuandu lansamentu iha livru ba pagamentu hotu.



3. Tuir fali, Sekretáriu Judisiál pasa xeke ba ema ka entidade sira ho valór totál ne'ebé ida-idak iha direitu atu simu no aprezenta ba Juíz Administradór atu haré buat sira-ne'e los ka lae, asina xeke no rubrika iha livru nia nota kona-ba verifikasaun.

4. Tenke anota iha livru xeke sira nia númeru no remesa nia data.



Artigu 93

Pagamentu ba despeza ne'ebé preparu garante



1. Liu tiha dilijénsia ka audiénsia iha ne'ebé atu uza preparu ba despeza, seksaun sei halo nota ka despeza nia relasaun, ho duplikadu, no juíz sei tau nia vistu iha nota ka relasaun ne'e.



2. Seksaun sentrál, haré ba nota ne'e, sei pasa xeke devidu no anota xeke sira-ne'e nia númeru no data iha nota ne'e.



3. Tuir fali, seksaun sentrál halo débitu nia lansamentu iha despeza nia konta iha livru ba prosesu sira nia konta korrente.



Artigu 94

Xeke nia asinatura no mensaun kona-ba data limite ba pagamentu



1. Juíz Administradór no Sekretáriu Judisiál sei asina xeke atu movimenta konta.

2. Bele hatudu iha xeke ida-idak data limite ba nia pagamentu.



Artigu 95

Xeke nia expedisaun, relasaun no kontrolu



1. Xeke tenke haruka too fulan ida-idak nia loron 10, hamutuk ho nota diskriminativa.



2. Iha loron ne'ebé haruka xeke, Tribunál sei haruka ba entidade bankária, xeke sira-ne'e nia relasaun, iha ne'ebé hatudu, iha koluna rasik, emisaun nia data, númeru korrespondente, interesadu nia naran, valór no validade nia termu kuandu iha.



3. Seksaun sentrál konfere, loro-loron, xeke nia relasaun ho entidade bankária nia extratu no anota iha relasaun ne'e nia duplikadu iha loron sa maka halo pagamentu ba xeke ida-idak.



Artigu 96

Perda ba xeke nia validade



1. Sei lakon validade ho proveitu ba Estadu nia Kofre xeke sira-ne'ebé la aprezenta ba pagamentu iha fulun tolu nia laran hahú iha fulan ida ne'ebé emite xeke ne'e nia loron ida ikus.



2. Kuandu, liu tiha ona prazu ba xeke nia validade, xeke ne'e la aprezenta ba pagamentu, entidade bankária tenke informa Tribunál iha loron sanulu nia laran.



3. Simu tiha informasaun ne'e, Sekretáriu Judisiál halo lansamentu iha livru ba pagamentu, ho proveitu ba Estadu nia Kofre, kona-ba xeke ne'ebé lakon validade nia valór.



Artigu 97

Saldu nia informasaun, balansu mensál no nia verifikasaun hosi juíz



1. Fulan-fulan Sekretáriu Judisiál tenke halo balansu atu hatene saldu iha livru kona-ba prosesu sira nia konta korrente nia soma ho xeke emitidu no la pagu nia valór korresponde ho depózitu sira ne'ebé halo tiha ona iha konta iha entidade bankária no kuantia sira-ne'ebé mai hosi aktu avulsu sira nia soma.



2. Ba númeru anteriór nia dispozisaun, iha fulan ida-idak nia finál, entidade bankária informa Sekretáriu Judisiál kona-ba konta sira nia saldu.



3. Juíz Administradór tenke verifika balansu referidu iha n. 1.



Artigu 98

Nota atu haruka ba Ministériu ba Finansas



Iha trimestre ida-idak, Sekretáriu Judisiál tenke haruka ba Ministériu ba Finansas reseita no repozisaun sira-ne'ebé halo iha trimestre anteriór nia nota diskriminativa.







Tabela referida iha artigu 11