REPÚBLICA DEMOCRÁTICA DE TIMOR-LESTE

REPÚBLICA DEMOCRÁTICA DE TIMOR-LESTE

DESPACHO

5/Dpx-Prez/CNE/V/2008

Edukasaun Sivika iha Nivel Sub-Nasional



Hanoin katak:



1. Edukasaun sivika importante tebtebes atu halao iha teritoriu tomak, tantu iha nivel nasional nunee mos iha sub-nasional, ho meios sira neebe mak iha, atu nunee bele halekar informasaun sira relasionadu ho eleisaun nian, tantu pra no pasca-eleisaun nian, iha komunidade nia let, no atu hodi ajuda haforsa prosesu hari estadu no hari nasaun;



2. Iha nivel nasional, ein kooperasaun ho parte sira relevantes Organizasaun Naun-Governamental no Partidu Politiku sira - CNE hahuu halao tiha ona aproximasaun balu ba ambitu edukasaun sivika, no nee balu até halao tan ona liu hosi CNE ninia Programa Klabis, neebe mak transmite liu hosi TVTL dala ida kada fulan;



3. Iha nivel sub-nasional, neebe mayoría hosi populasaun nasaun nee horik ba, presiza fo atensaun makaas, buka no hatur meios, kria sistema no mekanisme ruma ba ambitu realizasaun edukasaun sivika nee. Komunidade barak mak sei enfrenta situasaun ignorancia kona-ba materia ka asuntu sira mak relasionadu ho eleisaun nian. Komunidade sira iha area remotu sira, dok no la iha asesu ba informasaun, barak liu hasoru situasaun ignoransia kona-ba kestaun sira relasionadu ho eleisaun nian, tantu pra no pasca-eleisaun nian;



4. Limitasaun asesu ba informasaun, hela dok hosi sentru informasaun, padraun povoamentu mak dok malu, kondisaun geografika no infrastrutura sira ne’ebe mak la diak, ida-idak ka hamotuk sai nudar obstakulu bo'ot neebe contribuí ba problema ignorancia nee;



5. Komunidade sira hosi nivel sub-nasional barak ho iniciativa rasik halo pedidu no hato'o proposta, verbalmente ka escrita, mai iha Sekretariadu CNE, husu atu komisariu/a sira ba fahe informasaun kona-ba kestaun eleisaun nian.



Hatitu ba:



a. Artigo 65.6, Lei-Inan (Konstituisaun) RDTL nian, neebe hatur estatutu CNE nudar orgaun independente ho mandatu atu tau matan ba aktu eleitoral saida deit mak halao iha nasaun nee, ba eleisaun jeral ka ba eleisaun lokal;



b. Lei Numeru 5/2006 kona-ba orgaun eleitoral sira, neebe hatur katak CNE nee nudar orgaun eleitoral neebe independenti husi orgaun poder politiku saida deit, sentral ka lokál, no goza autonomia finanseira, administrativa no organizativa; no fo kbit ba orgaun eleitoral nee atu promove esklaresimentu neebe objetivu ba sidadaun sira kona-ba aktu eleitoral sira, inklui mos resenseamentu eleitoral;



c. Rejimentu Internu Comissão Nacional de Eleições (CNE);

d. Plenaria CNE;



Hare ba:



Planu Anual CNE nian ba Anu Fiskal 2008, neebe hatur programa edukasaun sivika nudar prioridade ida, aleinde programa sira seluk.



Prezidente CNE hasai Despaxu hanesan tuir mai nee:



Dahuluk : Atu, iha tempu badak, komisariu/a sira bele buka halo (needs assesment) ba realizasaun programa edukasaun sivika iha nivel sub-nasional, neebe sei kobre distritu sanulu-resin-tolu, no iha distritu ida-idak sei fo atensaun boot liu ba areas sira neebe mak objetivamente tama kategoria remotus, dok hosi meios komunikasaun, no la iha asesu ba informasaun;



Daruak : Ba ambitu nee, husu komisariu/a sira ida-idak, tuir distritu ida-idak mak sira responsabiliza ba, atu halo koordenasaun ho entidade kompetente sira iha nivel sub-nasional (bele autoridade governu lokal, autoridade komunitaria sira, komunidade sira, ka parte sira seluk mak hare relevante) hodi identifica komunidade sira neebe mak hare preenxe rekezitu sira atu sai nudar alvu ba edukasaun sivika hosi CNE, no hodi halo preparasaun, planeamentu, trasa programa no aktividade sira nesesariu nudar parte hosi implementan ba programa edukasaun sivika nee;



Datoluk : Komisariu/a sira ida-idak, ein koordenasaun ho entidade kompetente sira iha distritu ida-idak, no bazeia ba rezultadu observasaun, bele determina metodolojia mak hare relevante ba interese realizasaun edukasaun sivika iha nivel sub-nasional ne'e. Ne’e inklui fatin, forma no mekanisme lalaok, no entidade sira neebe mak atu sai nudar orador ka makfahen matenek ;



Dahaat : Atu bele haluan kobertura edukasaun sivika mak halao iha distritu ida-idak, komisariu/a sira buka dezeinvolve mos kooperasaun ka termusde entendimentu (TdE) ruma ho media sira, liliu radio komunidade;



Dalimak : Materia ba edukasaun sivika sei kobre asuntus sira relasionadu ho eleisaun nian, tantu pra ka pasca-eleisaun, inklui mos resenseamentu eleitoral;



Daneen : Kustus nesesariu ba realizasaun edukasaun sivika nee sei kobre tuir liña (item) neebe hatur tiha ona iha Orsamentu CNE nian. Atu fasilita lalaok edukasaun sivika nee, no bazeia ba planu no proposta mak komisariu/a sira ida-idak hatama ba Sekretariadu, CNE sei aloka orsamentu ruma tuir kbit ne’ebe mak CNE iha;



Dahituk : Hafoin remata tiha realizasaun programa edukasaun sivika nee, komisariu/a sira prepara no hatoo relatoriu kona-ba lala'ok no rezultadu edukasaun sivika ne'e ba Sekretariadu CNE. Relatóriu sei aneksadu ho lista prezensa partisipante sira nian no dokumentu sira relasionadu;



Daualuk : Despaxu nee hahu tama ein vigor desde loron fo sai;



Dasiak : Karik iha ezizensia ruma despaxu nee sei bele hare fila hikas hodi halo amandamen



Despaxu ne'e hasai iha Dili, iha loron 30 Fulan-Abril Tinan 2008





Prezidente CNE,







DR. Faustino Cardoso Gomes,MSi.