REPÚBLICA DEMOCRÁTICA DE TIMOR-LESTE

REPÚBLICA DEMOCRÁTICA DE TIMOR-LESTE

Diploma Ministerial

3/ME/2014

Dekretu Lei N.o 23/2010, 9 Dezembru, konabá Estatutu Karreira Dosente, estabelese ona lei bázika bá avaliasaun dezempeñu dosente sira nian nó orienta Ministério da Educação atu estabelese regulamentasaun espesífika liu husi Diploma Ministeriál ida atu implementa hó diak regra konabá avaliasaun dezempeñu ne’ebé maka hatuur iha Diploma Ministeriál ida ne’e.



Iha konformidade ida ne’e, Ministério da Educação apresenta Diploma Ministeriál ida ne’e, atu defini:



· Prosedimentu nó relasaun kompetênsia iha koordenasaun, ezekusaun, omologasaun nó fiskalizasaun husi prosesu avaliasaun dezempeñu;



· Sistema klasifikasaun;



· Rejimi reklamasaun nó rekursu;



· Efeitu husi avaliasaun;



· Garantia bá prosesu avaliasaun.



Bazeia bá Artigu 115(p) husi Konstituisaun Repúblika; Artigu 18(5) nó 119(2) husi Lei No 5/2009, 15 Julho konabá Estatutu Funsaun Públika nó mós Dekretu-Lei No 23/2010, 9 Dezembru, konabá Estatutu Karreira Dosente, Ministério da Educação publika diploma ida ne’e hodi vale nu’udár lei:



Kapítulu I

Dispozisaun Jerál



Seksaun I



Artigu 1o

Objetivu



Diploma Ministeriál ida ne’e estabelese rejime avalisaun espesiál ida bá dezempeñu servisu husi dosente sira.



Artigu 2o

Âmbitu Aplikasaun nian



1. Diploma Ministeriál ida ne’e aplika deit bá dosente sira ne’ebé maka hanorin iha nível ensino pré-eskolar, ensino báziku, ensino sekundáriu jerál, inklui tékniku vokasionál iha eskola públika nó privada sira;



2. Dosente hirak ne’e tenke hala’o ona sira nia servisu funsio-nál iha eskola ida, pelo menos fulan nén (6) nia laran.



Artigu 3o

Objetivu husi Avaliasaun



1. Núdar instrumentu ida atu haforsa jestaun integrada re-cursos humanos hodi nuné bele atinji objetivu fundamentál Estado nian, liu-liu Ministério da Educação atu dezenvolve sistema edukasaun ida hó kualidade diak.



2. Avaliasaun dezempeñu ida ne’e liu-liu iha objetivu atu hadi’a prestasaun servisu dosente sira nian liu husi komunikasaun ne’ebé diak entre dosente ida hó ninia supervizór, ne’ebé sei asegura katak:



a. Supervizór sei komunika hó forma klara konabá dosente ninia objetivu servisu nó kna’ar;



b. Supervizór sei komunika hó forma klara konabá fatór hirak ne’ebé maka sei konsideradu iha avalisaun;



c. Iha rekoñesimentu bá dezempeñu servisu ne’ebé diak atu fó motivasaun bá dosente sira;



d. Nesesidade bá formasaun kapasidade sei identifika nó implementa hó lolós;



3. Nu’udar instrumentu ida atu asegura katak promosaun, progresaun nó integrasaun bá karreira dosente sei tuir prinsípiu mêritu.



Seksaun II

Prinsípiu Avaliasaun Nian



Artigu 4o

Prinsípiu Jerál



1. Avaliasaun dezempeñu tenke bazeia bá kritéria ne’ebé ob-jetivu, liu-liu tenke sujeita bá prinsípiu justisa, igualdade, imparsialidade nó justifikasaun ne’ebé apropriada;



2. Avaliasaun dezempeñu bá dosente sira tenke konsidera sira nia área funsionál nó mós objetivu nó planu servisu;



3. Prosesu avaliasaun dezempeñu serve hanesan revizaun formal ida bá relasaun entre supervizór hó ninia subor-dinadu;



4. Avaliasaun dezempeñu obriga supervizór ida atu atribui servisu, fó orientasaun nó monitoriza dezempeñu husi ninia subordinadu nó mós fó apoiu bá dezenvolvimentu subordinadu nian.



Artigu 5o

Konfidensialidade



1. Prosesu avaliasaun dezempeñu sei hala’o hó forma konfi-densial. Rezultadu husi avaliasaun sei fó sai deit bá parte kompetente tuir prosedimentu ne’ebé hatuur iha Diploma Ministeriál ida ne’e.



2. Atór husi avaliasaun dezempeñu ida ne’e iha devér atu rai segredu konabá rezultadu avaliasaun.



3. Se deit maka la kumpri exijênsia iha leten sei sujeita bá asa-un disiplinár ne’ebé hatuur ona iha Estatutu Funsaun Públika.



Artigu 6o

Garantia ba imparsialidade



1. Atu garante imparsialidade, avaliadór ida labele avalia de-zempeñu husi ninia kaben ka membru família seluk hanesan:



a. Inan-aman, avô sira, oan sira, bei-oan sira;



b. Maun, bin, alin, primo, prima, tio nó tia;



c. Oan husi maun/alin ;



2. Se karik iha konflitu interese, maka kompete bá superior imediatu husi avaliadór atu halo avaliasaun.



Artigu 7 o

Periodisidade



Avalisaun dezempeñu hala’o kada tinan entre fulan Janeiru nó Marsu mas sei laiha prejuízu bá saída maka hatuur iha Diploma Ministeriál ida ne’e konabá avalisaun extraordinária.



Seksaun III

Direitu, Dever nó Garantia



Artigu 8o

Direitu nó Devér



1. Dosente nu’udar avaliadu iha direitu atu halo análize kon-junta hó ninia superior imediatu ne’ebé sai nu’udar avaliadór bá fatór sira ne’ebé maka konsideradu iha avaliasaun;



2. Avaliadór iha dever atu aplika nó divulga prosesu avaliasaun nian iha tempu ne’ebé apropriadu, hodi nune’e bele garante katak avaliasaun halo tuir prinsípiu jerál sira.



Artigu 9o

Reklamasaun nó Rekursu



Sei garante direitu bá avaliadu atu halo reklamasaun nó rekursu. Mas invokasaun bá rezultadu klasifikasaun husi kada atribuisaun avaliasaun hó diferensa ne’ebé la signifikativa, ida ne’e sei la konstitui hanesan razaun válida atu halo reklamasaun nó rekursu.



Kapítulu II

Klasifikasaun nó efeitu Avaliasaun nian



Artigu 10o

Klasifikasaun Avaliasaun



1. Rezultadu husi avaliasaun dezempeñu klasifikadu kualita-tivamente bá kategoria hát, hanesan tuir mai ne’e:



· “Muito Bom”;



· “Bom”;



· “Suficiente”;



· “Insuficiente”

2. Klasifikasaun hirak ne’e hetan liu husi sistema avaliasaun kuantitativa bá kritéria avaliasaun ne’ebé estabelecida ona.



Artigu 11o

Efeitu husi Avaliasaun



Avaliasaun dezempeñu ne’e nesessáriu atu konsidera efeitu sira hanesan tuir mai:



a. Promosaun nó progresaun dentro de karreira nó kategoría;



b. Konversaun husi nomeasaun probatória bá definitiva;



c. Asesu ba kargu diresaun nó xefia iha nível eskolár;



d. Renovasaun ka terminasaun kontratu bá dosente kontratadu sira;



e. Atribuisaun prémiu ka insentivu;



f. Instaurasaun prosedimentu disiplinár;



g. Desisaun atu halo formasaun bá kapasitasaun nó dezen-volvimentu.



Artigu 12o

Konsekuênsia husi Klasifikasaun Avaliasaun



1. Klasifikasaun “Muito Bom”.



Bainhira dosente hó estadu funsionalizmu “professor senior” nó “professor” ida hetan klasifikasaun “muito bom” iha tinan rua tutuir malu, nia eskalaun sei sa’e iha tinan rua nia laran.



2. Klasifikasaun “Bom”



Bainhira dosente ida hó estadu funsionalizmu “professor senior” nó “professor” hetan klasifíkasaun “Bom” iha tinan tolu tutuir malu, nia eskalaun automatikamente sei sa’e.



3. Klasifikasaun “suficiente”



Hó objetivu bá progresaun eskalaun nó integrasaun bá karreira dosente nian, avaliadór tenke halo diskusaun hó avaliadu nó determina alvo dezempeñu tinan oin nian atu bele hadi’a ninia dezempeñu.



4. Klasifikasaun “Insuficiente”



a. Bá dosente ne’ebé maka hetan ona nomeasaun definiti-va hanesan “professor” ka “professor senior”, atribui-saun bá klasifikasaun “insuficiente” la signifika hakotu kedas sira nian funsaun, mas sei loke dalan imediatu bá prosesu investigasaun atu determina medida apropriada ne’ebé hakerek iha Artigu 45 husi Dekretu-Lei No 23/2010, 9 Dezembru, konaba Estatutu Karreira Dosente;



b. Bá dosente sira hó estatuto funsionalizmu “Asistente” nó “Ajente”, klasifikasaun “insuficiente” signifika hakotu kedas sira nia funsaun bá Assistente ka kontratasaun servisu nian bá ajente.



Kapitulu III

Kritéria nó Ficha Avaliasaun



Artigu 13o

Kritéria Avaliasaun



I. Avaliasaun jerál:



Fatór avaliasaun ne’ebé inkluidu iha kritéria ida ne’e maka hanesan tuir mai:



1. Prezensa:



a. Atende eskola durante oras servisu (husi início to’o remata);



b. Hanorin tuir karga orária (por exemplo, horas hanorin bá Ensino Básico másimu 24 horas cada semana);



c. Informa lalais, verbalmente ká liu husi hakerek bá superior imediatu bainhira la bele tama servisu nó aprezenta justifikasaun ne’ebé forti (sempre hó evidênsia).



2. Interasaun hó inan-aman nó komunidade:



a. Dosente kria nó haforsa interasaun hó Asosiasaun In-an-Aman hó Professor (AIAP) núdar orgaun internu eskola nian hodi hasae kualidade aprendizajem;



b. Fortifika enkontru rutinu ka regular hó inan-aman bá progresu dezenvolvimentu matenek nó komportamentu estudante sira nian.



3. Dezenvolvimentu profisionál nó kualidade hanorin:



a. Halo esforsu ativamente atu kontinua aprende;



b. Dezenvolve kualidade hanorin nian liu husi atende to’o hotu hó susesu, formasaun hirak ne’ebé fornesida husi eskola ka institusaun relevante seluk hanesan INFORDEPE;



c. Hatudu abilidade hanorin ne’ebé diak liu tan bainhira tuir ona formasaun iha tinan kotuk;



d. Prepara plano de aula bá período trimestrál ka semestrál ka anuál nian tuir instrusaun husi Diretór Eskola;



e. Responde nó reaja positivamente, bainhira hetan konsellu ka komentáriu;



f. Kria nó haforsa grupo de trabalho entre professores ne’ebé hanorin iha área disiplina hanesan atu fó apoiu bá malu.



4. Partisipa iha atividade extrakurrikular, fora da hora normal hanorin, hanesan dezenvolvimentu kurríkulu; desportu; múzika; arte; manutensaun eskola; atividade komunidade nó ambiental.



II. Avaliasaun Espesífika



Fatór avaliasaun ne’ebé inkluidu iha kritéria ida ne’e maka hanesan tuir mai:

1. Koñesimentu profundu iha lian ofisiál Tetun nó Português (Dosente demonstra/hatudu):



a. Komunikasaun ne’ebé klara hó estudante sira iha lian Tétum (bá asuntu siênsia sira);



b. Komunikasaun ne’ebé klara hó estudante sira iha lian Português (bá asuntu siênsia sira);



c. Hakerek iha lian Tétum hó lolós (bá asuntu siênsia sira);



d. Hakerek iha lian Português hó lolós (bá asuntu siênsia sira).



2. Koñesimentu Tékniku (Dosente demonstra/hatudu):



a. Iha koñesimentu suficiente konabá área disiplina ha-norin;



b. Iha abilidade atu hanorin hó adaptasaun bá asuntu hó kontestu lokal bá estudante sira nia interese;



c. Iha abilidade atu dezenvolve matéria hanorin iha nível lokál bazeia bá kurríkulu Nasionál;



d. Iha abilidade atu servisu hamutuk hó estudante hó nesesidade espesiál ne’ebe implika bá sira nia diak hó eskola nia proveito.



3. Pedagojia (Dosente demonstra/hatudu):



a. Iha abilidade atu uza metodolojia hanorin ne’ebé variadu hanesan grupo de trabalho, drama, aprezentasaun nó diskusaun atu atrai estudante sira nia atensaun;



b. Iha koñesimentu atu identifika nó avalia estudante sira nia progresu aprendizajem;



c. Dosente halo esforsu atu atinji rezultadu aprendizajem estudante sira nian ne’ebé esperadu iha kurríkulu Nasionál, partikularmente, literasia nó numerasia;



d. Iha abilidade atu simplifika métodu hanorin hodi bele influensia estudante atu gosta nó partisipa iha ninia lisaun nó fó motivasaun bá estudante atu la falta eskola.



4. Étika Profisionál (Dosente demonstra/hatudu):



a) Respeitu bá estudante hotu, la haré sira nia idade, seksu, relijiaun, kultura nó estatutu orijin sosial nó fo atensaun espesifiku liu sekarik iha labarik ruma maka hatudu diferensa iha prosesu aprendizajem;



b) Kumpri dever relasiona hó hanorin ne’ebé difinidu ona iha Artigu 17 husi Dekretu-Lei No 23/2010, 9 Dezembru konaba Estatutu Karreira Dosente;



c) Kontinua aprende nó hadi’a dezempeñu servisu nudar pro-fessor exemplar.

Artigu 14o

Apuramentu Avaliasaun



Rezultadu husi avaliasaun dezempeñu sei hetan liu husi soma global husi avaliasaun bá kritéria hotu, ne’ebé expresa/hatete-sai kuantitativamente iha kraik ne’e:



a) Muito Bom, husi pontu 86 - 100;



b) Bom, husi pontu 67 - 85;



c) Suficiente, husi pontu 50 - 66;



d) Insuficiente, husi pontu 0 - 49.



Artigu 15o

Ficha Avaliasaun



1. Avaliasaun dezempeñu nian ne’e sei hala’o liu husi prienxi-mentu ficha avaliasaun nian ne’ebé maka tau hamutuk iha diploma ida ne’e.



2. Ficha avaliasaun kontein instrusaun konabá oinsa atu prienxe ficha avaliasaun dezempeñu nó mós kritéria avaliasaun ne’ebé relevante hó funsaun dosente sira nian.



Kapítulu IV

Kompetênsia hodi Avalia nó Aprova



Artigu 16º

Atór sira iha Prosedimentu Avaliasaun



Prosesu avaliasaun dezempeñu sei involve avaliadór, avaliadu, dirijenti másimu edukasaun distritál, dirijenti másimu husi servisu iha nível Nasionál.



Artigu 17º

Avaliadór



1. Superiór imediatu husi dosente maka sei sai ninia avaliadór;



2. Atu halo avaliasaun, avaliadór tenke servisu hamutuk ona hó ninia avaliadu pelo menos fulan nén (6) nia laran;



3. Bainhira superiór imediatu la prienxe kritéria husi pontu númeru 2 ka se iha impedimentu ruma, superiór imediatu husi avaliadór maka sei halo avaliasaun;



4. Kompetênsia husi avaliadór sei inklui:



a. Halo avaliasaun bazeia bá kritéria avaliasaun ne’ebé diskuti ona hó avaliadu;



b. Halo avaliasaun bazeia bá avaliadór nia koñesimentu bá prestasaun servisu husi avaliadu nó diskusaun hó avaliadu durante tinan sivil ida nia laran;



c. Aprezenta razaun forti atu fundamenta kada klasifika-saun ne’ebé maka fó bá kada kritéria;



d. Halo komunikasaun hó avaliadu konabá rezultadu ava-liasaun hó nia razaun forti;

e. Aprezenta justifikasaun forti bainhira iha reklamasaun husi avaliadu.



Artigu 18º

Dirijenti Másimu iha Nível Distritál



1. Diretór Edukasaun Distritál maka sei konsidera hanesan Dirijenti ás liu iha nível distritál;



2. Kompetênsia husi Dirijenti másimu edukasaun distritál sei inklui:



a. Halo omologasaun bá klasifikasaun finál husi avalia-saun;



b. Tetu nó rezolve reklamasaun husi avaliadu iha nível distritál bazeia bá evidênsia nó informasaun funda-mentál seluk ne’ebé sei fasilita desisaun ida ne’ebé justa;



c. Aprova rekerimentu bá avaliasaun extraordinária bazeia bá aspetu ne’ebé maka hatuur iha Diploma Ministeríal ida ne’e.



Artigu 19o

Dirijenti Másimu iha Prosesu Avaliasaun



1. Hó objetivu atu implementa Diploma Ministeriál ida ne’e hó efisiente nó efikáz, konsidera nu’udar dirijenti másimu husi servisu nível ministerial maka Director-Geral dos Serviços Corperativos husi Ministério da Educação ka entidade dirigente nível nasionál nebe’e hetan delegasaun tambá nia kompetênsia rásik;



2. Dirijenti másimu sei responsabiliza atu:



a. Koordena nó kontrola prosedimentu anuál ba avaliasaun dezempeñu;



b. Rezolve reklamasaun husi avaliadu bainhira iha insatis-fasaun ka dezenten-dimentu ruma maka mosu iha nível distritál.



Kapítulu V

Prosedimentu Avaliasaun Desempeñu



Seksaun I

Tipu Avaliasaun



Artigu 20o

Tipu Avaliasaun



1. Avaliasaun ordinária.



2. Avaliasaun extraordinária.



Artigu 21o

Avaliasaun Ordinária



Nudar avaliasaun regulár ne’ebé obrigatoriamente hala’o kada tinan entre fulan Janeiru hó Marsu, atu avalia dezempeñu servisu dosente sira nian iha tinan sivil kotuk.

Artigu 22º

Avaliasaun Extraordinária



1. Avaliasaun extraordinária bele hala’o bainhira iha sirkuns-tânsia ruma ne’ebé akontese antes ka depois de periodo avaliasaun ordinária nian ne’ebé eziji avaliasaun dezempeñu, hanesan kritéria ida atu kompleta prosedimentu administrativu ruma;



2. Avaliasaun extraordinária hala’o depende bá nesesidade nó halo tuir pedidu nó aprovasaun husi parte kompetente ne’ebé mensiona iha Diploma Ministeríal ida ne’e;



3. Avaliasaun extraordinária sei halo tuir prosesu avaliasaun ordinária nian.



Seksaun II

Prosedimentu



Artigu 23º

Faze Iha Prosesu Avaliasaun



Prosedimentu avaliasaun nian sei hala’o tuir faze sira tuir mai ne’e:



a) Avaliasaun;



b) Komunikasaun konabá rezultadu;



c) Reklamasaun bá Dirijenti másimu edukasaun distritál (se karik iha);



d) Rekursu bá Dirijenti másimu servisu nian iha nível Nasionál (se karik iha);



e) Validasaun nó Omologasaun.



Artigu 24º

Avaliasaun



1. Avaliasaun halo liu husi prienximentu fixa avaliasaun dezempeñu husi avaliadór;



2. Avaliasaun sei hala’o entre loron 10 no 30 fulan Janeiru.



Artigu 25º

Komunikasaun Konabá Rezultadu Avaliasaun



1. Avaliadór tenke halo komunikasaun lalais hó avaliadu kona-bá rezultadu avaliasaun bainhira nia prienxe hotu ona ficha avaliasaun;



2. Avaliadór mós tenke fó kópia ficha avaliasaun ida bá avaliadu bainhira halo komunikasaun hó avaliadu.



Artigu 26º

Reklamasaun bá Dirijenti Másimu Edukasaun Distritál



1. Avaliadu bele hato’o reklamasaun eskrita bá dirijenti nível distritál bainhira la satisfáz hó justifikasaun bá avaliasaun ne’ebé aprezenta husi ninia avaliadór;

2. Avaliadu tenke hatama karta reklamasaun hamutuk hó ficha avaliasaun nó deklarasaun husi avaliadór iha loron lima (5) nia laran bainhira hetan ona notifikasaun husi avaliadór;



3. Reklamasaun tenke halo bazeia bá razaun forti, la’os atu husu de’it konabá rezultadu avaliasaun bá kada kritéria ne’ebé la hanesan ka tamba iha diferensa hó rezultadu avaliasaun iha tinan kotuk ka diferensa hó rezultadu avaliasaun ema seluk nian;



4. Dirijenti másimu edukasaun distritál tenke foti medida ne’ebé apropriada hanesan halo diálogu hó parte relevante hotu nó halo análize bá evidênsia atu rezolve reklamasaun;



5. Desisaun finál konaba reklamasaun sei fó sai bá avaliadu nó avaliadór iha loron lima (5) nia laran nó sei halo liu husi hakerek (por escrito).



Artigu 27o

Rekursu bá Dirijenti Másimu iha Nível Nasionál



1. Se iha insatisfasaun iha nível distritál, avaliadu bele halo rekursu bá Dirijenti másimu iha nível nasional iha loron lima (5) nia laran bainhira nia hetan ona desizaun husi Dirijenti másimu edukasaun distritál;



2. Dirijenti másimu iha nível nasional tenke foti medida ne’ebé apropriada hanesan halo diálogu hó parte relevante hotu nó halo análize bá evidênsia atu rezolve rekursu;



3. Dirijenti másimu iha nível nasional tenke fó sai desisaun finál bá avaliadu iha loron lima (5) nia laran.



Artigu 28º

Validasaun nó Omologasaun



1. Bainhira laiha reklamasaun ka rekursu husi avaliadu, ficha avaliasaun ne’ebé hetan ona avaliasaun husi avaliadór nó asinatura husi avaliadu tenke submete bá Dirijenti másimu edukasaun distritál atu halo validasaun nó omologasaun iha loron tolu (3) nia laran;



2. Dirijenti másimu edukasaun distritál iha kompetênsia atu altera avaliasaun husi avaliadór bainhira iha razaun nó evidênsia forti;



3. Validasaun nó omologasaun husi dirijenti másimu edukasaun distritál tenke fó sai bá avaliadu iha loron tolu (3) nia laran;



4. Validasaun nó omologasaun husi dirijenti másimu edukasaun distritál bá avaliasaun dezempeñu tenke remata iha 28 de Fevereiro.



Kapítulu VI

Dispozisaun Finál nó Tranzitória



Artigu 29o

Base de dados



1. Bainhira prosesu avaliasaun dezempeñu iha nível distritál kompleta ona, diresaun distritál ida-idak sei submete, dokumentu hanesan ficha avaliasaun, sumáriu konabá númeru dosente ne’ebé hetan avaliasaun nó sira nia klasifikasaun finál bá Direção Nacional de Recursos Humanos, Ministério da Educação nian.



2. Submisaun bá Direção Nacional de Recursos Humanos tenke halo entre 1-10 Marsu;



3. Direção Nacional de Recursos Humanos sei halo rekapitula-saun bá dokumentu nó dadu bá dosente ne’ebé maka hetan ona nomeasaun definitiva hanesan “professor” ka “professor senior” ne’ebé simu husi diresaun distritál nó submete bá Komisaun Funsaun Públika atu foti desisaun tuir dalan ne’ebé Diploma Ministeriál ida ne’e hatuur ona konabá processamento salárial nó eskalaun nian.



Artigu 30º

Alterasaun



Bele halo alterasaun bá Diploma Ministeriál ida ne’e bainhira iha razaun fundamentada/evidensiada hó forma unânime husi parte relevante hôtu, hafoin tinan ida ka rua nia laran, Diploma Ministerial ida ne’e hetan ona ninia implementasaun.



Artigu 31º

Entrada em Vigor



Diploma Ministeriál ida ne´e hahú vigora imediatamente husi loron tuir mai hafoin ninia publikasaun hó forma unânime husi parte relevante hotu.





Aprovadu nó omologa husi:





Ministro da Educação







Dr. Bendito dos Santos Freitas, MA





Dili, .30 / 1 /2014.