BALI, INDONESIA – Sesta-Feira, loron 11 fulan-Dezembru 2015, S.E. Ministru Justisa Timor-Leste, Ivo Valente hala’o vizita kortezia ho Embaixadór Portugal ba Indonesia Sr. Joaquim Moreira de Lemos no hala’o reuniaun ho Sekretáriu-Jerál IDEA Sr. Yves Leterme hosi Stockholm Sweden iha Nusa Nusa Dua - Bali, Indonesia.

Iha oras tuku 10:00 dadersan, Ministru Justisa, Ivo Valente halo vizita kortezia ho Embaixadór Portugal ba Indonesia Sr. Joaquim Moreira de Lemos.

Iha vizita kortezia ne’e, Ministru Ivo hato’o ninia agradesimentu ba Governu Portugal ne’ebé sempre hatudu nia prontidaun hodi ajuda Timor-Leste iha tempu barak nia laran.

“Reprezenta VI Governu Konstitusionál, ha’u hakarak hato’o Governu Timor-Leste nia gratidaun bót ba Governu no povu Portugal kona-ba Portugal nia apoiu ba Timor-oan sira iha prosesu luta naruk no manan independénsia, ita-bót sira sempre hatudu prontidaun, apoiu ona ami hodi hari’i fundamentu forte ba setór justisa Timor-Leste, ami sei presiza nafatin apoiu hosi Governu Portugal. Aliénde ne’e, hanesan parte paíz irmãos CPLP nian importante ba ita atu asegura nafatin ita-nia kooperasaun entre paíz rua ne’e,” dehan Ministru Ivo Valente.

Relasaun ho proposta protókolu, Ministru Ivo informa katak; ha’u submete ona proposta Ministériu Justisa em relasaun ho protókolu kooperasaun entre Timor-Leste ho Portugal, hein atu hetan resposta hosi Governu Portugal nian.

Enkontru líder paíz irmãos ne’e, hatudu ambiente hamnasa, kontenti no amizável tebes. Señor Embasadór Portugal iha Indonesia koalia kona-ba sira-nia apoiu ba Timor-Leste, sei kontinua nafatin, nia kontente rona no hare’e progressu dezenvolvimentu iha Timor-Leste.

Depois vizita kortezia ho Embaixadór Portugal, iha tuku 11:15 meudia, Ministru Justisa kontinua halo reuniaun ho Sekretáriu-Jerál IDEA Sr. Yves Leterme hosi Stockholm Sweden.

Reuniaun ne’e nu’udar momentu kria amizável iha prosesu Bali Democracy Forum (BDF) nian. Aliénde ne’e, hanesan oportunidade ida atu diskute posibilidade apoiu hosi instituisaun internasionál IDEA ba iha dezenvolvimentu demokrasia (building democracy), eleisaun jerál no asistensia legál ba iha Timor-Leste.

Ministru Justisa hateten, “Timor-Leste hanesan paíz joven sempre nakloke án atu aprende nafatin, loke án hodi simu apoiu hosi instituisaun internasionál sira atu foti parte iha dezenvolvimentu instituisaun no konstrusaun do Estadu. Ho nune’e, ha’u sei koalia no koordena liután ho instituições respectivas mak servisu iha área ida ne’e; por ezemplu, ha’u sei koalia ho Ministru Koordenadór Administrasaun Estadu no Ministru Negósiu Estranjeiru (MNEK) ba posibilidade kooperasaun iha futuru.”

Iha reuniaun ne’e, Ministru Justisa rona esplikasaun kona-ba servisu IDEA nian hodi fó apoiu ba iha prosesu dezenvolvimentu demokrasia paíz sira iha Sudeste Aziátiku, Áfrika no rai seluk tán, nune’e mós sá apoiu ba iha sosiedade sívil, instituisaun estadu no governu sira hodi halo akompañamentu no monitoramentu ba eleisaun jerál nian.

Ministru Justisa, Ivo Valente, hato’o nia gratidaun ba Instituisaun Internasionál IDEA, no promete atu lori ba iha diskusaun ho ministériu relevante sira.

Akompaña Ministru Justisa, Ivo Valente iha reuniaun hirak ne’e mak Ofisiál Ministériu Negósiu Estranjeiru no Kooperasaun Timor-Leste Sr. Lisualdo Coimbra Gaspar, Xéfi Gabinete Ministru Justisa Sr. Evangelino Belo no Assesór Nasionál ba Ministru Justisa Sr. Joaozito Viana.

Evangelino Belo
Xéfi Gabinete Ministru Justisa